¡Mänꞌitꞌho ya hinto ma dä ñhoya!

Po gatꞌho rä Xiꞌmhai, yä jäꞌi di ja yä uelga ha yä calle ngeꞌä nuꞌu̱ senti ge hindi tꞌo̱tꞌe rä justisia. Rä COVID-19 xä japi mänꞌa xä nja rä ñhoya ꞌne yä jäꞌi tobe mänꞌa xa di nkue̱. ¿Gi pädi? Koꞌmu̱ ha nuya yä pa mänꞌa xä ñꞌotho yä kosa, yä ꞌñethi, ꞌne rä pandemia xä obligagihu̱ gä njotꞌäthohu̱, mänꞌa xä nheki toꞌo yä riko ꞌne toꞌo yä hyoya.

Pe zäi gi ñꞌani: «¿Ma dä zo̱ho̱ rä pa dä uadi nuya yä injustisia?». Hää. Rä Mäkä Tꞌofo xikägihu̱ te ma dä me̱fi Äjuä pa dä hñäki nunä rä xuñha pa nzäntho.

Rꞌa de nuꞌu̱ yä injustisia ma dä hñäki Äjuä

Rä xuñha: Yä gobiernu hingi tsa dä umbäbi gatꞌho näꞌä di japäbi mꞌe̱di yä jäꞌi.

Näꞌä xä promete Äjuä: Ma dä huati gatꞌho yä gobiernu ꞌne go ma dä hñuxäse̱ rä Gobiernu. Nunä fädi ngu rä Tsꞌu̱tꞌhui Äjuä. Nunä Gobiernu ma dä mända gatꞌho rä Xiꞌmhai dende mähetsꞌi (Daniel 2:44; Mateo 6:10).

Näꞌä rä hogä mꞌu̱i ma dä nja: Nunä Gobiernu ma dä mända gatꞌho rä Xiꞌmhai ja ngu ri ꞌñehe. Po rängeꞌä, yä jäꞌi ya hingä ma dä sufri yä injustisia (Salmo 9:7-9, 18). Yä jäꞌi xa ma dä ho ꞌne ma dä johya ko gatꞌho näꞌä ma dä me̱fi. ꞌNehe, ma dä me̱ꞌtsi nꞌa rä mꞌu̱i temäꞌentho ko yä familia. Ha rä Mäkä Tꞌofo di tinihu̱ nunä promesa: «Nuꞌu̱ ma dä hyoki yä nguu pa go dä mꞌu̱hniꞌu̱; ꞌne nuꞌu̱ ma dä gätsꞌi yä obxi ꞌne dä zipäbi yä fruta. Nuꞌu̱ hingä ma dä hyoki yä nguu pa go dä mꞌu̱i märꞌaa; nuꞌu̱ hingä ma dä mpotꞌi pa go dä zi märꞌaa» (Isaías 65:21, 22).

Rä xuñha: Yä jäꞌi hingi tsa dä ꞌuege de nuꞌu̱ yä tsꞌo tꞌo̱tꞌe japi dä thogi rä ñhoya ꞌne dä sufri.

Näꞌä xä promete Äjuä: Xti mända rä Gobiernu, Äjuä ma dä huati gatꞌho nuꞌu̱ yä tsꞌo tꞌo̱tꞌe pidi yä jäꞌi.

Näꞌä rä hogä mꞌu̱i ma dä nja: Äjuä ma dä nkargo ge yä jäꞌi nunka dä thogi mänꞌaki rä ñhoya. Ya nunka ma dä nja yä gerra, rä thuhu nixi yä ñheni (Salmo 46:9; 72:16; Isaías 33:24). Äjuä enä: «Mä hnini pe̱ꞌtsi te dä mꞌu̱i ha nꞌa rä luga habu̱ hinte mä tuhni di ja ꞌne ma dä mꞌu̱i nsi rä ntsu ha yä luga de gä tsaya» (Isaías 32:18).

Rä xuñha: Nuꞌu̱ yä jäꞌi honse̱ yä ñho ꞌne yä embidioso, di probecha de märꞌaa.

Näꞌä xä promete Äjuä: Xti mända rä Gobiernu Äjuä, yä jäꞌi ya hingä ma dä hyoni yä ñhose̱, sino ke ma dä hyombäbi yä ñho märꞌaa (Mateo 22:37-39).

Näꞌä rä hogä mꞌu̱i ma dä nja: Xti mända rä Gobiernu Äjuä ha rä Xiꞌmhai, gatꞌho yä jäꞌi ma dä mädi nꞌa ngu mänꞌaa ꞌne hingä ma dä hyoni yä ñhose̱ (1 Corintios 13:4, 5). Rä Mäkä Tꞌofo enä: «Nuꞌu̱ hinte mä ntsꞌomꞌu̱i ma dä yꞌo̱tꞌe, nixi hinte mä dañu ma dä yꞌo̱tpäbi mä mäkä tꞌo̱ho̱; ngeꞌä gatꞌho rä xiꞌmhai, ma dä ñudi ko näꞌä rä mfädi bi ehe de Jeoba,a ja ngu nuꞌu̱ yä dehe koꞌmi rä ndehe» (Isaías 11:9).

