RÄ NTꞌANI 7

¿Te ri ꞌñehe gä pe̱fi mu̱ toꞌo dä yꞌadi gä äꞌmee?

POR HANJA XA MÄHYONI GÄ PÄDI

Näꞌä gi potꞌibye̱ ma gi xofo xudi ndämäni.

**MU̱ GO DI GEꞌI, ¿TE MA GI PE̱FI?**

Imäjinä: Heather ꞌne Mike di nobio ya o̱tꞌe yo nzänä, pe pa Heather ꞌñenä ya di mpädi dende nzäntho. Gatꞌho rä pa di mpe̱hnä mensaje ꞌne di ñä po rä telefono, ꞌne asta ya pädi te ma dä mää nꞌa ngu mänꞌaa. Pe nubye̱ Mike ya hindi komformä ho̱nse̱ dä ñäui Heather.

Asta nubye̱, Mike ho̱nse̱ xä mipäbi rä yꞌe̱ Heather ꞌne rꞌabu̱ xä zu̱ꞌtsi. Heather hingi ne dä me̱fi nꞌa rä tsꞌo tꞌo̱tꞌe pe ꞌnehe di mädi rä nobio. Ngeꞌä ho̱nse̱ Mike xipäbi Heather ge xa mähotho ꞌne hinto mä nꞌa di trata xä ñho nguꞌä. Hänge rꞌabu̱ Heather di mbenise̱: «Ua gä embi ge hää, kabu̱ Mike ꞌne nuga xa di mädihe».

Mu̱ ya gi pe̱ꞌtsi ri je̱ya pa gi pe̱ꞌtsi nꞌa ri nobio, ꞌne mu̱ go di geꞌi Heather, ¿te ma gi pe̱fi?

HÑUDI ꞌNE NTSO̱ꞌMI

Nꞌa rä jäꞌi di usa nꞌa rä pahni xa mähotho pa thuki rä nguu — Toꞌo xä nthäti dä za dä mꞌe̱ngui rä däme o rä ꞌme̱hñä, nunä nꞌa rä regalo xä umbäbi Äjuä yä medinthäti. Pe mu̱ gi mꞌe̱ngui nꞌa rä jäꞌi änte de gi nthäti, nuꞌmu̱ ma gi ꞌñudi ge hingi jamädibi Äjuä po näꞌä regaloꞌä. ꞌÑenä ngu toꞌo dä rꞌai nꞌa rä pahni xa mähotho pe nuꞌi gi usa pa gi thuki ri nguu.

Mu̱ nuꞌi gi hurimu̱i ge hinte gi ja ora hingi jamäsu nuꞌu̱ yä ley ja, ngu rä ley de la gravedad, ꞌne gi nsagi de nꞌa rä arbol ngeꞌä gi ne gi ñhatsꞌi ngu nꞌa rä tsꞌintsꞌu̱, ma gi u̱nse̱ ri ndoyꞌo. Geꞌä ma gi thogi ꞌnehe mu̱ hingi jamäsu nunä tsꞌofo uni rä Mäkä Tꞌofo: «Ogi o̱thu̱ nuꞌu̱ yä tsꞌoki o̱tꞌe yä ꞌñätsa jäꞌi ko yä ndoyꞌo» (1 Tesalonicenses 4:3, TNM).

¿Te ma dä thogi mu̱ hingi jamäsu nunä tsꞌofo? Rä Mäkä Tꞌofo enä: «Toꞌo o̱tꞌe nꞌa rä tsꞌoki ko rä ndoyꞌo, o̱tꞌe nꞌa rä tsꞌoki kontra rä ndoyꞌose̱» (1 Corintios 6:18, TNM). ¿Te ne dä mää nunä tsꞌofo?

