Hanja dä za gä uñhu̱ ntꞌo̱de mänꞌa xä ñho: Pädi gi yꞌofo yä karta

POR HANJA XA MÄHYONI. Rä mu̱di rä Corintios geꞌä nꞌa de nuꞌu̱ 14 yä karta bi yꞌofo rä apostol Pablo pa bi nupäbi yä mfeni yä ku. Gä ofohu̱ yä karta pe̱ꞌtsi ndunthi yä bentaja: toꞌo ofo rä karta tsa dä mbeni xä ñho te ma dä yꞌofo ꞌne te mä noya ma dä usa, ꞌne toꞌo ma dä hñäni rä karta ma dä za dä hñeti ora go dä ne. Po mäde de yä karta dä za gä predikabihu̱ mä familiahu̱ o nuꞌu̱ yä jäꞌi hingi tsa gä handihu̱ pa gä ñäuihu̱. Por ejemplo, rꞌabu̱ xä ñhei gä tsu̱dihu̱ mänꞌaki nuꞌu̱ yä jäꞌi ya xtä predikabihu̱ änte o nuꞌu̱ yä jäꞌi mꞌu̱i ha yä nuꞌu̱ yä edificio o ha nuꞌu̱ yä nguu habu̱ xä thutsꞌi toꞌo dä su pa hinto dä thogi. ¿Te debe gä o̱thu̱ ngue̱nda änte de gä opäbihu̱ nꞌa rä karta nꞌa rä jäꞌi näꞌä hindi konosehu̱?

TE DÄ ZA GÄ PE̱FIHU̱

• 

  Ora ma gi yꞌofo nꞌa rä karta, imäjinä ge gi ñäui näꞌä jäꞌi. Fu̱di gi xipäbi toꞌoꞌi ꞌne por hanja gi opäbi näꞌä karta. Mꞌe̱fa dä za gi yꞌo̱päbi nꞌa rä ntꞌani ꞌne gi xipäbi de näꞌä luga di pe̱ꞌtsihu̱ ha Internet. ꞌNehe dä za gi xipäbi ge di unihu̱ yä curso de rä Mäkä Tꞌofo ha yä nguu yä zi jäꞌi o dä za gi no̱ni nꞌa de nuꞌu̱ yä ntheke ehe ha nuꞌu̱ yä publicación di usahu̱ pa di unihu̱ yä curso. Ha rä sobre dä za gi yꞌe̱ntꞌi ꞌnehe nꞌa rä tarjeta de contacto, nꞌa rä tratado o nꞌa rä imbitasio.

• Ogi ofo xä ndunthi. Mu̱ gi ofo xa ndunthi yä noya, näꞌä jäꞌi dä za dä mfada ꞌne nixi ma dä hñeti xo̱ge rä karta (hyandi näꞌä rä karta ehe de gä ejemplo).

• Änte de gi pe̱hni nꞌa rä karta, hyandi mꞌe̱tꞌo mu̱ o rä ꞌñuu, mu̱ gä ofo xä ñho, mu̱ di tꞌo̱de ko rä tꞌekꞌei ꞌne mu̱ ma dä nupäbi rä mfeni toꞌo ma dä hñeti. ꞌNehe, mu̱ ma gi usa rä correo pa gi pe̱hni näꞌä rä karta debe gi jutꞌi, pa hingo dä gutꞌi näꞌä jäꞌi ma dä hñäni.