Rä Xiꞌmhai ma dä yopä uädri

NÄꞌÄ rä gäxä mfistꞌofo de rä Mäkä Tꞌofo rä thuhu rä Apocalipsis go bi yꞌofo rä apostol Juan. Nunä mfistꞌofo umbä rä humu̱i gatꞌho rä mexiꞌmhai. Hutsꞌi rꞌa yä tꞌi habu̱ rä Juan bi hyandi näꞌä ma dä uadi dä me̱fi Jeoba.

Ha rä mu̱di tꞌi, bi hyandi hanja rä Hesu ya xki nuhu de rä du, mi nupä yä mfeni ꞌne mi umbä yä tsꞌofo nuꞌu̱ yä de̱ni. Ha rä yoho rä tꞌi, rä Juan bi hyandi näꞌä rä mäkä hudi Äjuä ꞌne bi hyandi hanja yä e̱nxe̱ mi nsunda Jeoba.

Mientra ri joni näꞌä rä pa habu̱ ma dä huati rä ꞌme̱fi Äjuä, rä apostol Juan ꞌnehe bi hyandi hanja rä Tꞌu̱kä De̱ti Äjuä (Ñhesukristo) bi hñäni nꞌa rä he̱ꞌmi xki mpantsꞌi ko yoto yä seyo, bi xoꞌtsi nuꞌu̱ goho yä mu̱di yä seyo ꞌne bi bo̱ni goho yä to̱ge ko yä fani. Näꞌä rä mu̱di rä to̱ge mi geꞌä rä Hesu xki tꞌumbä rä koronä de gä Ndä ꞌne mi to̱ge nꞌa rä tꞌaxä fani. Nuꞌu̱ mä hñuu yä to̱ge mi to̱ge rꞌanꞌañꞌo yä kolo nuꞌu̱ yä fani. Gehya ri bo̱ni yä dängä tuhni, yä thuhu ꞌne yä dängä ñheni nuꞌu̱ udi ge ma dä dämä uadi nuyu̱ yä gäxä pa di ꞌmu̱ihu̱. ꞌNepu̱ rä Kristo bi xoꞌtsi näꞌä ä rä yoto rä seyo, ꞌne bi ntꞌo̱de yoto yä trompeta nuꞌu̱ udi ge ma dä ꞌñepu̱ ndunthi yä kastigo Äjuä. Gehya bi japi bä ehe mä yoto yä plaga, geꞌä ri bo̱ni rä kue̱ Äjuä.

ꞌNepu̱, rä Juan bi hyandi hanja bi mꞌu̱i nꞌa rä zi bätsi mrä metsi, geꞌä ri bo̱ni näꞌä rä Tsꞌu̱tꞌhui Äjuä bä fu̱di bi mända ha mähetsꞌi. Hänge bä nja nꞌa rä dängä tuhni, rä Zithu ꞌne nuꞌu̱ yä u̱xjua brä jui de ha mähetsꞌi ꞌne brä fo̱te pa ha rä Xiꞌmhai. Nubye̱ bi ntꞌo̱de toꞌo bi ñä xi ntsꞌe̱di ꞌne bi ꞌñenä: «Huekäte nuꞌähu̱ gi ꞌmu̱hu̱ ha rä xiꞌmhai». ¿Por hanja? Rä Zithu tsu̱di ndunthi rä kue̱ ngeꞌä pädi ge tsꞌu̱tho nuꞌu̱ yä pa kohibi (Apocalipsis 12:12, RN).

Rä Juan bi yo hyandi hanja rä Hesu bi yo nheki ha mähetsꞌi ngu nꞌa rä tꞌu̱kä de̱ti, ꞌne ha rä hyo mi ꞌmai 144,000 yä jäꞌi xkri huahni de ha rä xiꞌmhai, geꞌu̱ ma «dä ndäui» rä Hesu. Ha rä mfistꞌofo Apocalipsis ja gehni di pädihu̱ ge nuꞌu̱ 144,000 geꞌu̱ ꞌnehe yä bätsi «näꞌä rä ꞌme̱hñä» mängä ha rä Génesis 3:15 (Apocalipsis 14:1; 20:6).

ꞌNepu̱ nuꞌu̱ yä tsꞌu̱tꞌhui de ha rä Xiꞌmhai ma dä mhuntsꞌi ha rä Armäjedon «pa dä ñꞌo̱tꞌä tuhniꞌu̱ [ha] rä pa [...] Äjuä Nuꞌä toꞌo pe̱ꞌtsä gatꞌho rä tsꞌe̱di». Nuꞌu̱ ma dä ntunkui rä Hesu, geꞌä rä to̱ge ko rä tꞌaxä fani xki hyandi rä Juan, ꞌne ma dä mfaxhui yä e̱nxe̱. ¿Hanja ma dä uadi nunä rä tuhni? Rä Hesu ma dä huati gatꞌho nuꞌu̱ yä tsꞌu̱tꞌhui ja ha rä xiꞌmhai ꞌne ma dä gotꞌi rä Zithu. ꞌNepu̱ rä Hesu ꞌne nuꞌu̱ 144,000 ma dä mända ha rä Xiꞌmhai 1,000 yä je̱ya. Sti uadi nuꞌu̱ yä je̱ya rä Zithu ma drä huati pa nzäntho (Apocalipsis 16:14; 20:4).

Rä Hesu ꞌne nuꞌu̱ 144,000 ma dä mända nꞌa mꞌo yä je̱ya, ¿te ma dä me̱fi po nuꞌu̱ yä hojäꞌi? Rä Juan mää: «ꞌNe Äjuä ma dä dukuäbi gatꞌho yä gidaꞌu̱. Ya hindä nja rä du, ni yä tsꞌoni, ni yä dumu̱i, nixi yä u̱gi, ngeꞌä nu yä tꞌo̱tꞌe mi ja mä mꞌe̱tꞌo, nubya ya otho» (Apocalipsis 21:4). ¡Rä Xiꞌmhai ma dä yopä uädri!

Rä mfistꞌofo Apocalipsis njabu̱ huadi di ungä ntꞌo̱de näꞌä mängä ha rä Mäkä Tꞌofo: ko näꞌä rä Tsꞌu̱tꞌhui rä Mesia, Jeoba ma dä nsunda rä thuhu ꞌnehe ma dä ꞌñudi pa nzäntho ge se̱he̱ꞌä ri ꞌñepi dä mända.

(Ehe ha rä mfistꞌofo Apocalipsis.)