Xi nuga, ¿ya xtä ñhoki?
Xi nuga, ¿ya xtä ñhoki pa gä mpublicador?
Tal vez nuꞌi ya dä za gi mpublicador...
... mu̱ gi nzäi gi nxadise̱ rä Biblia, mu̱ gi xatuäbi rä Zi Dada Jeoba ꞌne gi ntini ha yä mhuntsꞌi.
... mu̱ gi kamfri näꞌä xkä pädi de rä Biblia ꞌne ja ri ganä gi petuäbi märꞌa yä jäꞌi.
... mu̱ gi mädi rä Zi Dada Jeoba ꞌne gi huahni ngu ri amigo nuꞌu̱ yä jäꞌi mädi ꞌnehe.
... mu̱ xkä ꞌuege de yä politika ꞌne de nuꞌu̱ yä hyate relijion ꞌne ya hinte mä ntsitsꞌi gi pe̱ꞌtsi kongeꞌu.
... mu̱ gi ne gi ntestigo rä Jeoba ꞌne gi ꞌmu̱i ja ngu di mända rä Biblia.
Mu̱ gi handi ge ya xkä ñhoki pa gi predika ko rä mhuntsꞌi, näꞌä toꞌo rꞌaꞌi ri curso de rä Biblia ma dä xipäbi yä anciano, ꞌnepu̱ nuꞌu̱ ma dä ñä kongeꞌi pa dä hyandi ꞌne dä xiꞌi mu̱ ya gi kumpli yä rekisito.
Xi nuga, ¿ya xtä ñhoki pa gä nxixtehe?
Tal vez nuꞌi ya dä za gi nxixtehe...
... mu̱ ya grä publicador.
... mu̱ gi o̱tꞌe ntsꞌe̱di po gi predika njatꞌä.
... mu̱ gi o̱tꞌe ntsꞌe̱di po gi apoya näꞌä «rä ꞌme̱go, rä hogä yꞌo̱de ꞌne xa ja rä mfeni» ꞌne mu̱ gi jamäsu nuꞌu̱ yä instrucción uni (Mateo 24:45-47, TNM).
... mu̱ ya gä xatuäbi rä Zi Dada Jeoba ꞌne gä xipäbi ge gi umbäbi ri te pa gi pe̱päbi pa gatꞌho rä bida.
Mu̱ gi handi ge ya xkä ñhoki pa gi nxixtehe, näꞌä toꞌo rꞌaꞌi ri curso de rä Biblia ma dä xipäbi yä anciano, ꞌnepu̱ nuꞌu̱ ma dä ñä kongeꞌi pa dä hyandi ꞌne dä xiꞌi mu̱ ya gi kumpli yä rekisito.