Nꞌa rä ñꞌo̱ho̱ himi tsu

NUꞌMU̱ bi xu yä jäꞌi ha rä Xiꞌmhai, ndunthi de gehyu̱ bi me̱fi yä tsꞌo tꞌo̱tꞌe ja ngu rä Kain. Pe bi mꞌu̱ nꞌa rä ñꞌo̱ho̱ näꞌä himi njabu̱. Näꞌä rä ñꞌo̱ho̱ mrä thuhu Enok. Nunä ñꞌo̱ho̱ himi tsu. Gatꞌho nuꞌu̱ märꞌa yä jäꞌi mi ꞌmu̱i ha nuꞌu̱ yä pa rä Enok, xa mñä tsꞌomꞌu̱i. Pe rä Enok näꞌä mi sigi mi pe̱päbi Äjuä.

¿Gi pädi por hanja nuꞌu̱ yä jäꞌi xa mñä tsꞌomꞌu̱i? Beni: ¿Toꞌo bi japäbi rä Adan ꞌne rä Eba dä zi näꞌä rä fruta xki ꞌñembi Jeoba ge hindä zi? Nꞌa rä tsꞌo e̱nxe̱. Rä Mäkä Tꞌofo embäbi rä Zithu. Näꞌä rä tsꞌo e̱nxe̱ ne dä japi gatꞌho yä jäꞌi dä me̱fi näꞌä xä ntsꞌo.

Nꞌa rä pa, rä Zi Dada Jeoba bi ꞌñembäbi rä Enok dä ungä ntꞌo̱de rꞌa yä noya nuꞌu̱ himi ne dä yꞌo̱de yä jäꞌi. Bi ꞌñembi dä mää: “Nꞌa rä pa Äjuä ma dä huati gatꞌho yä tsꞌomꞌu̱i jäꞌi”. Zäi ge yä jäꞌi mänꞌa xi bi nkue̱ ꞌne mi ne dä hyo rä Enok. Hänge rä Enok, pe̱ꞌtsi te hinxä ntsu pa njabu̱ dä xipäbi yä jäꞌi näꞌä ma xä me̱fi Jeoba.

Äjuä himbi hye̱gi dä mꞌu̱ rä Enok ndunthi yä je̱ya ko nuꞌu̱ yä tsꞌomꞌu̱i jäꞌi. Se̱he̱ bi mꞌu̱ 365 yä je̱ya. ¿Por hanja di mäñhu̱ ge bi mꞌu̱i se̱he̱ 365 yä je̱ya? Ngeꞌä mäyaꞌmu̱ yä jäꞌi mänꞌa mi ja yä nzaki ꞌne mi ꞌmu̱i xi ndunthi yä je̱ya hingä ngu mäpaya. ¡Hää; rä Mätusalen näꞌä rä tꞌu̱ rä Enok bi mꞌu̱ 969 yä je̱ya!

Nubye̱, mꞌe̱fa de bi du rä Enok, yä jäꞌi mänꞌa xi bi ntsꞌomꞌu̱i. Rä Mäkä Tꞌofo mää ge “ho̱nse̱ mi o ha yä mfeni dä me̱fi yä tsꞌo tꞌo̱tꞌe, ꞌne gatꞌho ha rä Xiꞌmhai bi ñutsꞌi rä ntsꞌomꞌu̱i”.

¿Gi pädi por hanja bi nja ndunthi pe xi ndunthi yä xuñha ha nuꞌu̱ yä pa rä Enok? Ngeꞌä rä Zithu bi hyoni mänꞌa rä tentasio pa bi japi yä jäꞌi dä me̱fi yä tsꞌo tꞌo̱tꞌe. Ma gä handihu̱ te bi me̱fi rä Zithu.