Yä científico bi adelanta näꞌä rä Reloj del Juicio Final | ¿Te udi rä Biblia?

Rä 24 de rä enero de rä 2023, yä científico bi adelanta näꞌä rä Reloj del Jucio Finala pa bi hñutsꞌi kasi mäde nxui. Pa geꞌu̱, mäde nxui di signifika rä fin de nunä xiꞌmhai.

«Näꞌä rä Reloj del Jucio Final di representa nuꞌu̱ yä däta xuñha di ñhandui yä mexiꞌmhai. Nunä märte, nunä reloj mänꞌa bi joni mäde nxui po ränge näꞌä rä gerra bi ja ha Ucrania, po nuꞌu̱ yä amenäsa di ja yä gobiernu de dä yꞌe̱i yä bomba, ꞌne po yä pahyadi ꞌne gatꞌho nuꞌu̱ yä mpadi xä nja ha rä Xiꞌmhai» (Servicio internacional de noticias de la agencia AFP).
«Nunä märte, yä científico bi mää ge bi adelanta näꞌä rä Reloj del Juicio Final ꞌne nubye̱ se̱he̱ di ꞌme̱päbi 90 yä segundo pa dä uni mäde nxui. Yä mexiꞌmhai nunka xki mꞌu̱i xa getbu̱ de rä apocalipsis ja ngu mäpaya» (ABC News).
«Nꞌa grupo yä científico de ndunthi yä dähni enä ge yä mexiꞌmhai nunka xki mꞌu̱i en peligro ja ngu nubye̱» (The Guardian).

¿Ma dä uadi yä mexiꞌmhai ꞌne rä planeta? ¿Di debe gä tsuhu̱ näꞌä ma dä thogi xudi ndämäni? ¿Te udi rä Biblia?

Näꞌä rä humu̱i di pe̱ꞌtsihu̱ pa xudi ndämäni

Rä Biblia udi ge «rä xiꞌmhai ꞌmu̱i pa nzäntho» ꞌne ge yä jäꞌi «ja ma dä mꞌu̱hni pa nzäntho» (Eclesiastés 1:4; Salmo 37:29). Po rängeꞌä, dä za gä ꞌmu̱ihu̱ seguro ge yä jäꞌi hingä ma dä huati nunä rä Xiꞌmhai.

Pe rä Biblia hää ñä de nꞌa rä fin. Por ejemplo enä ge «rä xiꞌmhai ma dä uadi dä thogi» (1 Juan 2:17).

Mu̱ gi ne gi pädi te ne dä mää rä Biblia ora enä ge ma dä nja nꞌa rä fin, hñeti rä artikulo «¿Se acerca el fin del mundo? ¿Qué es el apocalipsis?».
Pa gi pädi te udi rä Biblia de nuꞌu̱ yä thogi ma dä nheki ha rä xiꞌmhai, hñeti rä artikulo «¿Cuándo será el fin del mundo?».

Ogi ꞌme̱di rä humu̱i

Mäske ha nunä rä xiꞌmhai di nheki ndunthi yä tsꞌo thogi ꞌne yä xuñha, rä Biblia faxkägihu̱ pa hingä ꞌme̱dihu̱ rä humu̱i. ¿Hanja?

Rä Biblia di rꞌakägihu̱ yä hogä tsꞌofo (2 Timoteo 3:16, 17). Por ejemplo, mu̱ gi ne gi pädi hanja rä Biblia dä za dä maxꞌäꞌi pa hingi ꞌme̱di rä humu̱i mäske gi thogi yä xuñha, hñeti rä artikulo «Qué puedo hacer para no preocuparme tanto».
Rä Biblia ꞌnehe rꞌakägihu̱ nꞌa rä humu̱i pa xudi ndämäni (Romanos 15:4). Xikägihu̱ te di to̱ꞌmihu̱ mäpaya ꞌne xudi ndämäni, ꞌne geꞌä rꞌakägihu̱ rä tsꞌe̱di pa gä ze̱tihu̱ nuꞌu̱ yä tsꞌo thogi di nheki ha rä xiꞌmhai.

Pa gi pädi hanja dä za dä maxꞌäꞌi rä Noya Äjuä, di mbitaꞌihe gi hñäni nꞌa rä yä curso de rä Mäkä Tꞌofo.

a «Rä Reloj del Juicio Final se̱he̱ nꞌa rä reloj simbólico näꞌä fatsꞌi yä jäꞌi dä da ngue̱nda ge yä ma dä uadi nunä rä xiꞌmhai po ränge nuꞌu̱ yä tecnología xä imbenta yä jäꞌi. Nunä reloj benꞌgägihu̱ ge mu̱ di nehu̱ gä sigi gä ꞌmu̱ihu̱ ha nunä xiꞌmhai, mähyoni gä honihu̱ rä modo pa drä soluciona nuya yä xuñha» (Bulletin of the Atomic Scientists [Boletín de Científicos Atómicos]).