Rä sobrinu Pablo xa hingä mi tsu

¿Gi hohmä gi pädi hanja nꞌa tsꞌu̱ntꞌu̱ bi ñämbäbi rä te rä tio? Nuju̱ hindi pädihu̱ te mi rä thuhu näꞌä tsꞌu̱ntꞌu̱, pe rä Mäkä Tꞌofo mää ge näꞌä mi rä sobrinu Pablo, ꞌne ge näꞌä tsꞌu̱ntꞌu̱ bi me̱fi nꞌa tꞌo̱tꞌe habu̱ bi ꞌñudi ge xa hingä mi tsu. ¿Gi ne gi pädi te bi me̱fi?...

Rä Pablo mi o fadi ha Jerusalen. Xki tꞌe̱ntꞌi fadi ngeꞌä mi udi de rä Hesu. Mi ꞌmu̱i rꞌa yä tsꞌomꞌu̱i gä ñꞌo̱ho̱ nuꞌu̱ xa mi u̱tsa Pablo ꞌne mi ne dä hyo. Hänge nuꞌu̱ bi hyoni te dä yꞌo̱tpäbi ꞌne bi ꞌñenä: “Yꞌaphu̱ rä däta ndä gä soldado ge dä me̱hni Pablo pa ha rä Sanedrin, mientra nuje ma gä fadihe rä ꞌñuu, pa xti thogi, gä takihe ꞌne gä hohe”.

Rä sobrinu Pablo bi yꞌo̱de näꞌä mi mbeni nuꞌu̱ yä tsꞌomꞌu̱i jäꞌi. ¿Te gi handi bi me̱fi näꞌä tsꞌu̱ntꞌu̱? Bi ma bä xipäbi Pablo näꞌä xki yꞌo̱de. Nubye̱ Pablo bi ꞌñembäbi rä sobrinu: “Ntihi ri ma guä xipäbi näꞌä ndä de gä soldado”. Nunä tꞌo̱tꞌe mi xä ñhei toꞌo dä me̱fi ngeꞌä näꞌä ndä de gä soldado mi pe̱ꞌtsi nꞌa rä däta nsu. Pe, ¿te bi yꞌo̱tꞌe näꞌä rä sobrinu Pablo?... Näꞌä tsꞌu̱ntꞌu̱ himbi ntsu ꞌne bi ma bä ñäui näꞌä ndä de gä soldado.

Mi bädi näꞌä ndä de gä soldado te mi mbeni dä me̱fi nuꞌu̱ yä tsꞌomꞌu̱i jäꞌi, bi me̱hni kasi 500 yä soldado pa dä su Pablo, ꞌne bi ꞌñembäbiꞌu̱: “¡Tsixu̱ Pablo pa Sesarea nunä xui!”. Pe xibye̱, ¿xa bi za bi me̱fi näꞌä mi mbeni nuꞌu̱ yä tsꞌomꞌu̱i jäꞌi? ¿Te gi handi ge bi thogi?... Hinä, ¡nuꞌu̱ yä tsꞌomꞌu̱i jäꞌi ya himbi za te bi yꞌo̱tpäbi Pablo!

¿Te dä za gi pädi de näꞌä bi me̱fi rä sobrinu Pablo?... Ja ngu näꞌä rä sobrinu Pablo himbi ntsu nuꞌmu̱ bi ñäui näꞌä ndä de gä soldado, nuꞌi mähyoni hingi ntsu pa gi ꞌñuti märꞌa de rä Zi Dada Jeoba. ¿Te ma dä thogi mu̱ nuꞌi hingi ntsu ꞌne gi sigi gi ꞌñuti märꞌa de rä Zi Dada Jeoba?... ¡Ma dä za gi fatsꞌi ndunthi yä jäꞌi pa dä me̱ꞌtsi rä te pa nzäntho!