¿Mpe̱fi ngu yä misionero?

Hää, gatꞌho yä testigo rä Jeoba, hindi mporta habu̱ di ꞌmu̱he, di mpe̱fihe ngu yä misionero ꞌne di aprobechahe gatꞌho yä oportunida pa di udihe de rä Mäkä Tꞌofo (Mateo 28:19, 20).

Yä testigo rä Jeoba di uñhe ntꞌo̱de ꞌne rꞌaa pa ha märꞌa yä luga de yä dähni habu̱ ꞌmu̱i ndunthi yä jäꞌi, nuꞌu̱ tobe hinxä yꞌo̱de de nuꞌu̱ yä rꞌayꞌo hogä noya de rä Mäkä Tꞌofo. Rꞌaa pa bi ungä ntꞌo̱de ha märꞌa yä dähni. Gatꞌho xa di ho gä mfaxtehe pa dä kumpli nunä profesia bi mää rä Hesu: «Ma gi dahu̱ mäjuäni de geki [...] mäxo̱ge rä ngu̱ni rä xiꞌmhai» (Hechos 1:8).

Ha rä je̱ya 1943, bi mu̱di nꞌa rä ngunsadi, habu̱ häni yä hogä ntꞌudi rꞌa yä misionero rä thuhu: Ngunsadi de rä Mäkä Tꞌofo de Galaad de rä Watchtower. Asta mäpaya, thogi de 8.000 yä testigo rä Jeoba xä ma ha nunä ngunsadi.