Rä apostol Juan bi hyandi rꞌa yä visión

Nuꞌmu̱ rä apostol Juan mi ꞌmu̱i ngu nꞌa rä yꞌo fadi ha rä isla de Patmos, bi me̱ꞌtsi 16 yä visión habu̱ bi hyandi nuꞌu̱ yä tꞌo̱tꞌe ma dä thogi xudi ndämäni. Ha nuꞌu̱ yä visión bi me̱ꞌtsi, bi hyandi hanja ma dä nsunda rä thuhu rä Zi Dada Jeoba, hanja ma dä ehe rä Tsꞌu̱tꞌhui ꞌne hanja ma dä tꞌo̱tꞌe rä bolunta nuua ha rä Xiꞌmhai ja ngu ha mähetsꞌi.

Ha nꞌa de nuꞌu̱ yä visión, rä apostol Juan bi hyandi ge rä Zi Dada Jeoba mi hudi ha rä thuhni de gä ndä. Nthetsꞌi de geꞌä bi hyandi 24 yä ansiano. Nuꞌu̱ mi hee yä tꞌaxä dutu ꞌne xki hñutsꞌi nꞌa rä koronä ha yä ñäxu. ꞌNe habu̱ mi hudi Jeoba, mi po̱ni rꞌa yä tsibi ngu yä hue̱i ꞌne mi ntꞌo̱de rꞌa yä ruido ngu yä ngani. Nuꞌu̱ 24 yä ansiano bi ndandiñähmu ante rä Zi Dada Jeoba ꞌne bi xo̱kämbeni. Ha mä nꞌa rä visión, rä apostol Juan bi hyandi nꞌa rä däta muntsꞌi yä jäꞌi de gatꞌho yä dähni, yä hnini ꞌne yä idioma. Gatꞌhoꞌu̱ mi xo̱kämbeni rä Zi Dada Jeoba. Rä Tꞌu̱kä De̱ti o rä Hesu, go geꞌä tsitsꞌi nuꞌu̱ yä jäꞌiꞌu̱ habu̱ ja näꞌä rä dehe uni rä te. Ha mä nꞌa rä visión, rä apostol Juan bi hyandi ge rä Hesu bi mu̱di bi mända ko nuꞌu̱ mä 24 yä ansiano. Ha mä nꞌa de nuꞌu̱ yä visión, rä apostol Juan bi hyandi ge rä Hesu di ntunkui rä Zithu ꞌne nuꞌu̱ yä u̱xjua. Rä Hesu bi ntäte ꞌne bä fo̱te rä Zithu ꞌne nuꞌu̱ yä u̱xjua pa nuua ha rä Xiꞌmhai.

Mꞌe̱fa, rä apostol Juan bi hyandi ge rä Tꞌu̱kä De̱ti mi to̱ge ha rä tꞌo̱ho̱ Sion ko nuꞌu̱ 144.000. ꞌNehe bi hyandi nꞌa rä e̱nxe̱ näꞌä mi hñätsꞌi po gatꞌho rä Xiꞌmhai ꞌne mi enä: «Nsundahu̱ Äjuä ꞌne ꞌñeꞌspäbihu̱ rä nsu».

Ha mä nꞌa rä visión, bi hyandi hanja rä Hesu ꞌne rä ejército bi huati gatꞌho nuꞌu̱ yä tsꞌo tꞌo̱tꞌe xä me̱fi rä Zithu nuua ha rä xiꞌmhai. Nunä gerra fädi ngu Armagedón. Ha näꞌä rä gäxä visión bi me̱ꞌtsi rä apostol Juan, bi hyandi hanja tanto ha mähetsꞌi ngu ha rä Xiꞌmhai ja nꞌa rä mꞌu̱i temäꞌentho. ꞌNehe bi hyandi hanja rä Hesu bi huati pa nzäntho rä Zithu ꞌne gatꞌho nuꞌu̱ toꞌo mi ꞌmu̱i de rä lado. Mꞌe̱fa de geꞌä, bi hyandi ge tanto yä jäꞌi ngu yä e̱nxe̱; di xo̱kämbeni ho̱nse̱ rä Zi Dada Jeoba ꞌne di nsundabi rä thuhu.