Ma gä usa mä tehu̱ pa gä pe̱päbihu̱ Jeoba

Rä te nunä nꞌa rä regalo xa mähotho. Näꞌä forma hanja di usahu̱ mä tehu̱ kada nꞌa rä pa, di udihu̱ mu̱ di numäñhohu̱ nunä rä regalo. Gatꞌho yä testigo rä Jeoba di o̱tꞌe ntsꞌe̱di po dä usa rä mfädi pa dä me̱päbi rä Zi Dada Jeoba, näꞌä toꞌo xä rꞌakägihu̱ rä te (Sl 36:9; Rev 4:11). Pe rꞌabu̱, po nuꞌu̱ yä xuñha di thogihu̱ di pumfrihu̱ gä usa gatꞌho mä tehu̱ pa gä pe̱päbihu̱ rä Zi Dada Jeoba (Mr 4:18, 19). Hänge mähyoni gä ñꞌanise̱hu̱: «¿Di usa gatꞌho mä mfädi pa gä pe̱päbi Jeoba? (Os 14:2). ¿Hokägi mä ꞌme̱fi o mä carrera gä pe̱päbi Jeoba ngu ri ꞌñehe? ¿Te mä meta di pe̱ꞌtsi pa gä pe̱päbi Jeoba? ¿Hanja dä za gä pe̱päbi mä ndunthi Jeoba?». Mu̱ gi handi ge dä za gi pe̱päbi mä ndunthi Jeoba, yꞌapäbi rä mfatsꞌi ꞌne ja nuꞌu̱ yä mpadi di ja mꞌe̱di. Otho rä duda, mu̱ kada nꞌa rä pa di usa mä tehu̱ pa gä pe̱päbihu̱ Jeoba, ¡näꞌä ma dä hänkägihu̱ ndunthi yä jäpi ꞌne rä johya! (Sl 61:8.)

HYANDIHU̱ RÄ BIDEO USA RI MFÄDI PA GI PE̱PÄBI JEOBA. MꞌE̱FA THÄDIHU̱ NUYA YÄ NTꞌANI:

• ¿Por hanja hingä nꞌa rä hogä desision gä usa mä mfädihu̱ pa nunä xiꞌmhai, habu̱ go di mända rä Zithu? (1Jn 2:17.)

• ¿Te mä jäpi di häni nuꞌu̱ toꞌo di usa yä te pa di pe̱päbi Jeoba?

• De nuꞌu̱ yä ꞌme̱fi di tꞌo̱tꞌe ha rä hnini Jeoba, ¿habu̱ gi hohmä gi mfaxte pa gi usa näꞌä rä mfädi gi pe̱ꞌtsi?