¿Hanja ri ꞌñehe gi ꞌñuti ri bätsihu̱?

Nuꞌmu̱ Jeoba bi hyoki rä familia, bi zokuäbi yä dada dä su ꞌne dä tede yä bätsi (Colosenses 3:20). Yä dada ri ꞌñepi dä ꞌñuti yä bätsi pa dä zo̱ho̱ dä mädi Jeoba ꞌne njabu̱ xti te, nuꞌu̱ ma dä bädi dä me̱fi näꞌä xä ñho (2 Timoteo 1:5; 3:15). ꞌNehe, pe̱ꞌtsi te gi pädi te ja ha yä koraso ri bätsi. Pa geꞌä, xa mähyoni gi ꞌñuti nꞌa rä hogä kꞌoi. Pe̱ꞌtsi te go gi mädi mꞌe̱tꞌo rä Noya Äjuä, pa njabu̱ dä za gi ꞌñuti ri bätsi dä mädi ꞌnehe (Salmo 40:8).

1 UMBÄBI RÄ KOMFIANSA RI BÄTSI PA DÄ NE GI ÑÄUI

NÄꞌÄ UDI RÄ MÄKÄ TꞌOFO: «Hñuxu̱ ntꞌo̱de xä ñho näꞌä gi o̱dehu̱. Beñhu̱ xä ñho näꞌä ma gi mäñhu̱» (Santiago 1:19). Nuꞌi gi to̱ꞌmi ge ri bätsi dä xiꞌi gatꞌho näꞌä di mbeni, pe pa geꞌä mähyoni ge nzäntho gi japämäsuhu̱ nuꞌmu̱ hoñꞌäꞌihu̱ pa gi ñäuihu̱. Ora ma gi hñuhu̱ pa gi ñähu̱ ko ri bätsihu̱, ogi ntuhnihu̱ ꞌne ꞌñudihu̱ rä ñhojäꞌi pa njabu̱ dä xiꞌähu̱ gatꞌho näꞌä di mbeni (Santiago 3:18). Mu̱ nuꞌu̱ ri bätsi handi ge ho̱nse̱ ma gi tsu̱i, nuꞌu̱ hingä ma dä ne dä xiꞌi näꞌä ja ha yä koraso. Pe̱ꞌspäbi rä pasensia ꞌne xipäbi njatꞌä hängu gi mädi (Mateo 3:17; 1 Corintios 8:1).

NÄꞌÄ DÄ ZA GI PE̱FI:

• Japämäsu ri bätsi nuꞌmu̱ xiꞌi ge ne gi ñäui

• Ñäui njatꞌä ri bätsi, hingä ho̱nse̱ nuꞌmu̱ ja yä xuñha

2 YꞌO̱TꞌE NTSꞌE̱DI PO GI NTIENDE TE NE DÄ XIꞌÄꞌI RI BÄTSI

NÄꞌÄ UDI RÄ MÄKÄ TꞌOFO: «Näꞌä toꞌo udi ge rä bämhñä nuꞌmu̱ pe̱fi nꞌa rä tꞌo̱tꞌe, ma dä mabi xä ñho» (Proverbios 16:20). Ogi kotho ko ho̱nse̱ näꞌä di xiꞌi ri bätsi, mähyoni xa gi pädi te tsa ꞌne te di mbeni. Rꞌabu̱, yä bäsjäꞌi mää te mää mäske hingä geꞌä xa mäjuäni di mbeni. «Nuꞌmu̱ nꞌa rä jäꞌi thädi nꞌa rä tꞌo̱tꞌe änte de dä yꞌo̱de xä ñho, udi ge rä dondo.» (Proverbios 18:13.) Hänge ogi nkue̱ nguntꞌä (Proverbios 19:11).

