¿Gi beni?

¿Xkä heti gatꞌho nuꞌu̱ yä revista Yꞌo̱dehu̱ bi bo̱ni nunä je̱ya? Hyandi mu̱ dä za gi thädi nuya yä ntꞌani:

¿Te ri bo̱ni gä paatä mä mfenihu̱ ja ngu mängä ha Romanos 12:2?

Hingä kombasta gä pe̱fihu̱ nꞌa hängu yä hogä tꞌo̱tꞌe, sino ke debe gä xenihu̱ hyaxtho mä mfenihu̱ ꞌne mä korasohu̱. Mu̱ di handihu̱ ge di pe̱ꞌtsihu̱ nꞌa rä mfeni xä ntsꞌo, nguntꞌä debe gä paatihu̱ pa njabu̱ xträ ntꞌaxi mä mfenihu̱ ja ngu to̱ꞌmi Äjuä (w23.01-S, yä nxii 8, 9).

¿Por hanja di debe gä handihu̱ ngu ri ꞌñehe nuꞌu̱ yä tꞌo̱tꞌe thogi ha rä xiꞌmhai?

Gatꞌho xa di ne gä handihu̱ hanja näꞌä thogi ha rä xiꞌmhai di kumpli ko näꞌä mängä ha rä Biblia. Ora di ñähu̱ de näꞌä mängä rä Biblia ge ma dä thogi, mähyoni gä jamäsuhu̱ näꞌä di mäñhu̱. ¿Por hanja? Ngeꞌä hindi ne gä mäñhu̱ nꞌa rä tꞌo̱tꞌe näꞌä ma dä japäbi rä mhuntsꞌi dä mꞌu̱i dibidido. Mänꞌa dä hogi gä usahu̱ näꞌä rä imformäsio rꞌakägihu̱ rä hnini Jeoba pa gä esplikahu̱ hanja di kumpli näꞌä hutsꞌi ha rä Biblia (1 Cor. 1:10) (w23.02, rä nxii 16).

Pa bi nxixtehe rä Hesu, ¿te himbi ja mꞌe̱di bi me̱fi?

Pa bi nxixtehe rä Hesu, himbi ja mꞌe̱di mꞌe̱tꞌo dä umbäbi rä te rä Zi Dada Jeoba, ngeꞌä rä Hesu bi mꞌu̱i ha nꞌa rä dähni näꞌä ya xki ꞌueke Jeoba ꞌne mi pertenesebi. ꞌNehe, himbi ja mꞌe̱di dä arrepenti de yä tsꞌoki ngeꞌä rä Hesu mrä perfecto ꞌne hinte mä pekado mi pe̱ꞌtsi (w23.03, rä nxii 5).

¿Te dä hogi gä pe̱fihu̱ pa njabu̱ gatꞌho yä ku dä za dä komenta ha yä mhuntsꞌi?

Ma gä unihu̱ yä tꞌu̱kä komentario pa njabu̱ dä uni rä tiempo pa dä za dä komenta märꞌa yä ku. Ha mä komentariohu̱ dä hogi gä no̱nihu̱ ho̱nse̱ nꞌatho hingä gatꞌho nuꞌu̱ yä punto ehe. Ngeꞌä mu̱ gi mää gatꞌho nuꞌu̱ yä punto ehe ha nꞌa rä parrafo, ya hinte ma gi yꞌe̱kuäbi yä zi ku (w23.04, rä nxii 23).

¿Te ri bo̱ni näꞌä rä «ꞌÑuu xä Ntꞌaxi» no̱ni ha Isaías 35:8?

Pa yä judío mi geꞌä näꞌä rä ꞌñuu bi thokuäbi dende Babilonia asta Israel. ¿Pe xi mäpaya? Yä nthebetho yä je̱ya änte de rä je̱ya 1919, rä Zi Dada Jeoba bi usa nuꞌu̱ yä zi ñꞌo̱ho̱ mi mädi rä Mäkä Tꞌofo pa go geꞌu̱ bi mu̱di bi goki ꞌne bi hyoki rä ꞌñuu. Por ejemplo, bi mu̱di bi thoki ndunthi yä kopia de rä Biblia ꞌne bi tꞌofo ha märꞌa yä idioma. Koꞌmu̱ nunä ꞌñuu xa xä ntꞌaxi, hokägihu̱ gä xo̱kämbenihu̱ rä Zi Dada Jeoba ja ngu di hoꞌä. Mänꞌitꞌho nunä ꞌñuu ma dä rꞌakhu̱ rä oportunida gä pe̱ꞌtsihu̱ nuꞌu̱ yä jäpi ma dä hä rä Tsꞌu̱tꞌhui Äjuä (w23.05, yä nxii 15-19).

¿Te di signifika nuꞌu̱ yoho yä ꞌme̱hñä no̱ni ha rä mfistꞌofo Proverbios rä capítulo 9?

