Hanja dä za gä uñhu̱ ntꞌo̱de mänꞌa xä ñho: ma gä udihu̱ ge di mädihu̱ yä zi jäꞌi

Por hanja xa mähyoni: Rä Hesu bi ꞌñudi ge mi mädi ꞌne mi turämu̱i po kada nꞌa rä jäꞌi. Nꞌa rä pa, rä Hesu bi da ngue̱nda ꞌne bi jamäsu näꞌä mi senti nꞌa rä zi jäꞌi näꞌä mi gone ꞌne mi gogu. Hänge pa bi yꞌo̱the bi zitsꞌi nꞌambu̱se̱, habu̱ hinxä hyandi yä jäꞌi (Mar. 7:31-35). ꞌNehe, bi ꞌñudi ge mi hueki nuꞌu̱ yä de̱ni, ꞌne himbi yꞌapäbi dä me̱fi näꞌä himi tsa dä yꞌo̱tꞌe, nixi himbi japi bi u̱ yä ñä ko ndunthi yä ntꞌudi (Juan 16:12). ꞌNe mäske nubye̱ bi ꞌmu̱i ha mähetsꞌi, näꞌä di sigi udi rä mhäte (2 Tim. 4:17). Nuju̱ yä de̱nigihu̱ rä Hesu, hänge mähyoni gä de̱mbäbihu̱ rä mꞌu̱i (1 Ped. 2:21; 1 Juan 3:16, 18). ꞌNehe, mänꞌa ma dä za gä umbäbihu̱ ntꞌo̱de yä zi jäꞌi, mu̱ gä jamäsuhu̱ te thogi, te di senti, ꞌne te tupäbi yä mu̱i. Yä zi jäꞌi mänꞌa ma dä ne dä yꞌo̱de, mu̱ dä hyandi ge xa mäjuäni di tumämu̱ihu̱ po geꞌu̱, ꞌne hingä ho̱nse̱ di ne gä tsokuäbihu̱ yä he̱ꞌmi.

Te dä za gä pe̱fihu̱:

Ñhoki xa xä ñho. Ogi tsu, ꞌñudi rä johya ꞌne rä tꞌekꞌei.
Hyandi xä ñho te thogi. ¿Pe̱ꞌtsi yä zi bätsi näꞌä jäꞌi gi umbä ntꞌo̱de? ¿Di ho dä me̱ꞌtsi yä planta, yä do̱ni o yä zuꞌue? ¿Gi da ngue̱nda ge ya pe̱ꞌtsi nꞌa rä relijion? Mu̱ ya gä hyandi te tupäbi rä mu̱i, ¿dä za gi ñäui de geꞌu̱ pa dä za gi umbäbi ntꞌo̱de?
Yꞌambäbi te di mbeni, jamäsu näꞌä dä xiꞌi, ꞌne hyopi dä uadi dä mää näꞌä di mbeni. Hyandi näꞌä jäꞌi gi ñäui pa gi jamäsu näꞌä dä xiꞌi ꞌne ogi ñhani nꞌambu̱. Umbäbi njamädi nuꞌmu̱ bi xiꞌi te di mbeni. Mu̱ bi mää nꞌa rä noya xä ñho, xipäbi ge xi bi hogi näꞌä bi mää. Pe mu̱ hinä, ogi honi gi ntuhni kongeꞌä.
Paati ri presentasion. Rꞌabu̱ mähyoni gi paati ri presentasion pa dä za gi ñä de nuꞌu̱ yä tꞌo̱tꞌe tupäbi rä mu̱i näꞌä jäꞌi gi umbäbi ntꞌo̱de. Hindä jaꞌi xä ñhei ngeꞌä ha yä tratado, yä foyeto, ꞌne yä rebista hutsꞌi ndunthi yä tema. Mu̱ näꞌä jäꞌi hindä za dä ñä kongeꞌi ngetꞌho gi handi ge otho ndunthi rä tiempo, nuꞌmu̱ uni ho̱nse̱ nꞌa zi tꞌu̱kä presentasion.

Pe̱fi nuya yä tsꞌofo nunä zänä:

Ensaya hanja dä za gi paati ri presentasion nuꞌmu̱ gi ungä ntꞌo̱de. Ensaya nuꞌmu̱ gi pe̱ꞌtsi ri Mhuntsꞌi de gä Familia, o nuꞌmu̱ gi po̱ni gi ungä ntꞌo̱de, yꞌapäbi nꞌa publikador dä maxꞌäꞌi.
Näꞌä ku ma dä gu̱ki rä grupo pa dä ungä ntꞌo̱de, dä hogi dä thoꞌtsi rꞌa yä presentasion o dä mää mänꞌaki nuya yä tsꞌofo huxkua de hanja dä za gä udihu̱ rä mhäte po nuꞌu̱ yä zi jäꞌi di umbäbihu̱ ntꞌo̱de.