NÄꞌÄ DÄ ZA GI PE̱FI:

• Yꞌo̱tꞌe ntsꞌe̱di po gi hyopi dä uadi dä ñä ri bätsi ꞌne ogi ja yä nxaxhni po näꞌä dä xiꞌi

• Beni te ngi tsa ꞌne te mä tꞌo̱tꞌe mi jaꞌi xa mähyoni nuꞌmu̱ ngi pe̱ꞌtsi rä je̱ya ri bätsi

3 PE̱ꞌTSIHU̱ NꞌADÄ RÄ MFENI

NÄꞌÄ UDI RÄ MÄKÄ TꞌOFO: «Yꞌo̱de mä zi tꞌu̱ꞌi, nuꞌu̱ yä tsꞌofo ri dada, ꞌne ogi tsopu̱ yä ntꞌudi ri nänä» (Proverbios 1:8). Yä dada ꞌne yä nänä go ri ꞌñepi dä mända yä bätsi, ngeꞌä njabu̱ xä mänse̱ Jeoba. Hänge tanto rä dada ngu rä nänä ri ꞌñepi dä ꞌñuti yä bätsi dä yꞌo̱de ꞌne dä me̱ꞌtsi rä tꞌekꞌei (Efesios 6:1-3). Yä bätsi di da ngue̱nda nuꞌmu̱ yä dada hingä nꞌatꞌä näꞌä mää ꞌne hingi pe̱ꞌtsi «nꞌadä rä mfeni» (1 Corintios 1:10). Hänge mu̱ hingi mbenihu̱ mähye̱gi de nꞌa rä tꞌo̱tꞌe, ñähu̱ de geꞌä habu̱ hindä yꞌo̱de ꞌne hindä hyantꞌähu̱ ri bätsihu̱ pa hindä ꞌme̱tꞌähu̱ rä tꞌekꞌei.

NÄꞌÄ DÄ ZA GI PE̱FI:

• Jahu̱ nꞌa rä kohi de hanja ma gi umbäbihu̱ yä tsꞌofo ri bätsihu̱

• Mu̱ hingä nꞌatꞌä näꞌä gi beni ko ri ꞌme̱hñä o ri däme de hanja ma gi ꞌñuti ri bätsihu̱, yꞌo̱tꞌe ntsꞌe̱di po gi ntiende por hanja di mbeni njabu̱

4 ÑÄHU̱ HANJA MA GI ꞌÑUTIHU̱ RI BÄTSIHU̱

NÄꞌÄ UDI RÄ MÄKÄ TꞌOFO: «ꞌÑuti rä bätsi te mä ꞌñuu dä gu̱u̱; mäske dä nxita hindä ꞌuengi de geꞌä» (Proverbios 22:6). Mu̱ gi ne gi tede xä ñho ri bätsi, mähyoni gi umbäbi yä tsꞌofo (Salmo 127:4; Proverbios 29:17). Nuꞌu̱ yä tsꞌofo ma gi umbäbi hingä ho̱nse̱ pa gi tsu̱i o gi kastiga, mähyoni gi fatsꞌi dä ntiende por hanja gi häkuäbi dä me̱fi rꞌa yä tꞌo̱tꞌe (Proverbios 28:7). ꞌNehe, ꞌñuti dä mädi ꞌne dä ntiende te ne dä mää nuꞌu̱ yä tsꞌofo uni rä Noya Äjuä (Salmo 1:2). Njabu̱, nuꞌu̱ ma dä zo̱ho̱ dä me̱ꞌtsi nꞌa rä hogä konsiensia (Hebreos 5:14).

NÄꞌÄ DÄ ZA GI PE̱FI:

• Yꞌo̱tꞌe ntsꞌe̱di pa gi fatsꞌi ri bätsi dä hyandi ge xa mäjuäni ꞌmu̱i Äjuä ꞌne ge dä za dä kamfribi

• Fatsꞌi ri bätsi dä hyandi ꞌne dä ꞌuege de nuꞌu̱ yä tsꞌo tꞌo̱tꞌe dä za dä hämpi yä xuñha ngu nuꞌu̱ ja ha rä Internet. ꞌÑuti hanja dä za dä nsu de nuꞌu̱ yä tsꞌo jäꞌi ne dä xaxi pa dä tsꞌombä yä ndoyꞌo