Rä Mäkä Tꞌofo enä ge di ꞌmu̱hu̱ ha yä gäxä pa ꞌne ge mänꞌitꞌho Äjuä ma dä kumpli rä promesa de dä huati gatꞌho yä injustisia (Salmo 12:5).b Pe mientra dä zo̱ho̱ näꞌä rä paꞌä, nuꞌu̱ yä tsꞌofo di tinihu̱ ha rä Mäkä Tꞌofo faxkägihu̱ pa gä ñhanduihu̱ rä ñꞌäbojä. Dä za gi hñeti yä artikulo «¿Hanja dä za gi ꞌmu̱i ko tsꞌu̱tho rä bojä?» ꞌne «Una opinión realista del dinero».

Näꞌä kamfri rꞌa yä jäꞌi de rä Mäkä Tꞌofo ꞌne de rä bojä

Näꞌä kamfri rꞌa yä jäꞌi: Nzäntho ma dä nja rä ñhoya, ngeꞌä rä Hesu bi ꞌñenä: «Yä hyoya nzäntho ma dä ꞌmu̱i kongeꞌähu̱» (Mateo 26:11).

Näꞌä mäjuäni: Rä Hesu ho̱nse̱ bi mää näꞌä thogi yä jäꞌi mäpaya. Mientra di ꞌmu̱hu̱ ha nunä rä tsꞌo xiꞌmhai, nzäntho ma dä ꞌmu̱i yä hyoya. Pe mi mꞌu̱kua rä Hesu ha rä Xiꞌmhai näꞌä bi xipäbi yä hogä notisia nuꞌu̱ yä zi hyoya. Bi xipäbi ge mänꞌitꞌho rä Tsꞌu̱tꞌhui Äjuä ma dä huati rä ñhoya pa nzäntho (Lucas 4:18, 43).

Näꞌä kamfri rꞌa yä jäꞌi: Pa dä numäñhogihu̱ Äjuä debe gä ñhoyahu̱, ngeꞌä rä Hesu bi ꞌñembäbi nꞌa rä jäꞌi: «Bä pa gatꞌho nuꞌä gi pe̱ꞌtsi ꞌne hekuä yä hyoya» (Mateo 19:21).

Näꞌä mäjuäni: Ko nuya yä noya, rä Hesu himbi umbäbi nꞌa rä mhända yä de̱ni. Ho̱nse̱ bi umbäbi nꞌa rä konseho nꞌa rä bäsjäꞌi, ngeꞌä näꞌä xa mi honi dä nriko. Po rängeꞌä rä Hesu bi ꞌñembäbi ge xä paatä rä mfeni ꞌne xä de̱ni.

Näꞌä kamfri rꞌa yä jäꞌi: Ora Äjuä jäpi nꞌa rä jäꞌi japi dä nriko, ngeꞌä rä Mäkä Tꞌofo enä: «Rä jäpi Jeoba geꞌä japi dä nriko nꞌaa» (Proverbios 10:22).

Näꞌä mäjuäni: Ora rä Mäkä Tꞌofo mää de «rä jäpi Jeoba», ne dä mää de nuꞌu̱ yä tꞌo̱tꞌe xa ja rä muui: Ngu nꞌa rä hogä ntsitsꞌi ko Äjuä ꞌne nꞌa rä humu̱i pa xudi ndämäni (Salmo 25:14; Juan 17:3). Mäske mäyaꞌmu̱ Äjuä bi japi dä nriko rꞌa de nuꞌu̱ yä ꞌme̱go, kasi gatꞌho nuꞌu̱ toꞌo bi de̱ni rä Hesu himyä riko (Génesis 24:34, 35; Santiago 2:5). Nixi Ñhesukristo himbi me̱ꞌtsi ndunthi yä ñho (Mateo 8:20).

Näꞌä kamfri rꞌa yä jäꞌi: Rä Mäkä Tꞌofo udi de rä comunismo, ngeꞌä enä ge nuꞌu̱ yä kristianu de rä mu̱di siglo mi mfatsꞌi «nꞌa ngu mänꞌaa pa hinte dä mꞌe̱piꞌu̱. ꞌNe mi pa gatꞌho nuꞌä te mi pe̱ꞌtsiꞌu̱ ꞌne mi hekuäbi gatꞌho nuꞌu̱ märꞌaa» (Hechos 2:44, 45).

Näꞌä mäjuäni: Nuya yä testo pede näꞌä bi me̱fi rꞌa yä kristianu pa bi tꞌumbäbi rä mfatsꞌi nuꞌu̱ yä rꞌayꞌo gamfri. Nuꞌu̱ yä jäꞌiꞌu̱, xki ma ha rä hnini Jerusalén pa dä ntini ha näꞌä rä ngo de rä Pentecostés (Hechos 2:5). Pe mꞌe̱fa de bi gamfriꞌu̱ rä Ñhesukristo, nuꞌu̱ bi gohi mä nꞌa tu̱i rä tiempo ha Jerusalén pa bi sigi bi yꞌo̱de näꞌä mi udi yä apostol. Po rängeꞌä, nuꞌu̱ märꞌa yä kristianu bi uni de yä boluntase̱ näꞌä mi pe̱ꞌtsi pa xä nja rä ñhuni ꞌne habu̱ xä ñꞌoxi nuꞌu̱ yä rꞌayꞌo kristianu (Hechos 2:41, 42, 46, 47).

a Rä Mäkä Tꞌofo enä ge rä thuhu Äjuä geꞌä Jeoba (Salmo 83:18).

b Mu̱ gi ne gi pädi por hanja dä za gi kamfri näꞌä udi rä Mäkä Tꞌofo, hyandi rä artikulo «La Biblia tiene la verdad».