Abigail ꞌne Dabid

¿GI PÄDI toꞌo nuni ꞌme̱hñä xa mähotho bi ma bä nuu Dabid? Rä thuhu Abigail. Nuni ꞌme̱hñä xa mi ja rä mfädi, ꞌne bi hñäkui Dabid pa himbi me̱fi nꞌa tsꞌo tꞌo̱tꞌe. Änte gä pähu̱ te mä tsꞌo tꞌo̱tꞌeꞌä. Ma gä handihu̱ te mi thogi Dabid.

Mi ꞌmatꞌi Dabid de Saul, bi ma bä ꞌmu̱i ha nꞌa kueba. Yä ku, gatꞌho rä familia, ꞌne 400 yä ñꞌo̱ho̱ bi ma bä nuu Dabid. Dabid geꞌä bi zo̱ho̱ bi gu̱tꞌi rä ꞌñuu. Nubye̱, Dabid bi ma bä nuu näꞌä ndä de Moab ꞌne bi ꞌñembi: “Po rä mäte, umbä nse̱ki mä dada ꞌne mä nänä dä gohi kongeꞌi asta gä pädi te ma dä thogi ko nuga”. ꞌNepu̱, Dabid ꞌne nuꞌu̱ yä ñꞌo̱ho̱ mi de̱ni bi ma bä ꞌmu̱i ha yä tꞌo̱ho̱.

Mꞌe̱fa, Dabid bi bädi Abigail. Näbal, näꞌä rä däme Abigail xa mi pe̱ꞌtsi ndunthi yä bojä ꞌne yä hai. ꞌNehe mi pe̱ꞌtsi 3,000 yä de̱ti ꞌne 1,000 yä tꞌäxi. Näbal xa mi rä bo̱ka, pe Abigail xa mi tsꞌu̱ngänza, xa mi ja rä mfeni ꞌne xa mi rä hojäꞌi. Nꞌa rä pa, bi ñäni rä familia. Ma gä handihu̱ hanja bi ja.

Dabid ꞌne nuꞌu̱ yä ñꞌo̱ho̱ mi de̱ni, xki ñhojäꞌi ko Näbal. Xki supäbi yä de̱ti. Nꞌa rä pa, Dabid bi me̱hni rꞌa yä ñꞌo̱ho̱ pa dä yꞌapäbi rä mfatsꞌi Näbal. Nuꞌu̱ yä ñꞌo̱ho̱, bi zu̱di Näbal ꞌne nuꞌu̱ yä ꞌme̱go mi äxi yä de̱ti. Mi ja nꞌa rä ngo, hänge Näbal xki hyoki ndunthi yä ñhuni. Nuꞌu̱ yä mꞌe̱hni Dabid bi ꞌñembi Näbal: “Xtä ñhojäꞌihe kongeꞌi. Hinte mä de̱ti xtä peꞌäꞌihe, ꞌne xtä faxꞌäꞌihe gi su. Nubye̱ ko rä mäte, rꞌakägihe nꞌa tu̱i rä ñhuni”.

Pe Näbal bi nkue̱tho ꞌne bi zani Dabid, bi ꞌñenä: “Hinte mä ñhuni ma gä umbäbi rꞌa yä ñꞌo̱ho̱ nguꞌähu̱”. Mi mengi nuꞌu̱ yä ñꞌo̱ho̱ bi xipi Dabid näꞌä xki mää Näbal. Dabid xa bi nkue̱ ꞌne bi ꞌñembäbi nuꞌu̱ yä ñꞌo̱ho̱ mi de̱ni: “¡Mfoxu̱ ri majuaihu̱!”. Nubye̱, bi ma pa dä ho Näbal ꞌne nuꞌu̱ yä ꞌme̱go.

Mi yꞌo̱de nꞌa de nuꞌu̱ yä ꞌme̱go Näbal, bi ma bä xipi Abigail näꞌä xki me̱fi Näbal. Nguntꞌä Abigail bi hyoki yä ñhuni, ꞌnepu̱ bi tuti yä burru ꞌne bi gu̱ rä ꞌñuu bi ma. Mi zu̱di Dabid, bi gäi de rä burru, bi ndandiñähmu ꞌne bi ꞌñembi: “Po rä mäte zi hmuu, ogi japämäsu näꞌä bi mää mä däme Näbal. Näꞌä nda dondo ꞌne hingä geꞌä pe̱fi. Po rä mäte hñäni nunä zi ñhuni xtä hä, ꞌne punꞌgägihe po näꞌä bi thogi”.

Dabid bi ꞌñenä: “Xa ja ri fädi, ngeꞌä hingä hye̱gi dä ma pa xtä ho Näbal po näꞌä bi me̱fi. Nubye̱ pengi ha ri nguu ꞌne ogi turimu̱i”. Mꞌe̱fa, Näbal bi du, ꞌne Dabid bi zo̱ho̱ bi nthätui ꞌnehe Abigail.