Hanja dä za gä uñhu̱ ntꞌo̱de mänꞌa xä ñho: habu̱ ja yä negosio

Por hanja xa mähyoni. Koꞌmu̱ ndunthi yä jäꞌi po̱ni hyaxtho di mpe̱fi, di ja mꞌe̱di dä tꞌumbäbi ntꞌo̱de ha yä ꞌme̱fi. Mu̱ gä uñhu̱ ntꞌo̱de ha yä negosio ma dä hänkägihu̱ ndunthi rä johya ꞌne dä za gä tinihu̱ nuꞌu̱ yä jäꞌi ne dä bädi de Äjuä. Ndunthi de geꞌu̱ thädi ko rä tꞌekꞌei ora tso̱ni yä jäꞌi ha yä negosio. Hänge yä publikador pe̱ꞌtsi te dä ñhoki ꞌne dä ñhee xä ñho (2 Cor. 6:3). Po rängeꞌä rä superintendente de servicio pe̱ꞌtsi te dä hyandi kada hängu mä pa ꞌne toꞌo di ungä ntꞌo̱de ha yä negosio.

Te dä za gä pe̱fihu̱:

Hyoki nꞌa rä tꞌu̱kä presentasion. Mu̱ gä häkuäbihu̱ ndunthi rä tiempo nuꞌu̱ toꞌo di mpe̱fi, dä za ge pa mä nꞌa rä mꞌiki ya hindä ne dä ñä kongekhu̱.
Huahni nꞌa rä ora nuꞌmu̱ ja yä tiempo. Ja ngu nuꞌmu̱ ja xoki yä negosio ꞌne joꞌo ndunthi yä dai.
Mu̱ dä za, ñäui mꞌe̱tꞌo näꞌä rä enkargado. ꞌÑudi rä tꞌekꞌei ꞌne rä ñhojäꞌi. Dä za gi ꞌñembi: «Di ze̱njuahe yä zi jäꞌi habu̱ di mpe̱fi ngeꞌä xä ñhei gä tinihe ha yä nguu». Ñäui ho̱nse̱ nꞌa zi tu̱i ꞌne tsokuäbi nꞌa rä tratado, nꞌa rä rebista o mä nꞌa rä he̱ꞌmi. Pa hindä ꞌñenä ge di pahu̱ yä he̱ꞌmi, mänꞌa dä hogi hingi xipäbi de yä donäsio, ho̱nse̱ mu̱ dä ñꞌani habu̱ di hähu̱ rä bojä pa di thoki nuꞌu̱ yä he̱ꞌmi di uñhu̱.
Mu̱ näꞌä enkargado rä hojäꞌi, yꞌapäbi nse̱ki pa gi umbäbi ntꞌo̱de nuꞌu̱ märꞌa yä jäꞌi di mpe̱fi ha näꞌä negosio. ꞌNehe dä hogi gä adihu̱ nse̱ki pa gä tsogihu̱ rꞌa yä he̱ꞌmi ha nuꞌu̱ yä negosio pe̱ꞌtsi nꞌa rä sala habu̱ to̱ꞌmi yä jäꞌi.
Jamäsu hämꞌu̱ dä za gi nzofo. Ja ngu nuꞌmu̱ ja te pe̱fi o nuꞌmu̱ tso̱ho̱ yä dai, dä hogi gi to̱ꞌmi asta dä uadi pa gi nzofo.

Pe̱fi nuya yä tsꞌofo nunä zänä:

Ha ri Mhuntsꞌi de gä Familia, nsaya nꞌa rä presentasion näꞌä dä za gi usa nuꞌmu̱ xki ungä ntꞌo̱de ha yä negosio.