Pa gä udihu̱ mänꞌa xä ñho di ja mꞌe̱di gä ñhokihu̱

Yoho yä jäꞌi bi yꞌambäbi rä Hesu te xä za xä me̱fi pa xä ñhani rä te pa nzäntho, ha nuꞌu̱ yoho yä mꞌiki rä Hesu bi dädi mä nꞌañꞌo, ¿por hanja? Ngeꞌä näꞌä mi handi te mi pädi ꞌne te mi mbeni kada nꞌa de geꞌu̱ (Luc. 10:25-28; 18:18-20). Njabu̱ ꞌnehe, mäske yä di pädihu̱ xä ñho näꞌä temä ma gä nxadihu̱ ko kada nꞌa de nuꞌu̱ mä estudiohu̱, mähyoni mꞌe̱tꞌo gä ñhokihu̱ ꞌne gä mbenihu̱ te pädi ꞌne te di mbeni kada nꞌa de geꞌu̱. Dä hogi gä ñꞌanise̱hu̱, ¿te di japi xä ñhei dä ntiende o dä gamfri? ¿Ndañꞌä de nuꞌu̱ testo ehe ha yä parrafo ma gä hetihe? ¿Hängu yä parrafo ma gä nxadihe? Rꞌabu̱ dä hogi gä honihu̱ nꞌa rä kꞌoi, ꞌne rꞌa yä ntꞌani pa gä fatsꞌi mä estudiohu̱ dä ntiende nuꞌu̱ yä ntꞌudi de rä Mäkä Tꞌofo. Ho̱nse̱ rä Zi Dada Jeoba dä za dä japi ge nuꞌu̱ mä estudiohu̱ dä zo̱ho̱ dä me̱päbi rä boluntaꞌä, hänge mähyoni gä apäbihu̱ dä jäpi nuꞌu̱ mä estudiohu̱ ꞌne gatꞌho näꞌä di pe̱hu̱ po gä fatsꞌihu̱ (1 Cor. 3:6; Sant. 1:5).