Äjuä ma dä hä nꞌa uädri

HYANDI nunä kꞌoi, zäi ge mi njani näꞌä uädri bi ꞌñuti Äjuä näꞌä rä mꞌe̱hni mi rä thuhu Isaias. Isaias bi mꞌu̱i mꞌe̱fa de Jonäs.

¿Gi beni habu̱ dä handihu̱ nꞌa uädri xa tsꞌu̱ngänza ngu nunä? Hää, nuꞌmu̱ dä pädihu̱ de näꞌä uädri xa mähotho bi hyoki Äjuä pa bi mꞌu̱i Adan ꞌne Eba, ¿hänge hää? Pe, ¿ma dä zo̱ho̱ dä njabu̱ gatꞌho rä Xiꞌmhai?

Jeoba bi ꞌñembi Isaias ge xä yꞌofo de näꞌä rꞌayꞌo uädri xä ꞌñepu̱ habu̱ ma dä mꞌu̱i rä hnini Äjuä. Äjuä bi ꞌñenä: “Yä miñꞌo ꞌne yä de̱ti ma dä mꞌu̱i mähye̱gi. Yä tꞌu̱kä doro ꞌne yä tꞌu̱kä zate ma dä ñuni mähye̱gi. Yä bätsi ma dä za dä su nuya yä zuꞌue. Nꞌa zi ꞌue̱ne ma dä za dä ñꞌeni getbu̱ de nꞌa kꞌeñä ꞌne hinte dä ja”.

Pe ndunthi yä jäꞌi enä: “Hingä mäjuäni ma dä njabu̱, nzäntho xä neki yä dumu̱i, yä xuñha ꞌne geꞌä nzäntho ma dä neki”. Pe beni, ¿ha mi nja näꞌä luga xki umbi Äjuä rä Adan ꞌne Eba pa dä mꞌu̱i?

Äjuä bi umbi Adan ꞌne Eba nꞌa uädri xa mähotho pa bi mꞌu̱i. Pe bi tꞌe̱ni ngeꞌä himbi yꞌo̱te yä mhända Äjuä. Mꞌe̱fa bi mu̱di bi nxita ꞌnepu̱ bi du. Jeoba xä mää ge nuꞌu̱ yä jäꞌi di mädi Jeoba, ma dä umbi nuꞌu̱ yä hogä tꞌo̱tꞌe bi ꞌme̱di Adan ꞌne Eba.

Ha näꞌä rꞌayꞌo uädri xä ꞌñepu̱, hingä ma dä mꞌu̱i yä nduxte jäꞌi, ꞌne ya hinto ma dä tsꞌoni rä Xiꞌmhai. Ma dä nja nꞌa rä hogä mꞌu̱i. Gatꞌho yä jäꞌi ma dä me̱ꞌtsi rä nzaki ꞌne ma dä mꞌu̱i ko rä johya ja ngu mi ne Äjuä dende ri mu̱di. Mꞌe̱fa ma gä pädihu̱ hanja Äjuä ma dä hyoki näꞌä uädri.