Dende bi thoki yä tꞌo̱tꞌe asta rä Däta däyꞌe

¿De habu̱ bä ehe mähetsꞌi ꞌne rä Xiꞌmhai? ¿Hanja bi zo̱ho̱ bi nja rä Hyadi, rä Zänä, yä tso̱o̱, ꞌne gatꞌho nuꞌu̱ märꞌa yä tꞌo̱tꞌe ja ha rä Xiꞌmhai? Rä Mäkä Tꞌofo uni rä mpengi pa nuya yä ntꞌani nuꞌmu̱ mää ge gatꞌho yä tꞌo̱tꞌe go bi hyoki Äjuä. Hänge nunä mä mfistꞌofohu̱ fu̱di ko yä ꞌmede de rä Mäkä Tꞌofo habu̱ mää hanja bi thoki gatꞌho yä tꞌo̱tꞌe.

Ma gä pädihu̱ ge nuꞌu̱ yä mu̱di tꞌo̱tꞌe bi hyoki Äjuä, nuꞌu̱ mñä e̱nxe̱ ja nguꞌä. Pe rä Xiꞌmhai bi thoki pa dä mꞌu̱ yä jäꞌi. Hänge Äjuä bi hyoki rä ñꞌo̱ho̱ ꞌne rä ꞌme̱hñä mrä thuhu rä Adan ꞌne rä Eba ꞌne bi ꞌñembi dä mꞌu̱i ha nꞌa rä uädri xa mähotho. Pe nuꞌu̱ himbi yꞌo̱te Äjuä hänge bi mu̱di bi ꞌme̱di yä te.

Dende nuꞌmu̱ bi thoki rä Adan asta mi zo̱ho̱ näꞌä rä Däta däyꞌe, bi thogi 1,656 yä je̱ya. Ha nuꞌu̱ yä je̱ya bi mꞌu̱ ndunthi yä tsꞌomꞌu̱i jäꞌi. Ha mähetsꞌi mi ꞌmu̱ yä e̱nxe̱, rä Zithu ꞌne nuꞌu̱ yä tsꞌo e̱nxe̱. Ha rä Xiꞌmhai bi mꞌu̱ rä Kain ꞌne märꞌa yä tsꞌomꞌu̱i jäꞌi, ꞌnehe rꞌa yä tsꞌo ñꞌo̱ho̱ nuꞌu̱ xi mi pe̱ꞌtsi ndunthi rä tsꞌe̱di. Pe ꞌnehe ha rä Xiꞌmhai bi mꞌu̱ rꞌa yä hojäꞌi... rä Abel, rä Enok, ꞌne rä Noe. Ha nunä RÄ NTHEKE 1 ma gä pädihu̱ de nuya yä jäꞌi ꞌne nuya yä thogi.