¿Toꞌo bi yꞌofo de rä Hesu?

¿Gi pädi toꞌo nuyu̱ yä ñꞌo̱ho̱ huxkua?... Nuyu̱ yä thuhu Mäteo, Märkos, Lukas, Juan, Pedro, Santiago, Judas, ꞌne Pablo. Nuyu̱ yä ñꞌo̱ho̱ bi mꞌu̱i ha nuꞌu̱ yä pa rä Hesu. Hänge nuyu̱ yä ñꞌo̱ho̱ bi za bi yꞌofo de geꞌä. Ma gä pädihu̱ mä nꞌa tu̱i de gehyu̱.

Hñuu de nuyu̱ yä ñꞌo̱ho̱ gi handi ha rä kꞌoi, mi yä apostol rä Hesu. ¿Gi pädi toꞌoꞌu̱? Mäteo, Juan, ꞌne Pedro. ¿Dä za gi ꞌñudi ha rä kꞌoi toꞌoꞌu̱?... Nuyu̱ bi ñꞌoui rä Hesu ꞌne mi ungä ntꞌo̱de rä Noya Äjuä. Hänge Mäteo ꞌne Juan mi pädi xä ñho toꞌo rä Hesu, ꞌne bi yꞌofo de geꞌä. Rä apostol Mäteo bi yꞌofo rä mfistꞌofo Mateo. Rä apostol Juan bi yꞌofo rä mfistꞌofo Juan. ꞌNehe bi yꞌofo rä mfistꞌofo Apocalipsis (o Revelación) ꞌne mä hñuu yä karta nuꞌu̱ yä thuhu: Rä mu̱di rä Juan, Rä yoho rä Juan, ꞌne Rä hñuu rä Juan. Rä Apostol Pedro bi yꞌofo yoho yä karta: Rä mu̱di rä Pedro, ꞌne Rä yoho rä Pedro. Ha näꞌä rä yoho rä karta, Pedro bi yꞌofo hanja Jeoba bä ñä dende mähetsꞌi ꞌne bi ꞌñenä de rä Hesu: “Gehnä mä mhäkä Tꞌu̱, xa di mädi ꞌne xa di jakägi gä johya”.

Nuyu̱ märꞌa yä ñꞌo̱ho̱ hutsꞌi ha rä kꞌoi, ꞌnehe bi yꞌofo rꞌa yä mfistꞌofo habu̱ utkägihu̱ de rä Hesu. Nꞌa de gehyu̱ rä thuhu Märkos. Zäi ge Märkos mi ñꞌoui rä Hesu ꞌne bi hyandi gatꞌho näꞌä bi thogi nuꞌmu̱ bä ehe nuꞌu̱ yä nkontra rä Hesu pa bi zitsꞌi. Mä nꞌa de nuꞌu̱ yä ñꞌo̱ho̱ bi yꞌofo de rä Hesu, mi rä thuhu Lukas. Nuni mi nꞌa rä mediko, ꞌne zäi ge nuni bi zo̱ho̱ bi nkristianu mꞌe̱fa de bi du rä Hesu.

Mä yoho de nuyu̱ yä ñꞌo̱ho̱ hutsꞌi ha rä kꞌoi, mi yä ku rä Hesu. Nuyu̱ ꞌnehe bi yꞌofo rꞌa nꞌa mfistꞌofo de rä Mäkä Tꞌofo habu̱ ñä de rä Hesu. ¿Gi pädi te mi yä thuhu?... Santiago ꞌne Judas. Ri mu̱di nuyu̱ hingä mi kamfribi rä Hesu, ꞌne mi embäbi ge xki ꞌme̱ rä mfeni. Pe mꞌe̱fa, Santiago ꞌne Judas bi zo̱ho̱ bi gamfribi rä Hesu ꞌne bi nkristianu.

De nuyu̱ yä ñꞌo̱ho̱ hutsꞌi ha rä kꞌoi, ¿gi pädi toꞌo di ꞌme̱di gä no̱mbäbihu̱ rä thuhu? Hää, di ꞌme̱di Pablo. Änte de dä nkristianu mi tꞌembäbi Saulo. Nuni xi mi u̱tsa yä kristianu ꞌne xi bi yꞌo̱tpäbi yä ntsꞌomꞌu̱i. Pe nuꞌmu̱, ¿hanja bi zo̱ho̱ bi nkristianu?... Nꞌa rä pa, Pablo mi yꞌo ꞌñuu pa Damäsko, ꞌne nse̱kitho bi yꞌo̱de ngu toꞌo bi nzofo dende mähetsꞌi, ꞌne bi ꞌñembäbi: “¿Por hanja xa gi u̱tsa nuꞌu̱ mä de̱ni?”. ¡Mi geꞌä rä Hesu! Mꞌe̱fa de geꞌä, Pablo bi paati rä mꞌu̱i ꞌne bi zo̱ho̱ bi nkristianu. Pablo bi zo̱ho̱ bi yꞌofo 14 yä mfistꞌofo de rä Mäkä Tꞌofo, dende rä mfistꞌofo Romanos asta Hebreos.

¿Hänge nuju̱ di hohu̱ gä hetihu̱ rä Mäkä Tꞌofo hyaxtho?... Ha rä Mäkä Tꞌofo hutsꞌi xa ndunthi yä ꞌmede de rä mꞌu̱i rä Hesu. ¿Gi hohmä gi pädi mä nꞌa tu̱i de geꞌä?...