Yä ndä yä hojäꞌi ꞌne yä ndä yä tsꞌomꞌu̱i

RÄ Salomon bi zopu̱ rä ꞌñuu Jeoba, mꞌe̱fa rä hnini Israel bi hege ja ngu xki mängä Jeoba. Rä Salomon bi zokuäbi rä tsꞌu̱tꞌhui rä tꞌu̱ mrä thuhu rä Reoboam. Nuni rä ndä, xi mrä tsꞌomꞌu̱i hänge rꞌe̱tꞌa de nuꞌu̱ yä tꞌu̱kä hnini bi ꞌuege ꞌne bi zo̱ho̱ bi tꞌembi rä tsꞌu̱tꞌhui de rä norte ha Israel. Yoho yä tꞌu̱kä hnini nuꞌu̱ himbi ꞌuege de näꞌä rä tsꞌu̱tꞌhui xki hñutsꞌi rä Dabid ha Jerusalen, bi tꞌembi rä tsꞌu̱tꞌhui de rä sur ha Juda.

Nuꞌu̱ yä ndä bi mꞌu̱i ha Israel ꞌne ha Juda, himbi yꞌo̱te ha nixi bi me̱ꞌtsuäbi rä jamfri Äjuä, hänge himbi mꞌu̱i xä ñho ha nixi bi me̱ꞌtsi yä ñho. Pe näꞌä rä tsꞌu̱tꞌhui de rä norte ha Israel bi thogi näꞌä bi me̱fi, dende xa rä mu̱di, nuꞌu̱ yä ndä bi ꞌñuti yä jäꞌi dä xo̱kämbeni märꞌa yä zidada hingä mäjuäni. Äjuä bä pe̱hni yä mꞌe̱hni ngu rä Elias ꞌne rä Eliseo —mäske nuyu̱ bi gu̱tsꞌi rꞌa yä jäꞌi nuꞌu̱ xki du—, hinto bi yꞌo̱te nuyu̱ yä mꞌe̱hni Äjuä. Mꞌe̱fa, Äjuä bi hyopi rä hnini Asiria bi ma bä huati näꞌä rä tsꞌu̱tꞌhui ha Israel.

Bi thogi nꞌa nthebe nje̱ya, Äjuä ꞌnehe bi zu̱i näꞌä rä tsꞌu̱tꞌhui de rä sur ha Juda. Yä mꞌe̱hni Äjuä bi umbäbi rä tsꞌofo nuꞌu̱ mñä ndä, pe se̱he̱ nꞌa hängutho bi yꞌo̱de ꞌne bi tsapi dä goꞌtsi näꞌä rä hnini ha rä ꞌñuu rä Zi Dada Jeoba. Ngu näꞌä rä ndä mrä thuhu Josias bi mu̱di bi hñäki nuꞌu̱ yä zidada hingä mäjuäni ꞌne bi yo gu̱tsꞌi näꞌä rä templo Jeoba. Ha näꞌä rä ꞌme̱fi, bri thini nuꞌu̱ yä mu̱di ntꞌofo de nuꞌu̱ yä Mhända bi tꞌumbi rä Moises. Ko nꞌa rä johya, rä Josias mänꞌa bi dämä hñäki nuꞌu̱ yä zidada hingä mäjuäni.

Nꞌa rä ntso̱ꞌmi bi uni, ngeꞌä mi du rä Josias nuꞌu̱ märꞌa yä ndä bi gohi himbi de̱nduäbi rä kꞌoi. Hänge Jeoba bi hyopi näꞌä rä hnini Babilonia bi ma bä häni näꞌä rä hnini Juda ꞌne bä huati rä hnini Jerusalen ꞌne näꞌä rä templo. Nuꞌu̱ yä jäꞌi bi bongi bi tsꞌitsꞌi de gä ꞌme̱go ha Babilonia. Äjuä bi mää ge ma dä thogi 70 yä je̱ya pa ja dä za dä mengi nuꞌu̱ yä jäꞌi ha yä hai. Pe mientra näꞌä rä hnini Juda bi gohi xa mrä ꞌmathatho.

Rä Dabid bi tꞌembi ge ninꞌa de nuꞌu̱ yä tꞌu̱ ma dä ndä asta nuꞌmu̱ sti zo̱ho̱ näꞌä rä Ndä xki mängä Jeoba, näꞌä rä Ñänte tꞌembi rä Mesia. Ko näꞌä bi me̱fi nuꞌu̱ yä ndä bä ehe de ha rä Dabid, bi ꞌñudi ge rä mexiꞌmhai hiri ꞌñepi dä hñä rä tsꞌu̱tꞌhui. Se̱he̱ rä Mesia go geꞌä ri ꞌñepi. Hänge Jeoba bi ꞌñembäbi näꞌä rä gäxä ndä bi mꞌu̱ ha Jerusalen: «Näꞌä rä koronä [...] hinto rä me̱ti asta dä ꞌñepu̱ näꞌä xa toꞌo ri ꞌñepi dä hñutsꞌi, näꞌä go geꞌä ma gä umbäbi» (Ezequiel 21:26, 27).

(Ehe ha rä 1 Reyes, rä 2 Reyes, rä 2 Crónicas ha yä ntheke 10 asta 36 ꞌne ha rä Jeremías 25:8-11.)