RÄ NTHEKE 1
Nꞌa sekreto näꞌä di rꞌakägihu̱ rä johya gä pädihu̱
¿Gi ne gä xiꞌi nꞌa sekreto?...a Nde, ma gä xiꞌi. Rä Mäkä Tꞌofo no̱ni nꞌa sekreto xa mähotho. Nunä rä thuhu rä mäkä sekreto. Tꞌembäbi «mäkä» ngeꞌä bi ehe de Äjuä. ꞌNe tꞌembäbi «sekreto» ngeꞌä rä mu̱di, yä jäꞌi hinte mi pädi de gehnä, ꞌne asta yä e̱nxe̱ mi ne dä bädi mä nꞌa tu̱i de nunä sekreto. Xi nuꞌi, ¿gi hohmä gi pädi te mä sekretoꞌä?...
Asta yä e̱nxe̱ mi ne dä bädi de näꞌä sekreto
O̱tꞌe ndunthi, pe xa ndunthi yä je̱ya, rä Zi Dada Jeoba bi hyoki näꞌä mu̱di ñꞌo̱ho̱ mi rä thuhu Adan ꞌne näꞌä mu̱di ꞌme̱hñä mi rä thuhu Eba. Äjuä bi hyokuäbi nꞌa luga xa mähotho pa ja bi mꞌu̱hni. Näꞌä lugaꞌä mi rä thuhu rä uädri Eden. Jeoba mi ne ge Adan, Eba ꞌne nuꞌu̱ yä bätsi xä hyoki mähotho gatꞌho rä Xiꞌmhai pa xä zo̱ho̱ xä nja ngu näꞌä rä uädri Eden. Jeoba mi ne ge gatꞌho yä jäꞌi xä mꞌu̱i pa nzäntho ha nꞌa uädri. Pe himbi thogi njabu̱. ¿Gi pädi por hanja?...
Ngeꞌä Adan ꞌne Eba himbi yꞌo̱te Äjuä, hänge po rängeꞌä, mäpaya nuju̱ hindi ꞌmu̱ihu̱ ha nꞌa rä uädri. Pe Äjuä xä mää ge nꞌa rä pa, ma dä japi dä uädri gatꞌho rä Xiꞌmhai, ꞌne gatꞌho yä jäꞌi ma dä za dä mꞌu̱i ko rä johya ꞌne pa nzäntho. ¿Hanja ma dä kumpli näꞌä xä mää? Po ndunthi yä je̱ya, nixi nꞌa jäꞌi hingä mi pädi. ¡Mi nꞌa rä sekreto!
Pe rꞌamätsꞌu̱ bi fädi nunä sekreto. Nuꞌmu̱ rä Hesu bä ehe ha rä Xiꞌmhai, bi ꞌñuti yä jäꞌi de geꞌä. Rä Hesu bi mää ge näꞌä sekreto, mi geꞌä rä Tsꞌu̱tꞌhui Äjuä. ꞌNehe bi mää ge nuꞌmu̱ di xatuäbihu̱ rä Zi Dada Jeoba, mähyoni gä adihu̱ ge dä ehe näꞌä rä Tsꞌu̱tꞌhuiꞌä. ¿Por hanja? Ngeꞌä po mäde de näꞌä rä Tsꞌu̱tꞌhuiꞌä, Äjuä ma dä hyoki nꞌa uädri xa mähotho ha gatꞌho rä Xiꞌmhai.
¿Di rꞌaꞌi rä johya gi pädi nunä sekreto?... Pe beni, ho̱nse̱ nuꞌu̱ yä jäꞌi o̱te rä Zi Dada Jeoba geꞌu̱ ma dä mꞌu̱i ha rä Uädri. Rä Mäkä Tꞌofo xikägihu̱ de ndunthi yä ñꞌo̱ho̱ ꞌne yä ꞌme̱hñä nuꞌu̱ bi yꞌo̱te rä Zi Dada Jeoba. ¿Gi ne gi pädi toꞌoꞌu̱?... Nde, ma gä handihu̱ toꞌoꞌu̱ ꞌne hanja dä za gä te̱mbäbihu̱ yä kꞌoi.
Hñeti ha rä Mäkä Tꞌofo:
a Ha gatꞌho yä ntheke de nunä foyeto ma gi hyandi ge ha rꞌa yä ntꞌani di ñꞌoui hñuu yä punto (...). Nuya yä punto xiꞌi ge mꞌe̱fa de gi yꞌo̱tꞌe kada nꞌa de nuꞌu̱ yä ntꞌani, mähyoni gi to̱ꞌmi nꞌa zi tu̱i pa njabu̱ ri bätsi dä za dä dädi.