Rä mfistꞌofo Proverbios mää de nꞌa «rä donda ꞌme̱hñä». Enä ge toꞌo asepta näꞌä rä imbitasio uni näꞌä «rä donda ꞌme̱hñä otho rä juisio» bi huadi ha rä ntꞌagi. Pe ꞌnehe ñä de nꞌa rä ꞌme̱hñä pe̱ꞌtsi «näꞌä xa mäjuäni rä mfädi». Mu̱ gä aseptahu̱ näꞌä rä imbitasio uni nunä ꞌme̱hñä, ma gä hänihu̱ ndunthi yä jäpi mäpaya ꞌne mu̱ gä sigihu̱ gä yꞌohu̱ ha nunä ꞌñuu, ma dä za gä mꞌu̱ihu̱ pa nzäntho (Prov. 9:​1, 6, 13, 18) (w23.06, yä nxii 22-24).

¿Hanja bi ꞌñudi rä Zi Dada Jeoba ge rä umilde ꞌne pädi dä ntiende te di senti yä jäꞌi?

Änte de xä huati näꞌä rä hnini Sodoma, Jeoba bi xipäbi Lot ge nguntꞌä xä bo̱ni de gehni ꞌne xä ma ha yä tꞌo̱ho̱. Pe Lot bi bäntebi rä Zi Dada Jeoba ge xä hyopäbi tanto nuni ngu rä familia xä gohi ha mä nꞌa rä luga mi kohi getbu̱ de Sodoma. Rä Zi Dada Jeoba bi asepta näꞌä bi yꞌadi Lot (w23.07, rä nxii 21).

¿Te dä za dä yꞌo̱tꞌe nꞌa rä ꞌme̱hñä mu̱ pädi ge rä däme di ho dä hyandi nuꞌu̱ yä nkꞌalo jäꞌi?

Hindi debe dä senti ge go tu rä tsꞌoki. Xa mähyoni go dä su näꞌä rä ntsitsꞌi pe̱ꞌtsi ko rä Zi Dada Jeoba ꞌne dä hñeti rä Mäkä Tꞌofo pa dä hyandi hanja rꞌa yä zi ꞌme̱hñä de mäyaꞌmu̱ bi thogi ꞌnehe po yä däta dumu̱i ꞌne yä xuñha. Pe rä Zi Dada Jeoba bi hñuꞌmpäbi yä mu̱i ꞌne bi matsꞌi. ꞌNehe dä za dä matsꞌi rä däme pa dä däpäbi näꞌä rä tsꞌo bisio (w23.08, yä nxii 14-17).

¿Te ma dä maxkägihu̱ pa gä udihu̱ rä ñhojäꞌi ꞌne rä pasensia ora nꞌa rä jäꞌi di nkue̱ o te xikägihu̱ po näꞌä di kamfrihu̱?

En lugar de gä nkue̱hu̱ po näꞌä rä modo hanja bi xikägihu̱, mänꞌa dä hogi gä handihu̱ ngu nꞌa rä dängä oportunida pa gä xipäbihu̱ de rä Noya Äjuä. Hindi mporta te mä raso bi me̱ꞌtsi näꞌä jäꞌi pa te bi xikägihu̱ o te bi yꞌangägihu̱, dä hogi ge nzäntho gä thädihu̱ ko rä ñhojäꞌi ꞌne rä pasensia (w23.09, rä nxii 17).

¿Te bi me̱fi María pa bi hñäni rä tsꞌe̱di ꞌne rä balo ꞌne te dä za gä pädihu̱?

Mi bädi María ge ma xä nänä de rä Mesías, bi yꞌapäbi rä mfatsꞌi märꞌaa. Rä e̱nxe̱ Gabriel ꞌne Elisabet bi no̱ni nuꞌu̱ yä noya mi hutsꞌi ha rä Mäkä Tꞌofo pa bi nupäbi rä mfeni María. Nuju̱ ꞌnehe dä za gä honihu̱ mä kuhu̱ pa dä rꞌakägihu̱ rä tsꞌe̱di ꞌne rä balo (w23.10, rä nxii 15).

¿Hanja dä za dä dädi Jeoba mä sadihu̱?

Jeoba di promete dä yꞌo̱de mä sadihu̱ ꞌne ora rꞌakägihu̱ näꞌä di apäbihu̱, mꞌe̱tꞌo o̱tꞌe ngue̱nda ndaꞌä rä paha o rä bolunta (Jer. 29:12). Mu̱ mä nꞌa rä ku bi yꞌapäbi ꞌnehe näꞌä dä apäbihu̱, mähyoni gä benihu̱ ge rꞌabu̱ rä Zi Dada Jeoba ma dä dädi de rꞌa nꞌañꞌo yä forma (w23.11, yä nxii 21, 22).

Mu̱ ha Romanos 5:2 rä apostol Pablo ya bi ñä de rä «humu̱i», ¿por hanja bi no̱ni mänꞌaki ha rä versículo 4?

Ora nꞌa rä jäꞌi fu̱di di nxadi rä Mäkä Tꞌofo, zäi ge ꞌnehe fu̱di kamfri ge nꞌa rä pa ma dä mꞌu̱i ha nꞌa rä Paraiso nuua ha rä Xiꞌmhai. Pe ora ze̱ti nuꞌu̱ yä xuñha thogi ꞌne pädi ge rä Zi Dada Jeoba di numäñho, näꞌä rä humu̱i pe̱ꞌtsi mänꞌa di ze̱di ꞌne nubye̱ senti hanja rä Zi Dada Jeoba go geꞌä di prometebi nuya yä jäpi (w23.12, yä nxii 12, 13).