Yä mäkä tsꞌofo pa nꞌa rä mꞌu̱i xä ñho

¿XÄ ÑHO gä o̱tehu̱ rä tsꞌu̱tꞌhui Äjuä? Pa gä pädihu̱, ma gä handihu̱ nuꞌu̱ yä tsꞌofo hutsꞌi ha rä Noya Äjuä. ¿Xä ñho nuꞌu̱ yä tsꞌofo? ¿Faxkägihu̱ gä pe̱ꞌtsihu̱ nꞌa rä mꞌu̱i xä ñho? Ha rä mfistꞌofo Proverbios, rä Salomon bi yꞌofo xi ndunthi yä tsꞌofo pa nꞌa rä mꞌu̱i xä ñho. Ma gä handihu̱ rꞌa nuya yä tsꞌofo.

Nꞌa rä hogä ntsitsꞌi ko Äjuä. Pa gä pe̱ꞌtsihu̱ nꞌa rä hogä ntsitsꞌi ko rä Äjuä, mähyoni gä pe̱ꞌtsuäbihu̱ rä jamfri. Rä Salomon bi mää: «Pe̱ꞌtsuäbi rä jamfri Jeoba ko ngatꞌho ri koraso ꞌne ogi häkse̱ ri mfenise̱. O̱tꞌe ngue̱nda ha gatꞌho ri ꞌñuu, ꞌne Jeoba ma dä ꞌñutꞌäꞌi näꞌä rä ꞌñuu mänjuäntho» (Proverbios 3:5, 6). ¿Hanja di udihu̱ ge di pe̱ꞌtsuäbihu̱ rä jamfri Äjuä? Ma gä hopi dä gu̱nkägihu̱ ꞌne ma gä o̱tehu̱ yä mhända. Mu̱ gä jahu̱ njabu̱ ma gä umbäbihu̱ rä johya mä tehu̱; ma gä johyabihu̱ rä mfeni Jeoba ꞌne ma gä udihu̱ ge rä Zithu näꞌä nꞌa rä kꞌuamba (Proverbios 27:11).

Nꞌa rä hogä mꞌu̱i ꞌne yä hogä ntsitsꞌi. Gatꞌho yä mꞌu̱i o̱ꞌtuäbi rä ꞌme̱di yä tsꞌofo Äjuä. Äjuä embäbi yä däme: «Johya ko näꞌä ri ꞌme̱hñä gä mbäsjäꞌiui mähye̱gi», njabu̱ Äjuä di mändabi yä däme ge hindä hyatꞌi yä ꞌme̱hñä (Proverbios 5:18-20). Ha rä ntheke 31 de rä Proverbios, di nheki nꞌa rä hogä kꞌoi habu̱ uti yä ꞌme̱hñä te dä me̱fi pa dä hñäni rä tꞌekꞌei de rä däme ꞌne de yä bätsi. ꞌNehe mää ge Äjuä to̱ꞌmi ge yä bätsi dä yꞌo̱te yä dada ꞌne yä nänä (Proverbios 6:20). Rä Proverbios udi ꞌnehe ge yä hogä ntsitsꞌi ja ndunthi rä muui pe mu̱ di ho gä ꞌuese̱hu̱ nꞌambu̱, ma gä udihu̱ ge di honi mä ñhose̱hu̱ (Proverbios 18:1). Yä ntsitsꞌi dä za dä jakägihu̱ gä pe̱fihu̱ näꞌä xä ñho o näꞌä xä ntsꞌo, hänge mähyoni gä huahnihu̱ yä hogä ntsitsꞌi (Proverbios 13:20; 17:17).

Yä tsꞌofo pa nuju̱se̱. Rä Proverbios uni rꞌa yä hogä tsꞌofo pa gä mꞌu̱ihu̱ xä ñho, ma dä maxkägihu̱ gä ꞌuekehu̱ nuꞌu̱ yä mfeni hingi faste, yä nti ꞌne pa gä pe̱ꞌtsihu̱ nꞌa rä mfeni xä ñho. Xikägihu̱ ge mähyoni gä mpe̱fihu̱ (Proverbios 6:6; 14:30; 20:1). ꞌNehe mää ge mu̱ di kamfribihu̱ yä tsꞌofo nuꞌu̱ di nkontraui Äjuä, ma gä pe̱ꞌtsihu̱ yä xuñha (Proverbios 14:12). Xikägihu̱ ge mähyoni gä su mä korasohu̱ pa hingä tsꞌonihu̱, ngeꞌä ha mä korasohu̱ «ja brä ꞌñeheni rä te» (Proverbios 4:23).

Nuya yä tsꞌofo xä matsꞌi dä mꞌu̱i xä ñho ndunthi yä jäꞌi. Nuyu̱ yä jäꞌi xä bädi ꞌne xä hyandi ge xi xä ñho gä o̱tehu̱ rä tsꞌu̱tꞌhui rä Zi Dada Jeoba.

(Ehe ha rä mfistꞌofo Proverbios.)