Dabid bi zo̱ho̱ bi ndä

MÄNꞌAKI Saul mi ne dä gu̱ Dabid pa xä hyo. Bi zitsꞌi 3,000 yä soldado nuꞌu̱ xa mi pädi dä ntuhni xä ñho ꞌne bi ma pa dä honi Dabid. Mi bädi Dabid, bi me̱hni rꞌa yä ñꞌo̱ho̱ pa bi ma bä handi habu̱ xki ntsaya Saul näꞌä xuiꞌä. ꞌNepu̱ Dabid bi yꞌambäbi yoho de nuꞌu̱ yä ñꞌo̱ho̱ mi ñꞌoui: “¿Toꞌo dä ma kongeki pa habu̱ bi tsaya Saul?”.

Abisai bi dädi: “Nuga gä me̱e̱”. Abisai geꞌä mi rä tꞌu̱ Seruya, näꞌä rä nju Dabid. Mientra mi ähä Saul ꞌne nuꞌu̱ yä soldado, Dabid ꞌne Abisai bi yu̱tꞌi habu̱ mi ähä Saul, ꞌne bi hñätsꞌi näꞌä rä lansa ꞌne rä mpothe Saul mi ti ha rä ñäxu. Hinto bi hyandi ngeꞌä gatꞌho xa mi ähä.

Nubye̱ hyandi Dabid ꞌne Abisai. Ya bi bo̱ni de habu̱ mi tsaya Saul ꞌne bi bo̱tsꞌe ha nꞌa rä tꞌo̱ho̱. Dabid bi maꞌti näꞌä rä ndä de yä soldado Saul ꞌne bi ꞌñembi: “Abner, ¿por hanja hingi su ri hmuu Saul? ¡Hyandi! ¿Habu̱ ja näꞌä rä lansa ꞌne rä mpothe?”.

Saul bi nuhu. Bi bädi ge mi geꞌä Dabid, ꞌne bi ꞌñembäbi: “¿Go geꞌi gä Dabid?”. ¿Gi handi habu̱ ꞌmai Saul ꞌne Abner?

Dabid bi dädi ꞌne bi ꞌñenä: “Hää go geki zi hmuu. ¿Por hanja gi ne gi hyogägi? ¿Te mä tsꞌoki xtä o̱tꞌe? Zi hmuu, xi di hñäua ri lansa, guä pe̱hni toꞌo dä ehe dä hñätsꞌi”.

Saul bi ꞌñenä: “Hingä geꞌä näꞌä xtä pe̱fi, xtä yꞌo ngu nꞌa dondo”. Nubye̱ Dabid bi ma, ꞌne Saul bi mengi pa ha rä nguu. Pe Dabid mi mbeni: “Nꞌa de nuya yä pa Saul ma dä hyogägi. Pe̱ꞌtsi te gä ma pa ha yä hnini yä filisteo”. ꞌNe geꞌä bi me̱fi. Dabid bi hyatꞌi ꞌne bi japi bi mbeni yä filisteo ge mi fatsꞌi.

Mꞌe̱fa yä filisteo bi bo̱tsꞌe pa dä ntuhni ko yä israelita. Ha näꞌä rä tuhniꞌä, Saul ꞌne Jonätan bi du. Dabid xa bi durämu̱i, bi yꞌofo nꞌa rä thuhu xa mähotho ꞌne bi ntuhu njaua: “Xa di tumämu̱i por geꞌi zi ku Jonätan. ¡Xa ndi mäꞌi ndunthi!”.

ꞌNepu̱, Dabid bi mengi ha Ebron, ha rä hnini Israel. Nuꞌu̱ yä ñꞌo̱ho̱ xki huahni Isboset, näꞌä rä tꞌu̱ Saul pa dä ndä, bi ntuhni ko nuꞌu̱ yä ñꞌo̱ho̱ mi ne ge Dabid xä ndä. Pe bi ntäte nuꞌu̱ yä soldado Dabid. Dabid mi pe̱ꞌtsi 30 yä je̱ya nuꞌmu̱ mi zo̱ho̱ bi ndä. Po yoto nje̱ya mädee bi mända ha Ebron. Ja gekua bi mꞌu̱i rꞌa yä tsꞌu̱ntꞌu̱ Dabid mi yä thuhu Amnon, Absalon, ꞌne Adonias.

Mꞌe̱fa, Dabid ꞌne nuꞌu̱ yä soldado bi ma bä häni nꞌa rä hnini xa mähotho mi rä thuhu Jerusalen. Joab, mänꞌa rä tꞌu̱ Seruya näꞌä rä nju Dabid, go geꞌä bi gu̱tꞌi rä ꞌñuu ha näꞌä rä tuhni. Hänge Dabid bi hñutsꞌi ngu rä ndä de nuꞌu̱ märꞌa yä soldado. Nubye̱ Dabid bi mu̱di bi mända ha rä hnini Jerusalen.