Gatꞌho dä za gä o̱tꞌehu̱ nunä ntꞌani

Mary ꞌne rä däme John,a ꞌmu̱i ha nꞌa rä dähni, habu̱ tso̱ho̱ ndunthi yä jäꞌi de rä dähni Filipinas pa ja dä ꞌmu̱hni ꞌne dä mpe̱fini. Mary ꞌne John xa di johya ora umbäbi ntꞌo̱de de rä Noya Äjuä nuꞌu̱ yä zi jäꞌiꞌu̱. Nuꞌmu̱ bi nja rä COVID-19, Mary bi mu̱di bi umbäbi rä ntꞌudi de rä Mäkä Tꞌofo tanto yä jäꞌi de habu̱ ꞌmu̱i ngu de märꞌaa yä luga de rä Xiꞌmhai. ¿Hanja bi logra bi ꞌñuti yä jäꞌi de märꞌa yä luga?

Mary mi o̱tuäbi nunä ntꞌani nuꞌu̱ yä jäꞌi mi uti de rä Noya Äjuä: «¿Gi pädi nꞌa rä jäꞌi näꞌä ne dä bädi de rä Mäkä Tꞌofo?». Ora nuꞌu̱ mi thädi ge hää, Mary mi ambäbi mi toꞌoꞌä pa njabu̱ xä za xä ꞌñuti ꞌnehe de rä Noya Äjuä. Ko ho̱nse̱ nunä ntꞌani, rä zi nju Mary bi mu̱di bi nxadi ko ndunthi yä jäꞌi. ¿Por hanja? Ngeꞌä nuꞌmu̱ nꞌa rä yä jäꞌi di ho näꞌä di nxadi de rä Mäkä Tꞌofo ma dä ne ge yä familia ꞌne yä amigo dä nxadi ꞌnehe. Ma gä handihu̱ te bi thogi ko rä zi nju Mary.

Mary mi uti de rä Mäkä Tꞌofo nꞌa zi ꞌme̱hñä rä thuhu Jasmin, ꞌne bi ꞌñembäbi Mary ge mi pädi mä goho yä jäꞌi nuꞌu̱ mi ne dä nxadi ꞌnehe. Nꞌa de geꞌu̱ rä thuhu Kristine. Koꞌmu̱ Kristine xa mi ho dä nxadi rä Mäkä Tꞌofo, bi yꞌadi dä tꞌuti yo mꞌiki rä semänä. ꞌNe ora Mary bi yꞌambäbi Kristine: «¿Gi pädi nꞌa rä jäꞌi näꞌä ne dä bädi de rä Mäkä Tꞌofo?». Näꞌä bi dädi: «Hää, nuꞌu̱ mä amiga». Himbi thogi ndunthi rä tiempo, mä goho yä amiga Kristine bi mu̱di bi nxadi. Mꞌe̱fa Kristine bi xipäbi Mary ge mi pädi märꞌa yä jäꞌi nuꞌu̱ mi ne dä nxadi ꞌnehe, ꞌne a la vez nuꞌu̱ yä jäꞌiꞌu̱ bi xipäbi märꞌaa mu̱ mi ne dä nxadi ꞌnehe.

Mꞌe̱fa Kristine bi xipäbi Mary ge nuꞌu̱ yä familia ꞌmu̱i ha rä dähni Filipinas ꞌnehe mi ne dä nxadi rä Mäkä Tꞌofo. Kristine bi ñä ko rä tꞌixu rä thuhu Andrea ꞌne bi xipäbi mu̱ mi ne dä nxadi ꞌnehe. Andrea bi ꞌñembäbi: «Yä testigo rä Jeoba nꞌa rä sekta, hingi kamfri rä Hesu ꞌne ho̱nse̱ usa rä Ndäxjua Testamento». Pe ko ho̱nse̱ nꞌa mꞌiki bi nxadi Andrea, bi da ngue̱nda ge hingä mäjuäni näꞌä mi mbeni, ꞌne ora mi nxadi, njatꞌä mi enä: «Mu̱ geꞌä mää rä Mäkä Tꞌofo, nuꞌmu̱ hää mäjuäni».

