Ogi xani yä nkꞌuamba

Mäpaya ko rä mfatsꞌi rä periodiko, rä radio, rä telebision ꞌne rä Internet, nguntꞌä di nxani yä notisia po gatꞌho rä Xiꞌmhai. Pe nuju̱ di xo̱kämbenihu̱ «rä Zi Dada de näꞌä mäjuäni», hindi xanihu̱ yä nkꞌuamba (Sl 31:5; Éx 23:1). Mu̱ hindi jamäsuhu̱ näꞌä di pedehu̱, dä za dä perjudikabi märꞌaa näꞌä di mäñhu. Änte de te gi pede, mꞌe̱tꞌo ñꞌanise̱:

• ¿Nzäntho mängä mäjuäni näꞌä toꞌo bi xikägi? Rꞌabu̱ dä za te gä pedehu̱ mäske hindi pädihu̱ xä ñho hanja bi thogi nꞌa rä tꞌo̱tꞌe. Beni ge yä jäꞌi kasi nzäntho häkuäbi o huꞌtsuäbi näꞌä o̱de. Hänge ogi pede näꞌä bi siꞌätho. Nuꞌu̱ gu̱tꞌi rä ꞌñuu ha rä mhuntsꞌi fädi ge nuꞌu̱ nzäntho mängä näꞌä mäjuäni, hänge tobe mänꞌa debe dä nsu pa hindä mängä nꞌa rä noya mu̱ hingi ꞌmu̱i seguro mu̱ mäjuäni o hinä.

• Näꞌä bi sikägi, ¿ma dä tsꞌombäbi rä thuhu märꞌaa? Mu̱ gi handi ge hää, mänꞌa xä ñho hingi pede (Pr 18:8; Flp 4:8).

• ¿Hingrä kuento näꞌä bi sikägi? Ogi kamfri gatꞌho nuꞌu̱ yä esperiensia siꞌäꞌi ꞌne hyandi mꞌe̱tꞌo mu̱ hinto bi imbentase̱.

HYANDIHU̱ RÄ BIDEO ¡OGI XANI YÄ NKꞌUAMBA!, MꞌE̱FA THÄDIHU̱ NUYA YÄ NTꞌANI:

• 

  Ja ngu mää Proverbios 12:18, ¿hängu dä za dä perjudikabi märꞌaa näꞌä di mäñhu̱?

• 

  ¿Hanja dä za dä maxkägihu̱ Filipenses 2:4 pa gä jamäsuhu̱ näꞌä di mäñhu̱ de märꞌaa?

• 

  ¿Te debe gä pe̱fihu̱ ora di mplatikahu̱ ko märꞌaa ꞌne di handihu̱ ge nuꞌu̱ fu̱di no̱ni o di burla de märꞌa yä jäꞌi?

• 

  Änte de gä fu̱dihu̱ gä no̱nihu̱ nꞌa rä jäꞌi, ¿te debe gä ñꞌanise̱hu̱?