Mꞌe̱tꞌo hoki ri mfeni ꞌne ri koraso

Mentä di nxadihu̱ rä Mäkä Tꞌofo, di nehu̱ ge rä Noya rä Zi Dada Jeoba dä tso̱ni mbo mä korasohu̱, dä paatä mä mfenihu̱ ꞌne mä mꞌu̱ihu̱, dä nupkä mä mfenihu̱ ꞌne dä maxkägihu̱ gä ju̱hu̱ yä hogä desision. Esdras —nꞌa rä yꞌofo de mäyaꞌmu̱— mꞌe̱tꞌo mi «hoki rä koraso pa dä nxadi rä Ley Jeoba» (Esd. 7:10). Ma gä handihu̱ hanja dä za gi de̱mbäbi rä kꞌoi Esdras.

Xatuäbi Äjuä. Änte de gi fu̱di gi nxadi rä Mäkä Tꞌofo, xatuäbi rä Zi Dada Jeoba ꞌne apäbi dä maxꞌäꞌi gi ntiende ꞌne gi pe̱fi ha ri mꞌu̱i näꞌä ma gi pädi (Sal. 119:​18, 34).

ꞌÑudi rä umilda. Toꞌo rä ꞌñexmänsu, hingi tsa dä ntiende rä Noya Äjuä. ¿Por hanja? Ngeꞌä nuꞌu̱ senti ge mänꞌa pädi ke märꞌaa ꞌne ge hindi japäbi mꞌe̱di toꞌo dä ꞌñuti (Luc. 10:21). Pe toꞌo rä umilde, hingi nxadi rä Mäkä Tꞌofo ho̱nse̱ pa dä ꞌñudi ge mänꞌa pädi ke märꞌaa. ꞌNehe, mu̱ hingä geꞌä pe̱fi, ꞌmestho paatä rä mꞌu̱i.

Yꞌo̱de nꞌa rä thuhu o nꞌa rä jähñä. Yä thuhu pe̱ꞌtsä rä tsꞌe̱di pa dä tso̱ni mbo de mä korasohu̱. Po rängeꞌä, änte de gi fu̱di gi nxadi rä Mäkä Tꞌofo, dä hogi gi yꞌo̱de nꞌa rä thuhu o nꞌa rä jähñä. Mu̱ gi jabu̱, geꞌä ma dä maxꞌäꞌi pa hingi distrae ꞌne mänꞌa ma dä tso̱ni mbo ri koraso rä Noya Äjuä.