«Hyopi dä ehe ri Tsꞌu̱tꞌhui»

Jeoba xä promete: «Ya hingä ma dä nja yä tsꞌoni, yä u̱gi, yä hñeni ꞌne ya hinto ma dä du. Ma gä thuki gatꞌho ri gidahu̱. Ya hinto ma dä beni nuꞌu̱ yä tsꞌo tꞌo̱tꞌe mi ja mä mꞌe̱tꞌo».

Rä Zi Dada Jeoba bi hñutsꞌi Adán ꞌne Eva ha rä jardin de Edén pa xä mꞌu̱i temäꞌentho. Nuꞌu̱ ho̱nse̱ mi debe xä xo̱kämbeni rä Zi Dada Jeoba, ꞌne xä me̱ꞌtsi ndunthi yä bätsi pa xä ñuꞌtsi rä Xiꞌmhai. Mäske Adán ꞌne Eva himbi yꞌo̱te rä Zi Dada Jeoba, näꞌä hinxä pumfri näꞌä mi mbeni dä me̱fi dende ri mu̱di. Ha nunä mfistꞌofo xtä handihu̱ ge rä Zi Dada Jeoba nzäntho di kumpli näꞌä di promete. Po mäde de rä Tsꞌu̱tꞌhui ma dä hä ndunthi yä jäpi ha rä Xiꞌmhai ꞌne njabu̱ ma dä kumpli näꞌä bi prometebi Abrahán.

Mänꞌitꞌho, ma dä mꞌe̱di yä tsꞌomꞌu̱i jäꞌi, rä Zithu ꞌne yä u̱xjua. Gatꞌho yä jäꞌi ma dä xo̱kämbeni ho̱nse̱ rä Zi Dada Jeoba. Ya hingä ma gä hñenihu̱, nixi hingä ma gä tuhu̱. Kada nꞌa rä pa, mänꞌa ma dä nja mä nzakihu̱ ꞌne xa ma gä ꞌmu̱ihu̱ ko rä johya. Gatꞌho rä Xiꞌmhai ma dä nheki xa mähotho ꞌne ma dä nja ndunthi te gä tsihu̱. Gatꞌho nuꞌu̱ yä mbängä zuꞌue ma dä mänxo ꞌne asta ma dä za gä ñꞌenihu̱ kongeꞌu̱.

Imäjinä hängu rä johya ma gä sentihu̱, nuꞌmu̱ rä Zi Dada Jeoba dä gu̱tsꞌi nuꞌu̱ mä jäꞌihu̱ xä du. ꞌNehe, ma dä za gä handihu̱ xti nangi de rä du Abel, Noé, Abrahán, Sara, Moisés, Rut, Ester ꞌne David. Nuꞌu̱ ꞌnehe ma dä maxkägihu̱ pa gä hokihu̱ de nunä rä Xiꞌmhai nꞌa rä luga xa mähotho. Hyaxtho ma gä pe̱ꞌtsihu̱ ndunthi rä ꞌme̱fi.

Rä Zi Dada Jeoba ne ge nuꞌi ꞌnehe gi ꞌmu̱i ha rä Paraiso. Xti zo̱ho̱ näꞌä rä paꞌä, mänꞌa ma gä pädihu̱ xä ñho rä Zi Dada Jeoba. Hänge dende nubye̱, ¡yꞌo̱tꞌe ntsꞌe̱di po gi joni ko rä Zi Dada Jeoba ꞌne nunka gi ꞌuege de geꞌä!