Rꞌa yä jäꞌi xä imbestiga te thogi ko nuꞌu̱ yä bäsjäꞌi ꞌme̱ngui yä jäꞌi änte de dä nthäti, ꞌne nuꞌu̱ xä dini ge kasi gatꞌho nuꞌu̱ yä bäsjäꞌiꞌu̱ thogi rꞌa de nuya yä xuñha:

YÄ U̱MFENI. Mꞌe̱fa di arrepenti ꞌne dä nehmä hinxä me̱fi njabu̱.
TSO̱HO̱ YÄ DUDA. Nꞌa ngu mänꞌaa pe̱ꞌtsi yä duda ꞌne rꞌabu̱ enä: «Zäi ge hingä ho̱nse̱gi xtä äꞌmee».
DI MꞌE̱DI RÄ TꞌEKꞌEI. Ndunthi yä nxutsi honi nꞌa rä ñꞌo̱ho̱ pa dä su, hingä pa dä probechatho de geꞌu̱. ꞌNe ndunthi yä tsꞌu̱ntꞌu̱ hindi ho nuꞌu̱ yä nxutsi nguntꞌä embäbi hää nꞌa rä tsꞌu̱ntꞌu̱ nuꞌmu̱ nzofo.
Ogi pumfri: Mu̱ gi mꞌe̱ngui nꞌa rä jäꞌi änte de gi nthäti, ma gi ꞌñudi ge gi u̱tsase̱ ri ndoyꞌo (Romanos 1:24). Ri ndoyꞌo xa ja ndunthi rä muui, ¡ogi tsꞌoni!

ꞌÑudi ge gi pe̱ꞌtsi rä tsꞌe̱di pa gi ze̱ti ꞌne ogi ꞌme̱ngui nꞌa rä jäꞌi änte de gi nthäti (1 Tesalonicenses 4:3, TNM). Mu̱ gi to̱ꞌmi asta näꞌä pa xki nthäti ma dä za gi ꞌmu̱i ko rä johya ꞌne hingä ma gi ꞌmu̱i ko yä u̱mfeni, nixi yä duda ꞌne ma gi pe̱ꞌtsi nꞌa rä konsiensia xä ntꞌaxi. Mu̱ gi jabu̱, hingä ma gi thogi nuꞌu̱ yä xuñha pe̱ꞌtsi toꞌo ꞌme̱ngui yä jäꞌi änte de dä nthäti (Proverbios 7:22, 23; 1 Corintios 7:3).

¿TE GI MBENI?

Mu̱ toꞌo xa mäjuäni di mäꞌi, ¿hänge nzäntho ma dä hyoni ri ñho ꞌne nunka ma dä u̱ñꞌäꞌi ri mfeni nixi ri ndoyꞌo?
Mu̱ toꞌo xa mäjuäni turämu̱i po geꞌi, ¿hänge nunka ma dä yꞌaꞌi gi pe̱fi nꞌa rä tꞌo̱tꞌe näꞌä dä tsꞌoni ri ntsitsꞌi ko Äjuä? (Hebreos 13:4.)

PA YÄ NXUTSI

Ndunthi yä tsꞌu̱ntꞌu̱ enä ge nuꞌu̱ nunka ma dä nthäti ko nꞌa rä nxutsi näꞌä ya xä mꞌe̱ngui. ¿Por hanja? Ngeꞌä nuꞌu̱ ne dä nthäti ko nꞌa rä nxutsi näꞌä hinto xä mꞌe̱ngui.

¡Zäi ge asta di rꞌaꞌi rä kue̱ gi pädi njabu̱! Pe mu̱ xkä da ngue̱nda, rä cine ꞌne rä telebision udi ge hinte mä tsꞌoki pe̱fi yä bäsjäꞌi mu̱ dä mꞌe̱ngui nꞌa rä jäꞌi mäske hinxä nthätui. ꞌNehe rä cine ꞌne rä telebision udi ngu nꞌa rä dibersio nuꞌu̱ yä tꞌo̱tꞌeꞌu̱ ꞌne ge hinte mä xuñha bi hä. Rꞌabu̱ asta udi ge mu̱ dä me̱fi njabu̱ nꞌa rä bäsjäꞌi, uti hängu di mädi rä nobia o rä nobio.

¡Pe nuꞌi ogi kamfribiꞌu̱! Mu̱ nꞌa rä tsꞌu̱ntꞌu̱ ne dä kombenseꞌi pa gi mꞌe̱ngui, näꞌä di mbeni ho̱nse̱ po geꞌä ꞌne hingi honi ri ñho (1 Corintios 13:4, 5).