¿Nꞌa rä pekado gä nthäti ko nꞌa jäꞌi de mä nꞌa rä rasa?

Näꞌä udi rä Mäkä Tꞌofo

Hinä. Äjuä hingi nkue̱ mu̱ nꞌa rä ñꞌo̱ho̱ ꞌne nꞌa rä ꞌme̱hñä de nꞌañꞌo yä rasa dä desidi dä nthäti. Nꞌa rä Biblia enä: «Pa Äjuä gatꞌho mähye̱gihu̱. Äjuä hingi huahnitho yä jäꞌi po yä rasa» (Hechos 10:34, 35, La palabra de Dios para Todos, 2005).

Ma gä handihu̱ märꞌa yä testo nuꞌu̱ ñä ꞌnehe de nunä tema.

Gatꞌho yä rasa bi ehe de nꞌatꞌä rä luga

Gatꞌho yä jäꞌi xtä ehehu̱ de Adán ꞌne Eva, näꞌä rä mu̱di medinthäti. Rä Biblia enä ge Äjuä «bi hyokä gatꞌho yä jäꞌi nuꞌu̱ ꞌmu̱i gatꞌho rä ngu̱ni rä xiꞌmhai» de nꞌadä rä ñꞌo̱ho̱ (Hechos 17:26). Nuꞌmu̱ Äjuä bi hyoki Eva, näꞌä bi ꞌñenä ge ma xä zo̱ho̱ xä «nänä de gatꞌho yä jäꞌi de rä xiꞌmhai» (Génesis 3:20). Hänge hindi mporta de te mä rasagihu̱, gatꞌho di mfamiliahu̱. ¿Pe te dä za gä pe̱fihu̱ mu̱ habu̱ di ꞌmu̱ihu̱ hingi hnumäñho yä jäꞌi de märꞌa yä rasa?

Dä hogi gi ñähu̱

Äjuä hingi handi ngu nꞌa rä pekado mu̱ nꞌa rä ñꞌo̱ho̱ ꞌne nꞌa rä ꞌme̱hñä de nꞌañꞌo yä rasa dä nthäti, pe ndunthi yä jäꞌi hingi numäñho (Isaías 55:8, 9). Hänge mu̱ gi mbeni gi nthäti ko nꞌa rä jäꞌi de mä nꞌa rä rasa, dä hogi gi ñähu̱ de nuya yä asunto änte de gi nthätihu̱.

• ¿Te ma gi pe̱fihu̱ pa gi ñhanduihu̱ nuꞌu̱ yä burla ma dä yꞌo̱tꞌäꞌihu̱ ri familiahu̱ o yä jäꞌi de rä komunida?

• ¿Hanja ma gi fatsꞌihu̱ ri bätsihu̱ pa dä ñhandui nuꞌu̱ yä burla ma dä tꞌo̱tꞌpäbi?

Mu̱ gi ñähu̱ de nuya yä asunto dende änte, zäi ge mänꞌa ma dä za gi pe̱ꞌtsihu̱ rä johya ha ri medinthätihu̱ (Proverbios 13:10, 21:5).