Ko rä tiempo, Andrea bi xipäbi Mary ge mi pe̱ꞌtsi mä yoho yä amiga ha rä ꞌme̱fi ꞌne nuꞌu̱ bi mu̱di bi nxadi ꞌnehe. Andrea mi pe̱ꞌtsi nꞌa rä tia rä thuhu Angela ꞌne mrä zi goda. Ora mi nxadi Andrea ko Mary, Angela mi o̱xtho nsinke mi daꞌu̱ ngue̱nda. Nꞌa rä pa, Angela bi ꞌñembäbi Andrea ge mi ne dä nxadi ꞌnehe rä Mäkä Tꞌofo ko Mary. Angela xa mi ho näꞌä mi yꞌo mi pädi ꞌne menu de nꞌa nzänä ya xki mepye̱ ndunthi yä testo de rä Mäkä Tꞌofo, ¡asta bi yꞌadi dä nxadi goho mꞌiki rä semänä! Ko rä mfatsꞌi Andrea, Angela bi za bi ntini ha yä mhuntsꞌi po videoconferencia.

Ora Kristine mi nxadi rä Mäkä Tꞌofo, Joshua, näꞌä rä däme mi hudi getbu̱ pa mi o̱de näꞌä mi nxadi Kristine. Mi da ngue̱nda Mary, bi yꞌambäbi: «¿Gi hohmä gi nxadi ꞌnehe?» Näꞌä bi dädi: «Hinä, ho̱nse̱ di ne gä o̱xtho, ogi o̱tkägi yä ntꞌani o gä ma». Hixki thogi nixi ku̱tꞌa minuto ꞌne ya xki o̱tꞌe mä ndunthi yä ntꞌani ke rä ꞌme̱hñä ꞌne bi xipäbi Mary ge mi ne dä nxadi ꞌnehe rä Mäkä Tꞌofo.

Ko ho̱nse̱ nꞌadä rä ntꞌani, Mary bi mu̱di bi nxadi ko ndunthi yä jäꞌi, ¡asta 28 yä jäꞌi de märꞌa yä luga bi mu̱di bi nxadi kongeꞌä! Rꞌa de geꞌu̱ bi zokuäbi märꞌa yä ku pa xä nxadi kongeꞌu̱.

Ha abril de rä je̱ya 2021, Jasmin —näꞌä rä mu̱di ꞌme̱hñä bi nxadi ko rä zi nju Mary—, bi nxixtehe, Kristine bi nxixtehe ha rä mäyo de rä 2022, ꞌne nubye̱ ꞌmu̱i ha rä dähni Filipinas ko rä familia. Mä yoho de nuꞌu̱ yä amiga Kristine, ꞌnehe bi nxixtehe. Rꞌa yä zänä mꞌe̱fa Angela bi nxixtehe ꞌne nubye̱ faxte de gä precursora regular. Joshua, rä tꞌixu Andrea, ꞌne märꞌa yä zi jäꞌi di sigi di nxadi rä Mäkä Tꞌofo.

Ha rä mu̱di siglo, ndunthi yä jäꞌi bi zo̱ho̱ bi bädi de rä Noya Äjuä po näꞌä xki o̱de de yä familia ꞌne yä amigo (Juan 1:​41,42a; Hech. 10:​24, 27, 48; 16:​25-33). Xi nuꞌi, ¿dä za gi yꞌo̱tpäbi nunä ntꞌani nuꞌu̱ di nxadi kongeꞌi o märꞌaa yä zi jäꞌi: «¿Gi pädi nꞌa rä jäꞌi näꞌä ne dä bädi de rä Mäkä Tꞌofo?»? Ko ho̱nse̱ nꞌadä rä ntꞌani, dä za gi tini ndunthi yä ntꞌudi de rä Mäkä Tꞌofo, ngu rä zi Mary.