Yä jäꞌi bi hyoki nꞌa rä däta to̱nꞌgu

BI THOGI ndunthi yä je̱ya. Yä bätsi rä Noe bi me̱ꞌtsi ndunthi yä bätsi. Nuyu̱ yä bätsi bi te ꞌne bi me̱ꞌtsi ꞌnehe märꞌa yä bätsi. Nguntꞌä bi mꞌu̱i ndunthi yä jäꞌi ha rä Xiꞌmhai.

Bi zo̱ho̱ bi mꞌu̱i nꞌa rä bonkꞌme̱to rä Noe mrä thuhu rä Nemrod. Näꞌä xa mrä tsꞌomꞌu̱i, mi ju̱ yä zuꞌue ꞌne yä jäꞌi ꞌnepu̱ mi ho. Rä Nemrod bi hñudise̱ de gä ndä pa bi mända märꞌa yä jäꞌi. Äjuä himi numäñho rä Nemrod.

Gatꞌho nuꞌu̱ yä jäꞌi mi ꞌmu̱i, mi ñä nꞌatꞌä rä ñhäki. Rä Nemrod mi ne ge yä jäꞌi xä mꞌu̱i nꞌatꞌä rä luga pa xä za xä mända gatꞌho. Hänge, ¿gi pädi te bi me̱fi? Bi ꞌñembi yä jäꞌi ge dä hyoki nꞌa rä hnini ꞌne bi ꞌñembi ja dä hyokini nꞌa rä däta to̱nꞌgu. Ha nunä rä kꞌoi gi handi hanja hoki yä ladriyo.

Jeoba himbi ho nunä rä to̱nꞌgu. Jeoba mi ne ge yä jäꞌi xä ma de gehni ꞌne xä nxani ha gatꞌho rä Xiꞌmhai. Pe nuꞌu̱ yä jäꞌi bi ꞌñenä: “¡Maha! Ma gä hokihu̱ nꞌa rä hnini ꞌne nꞌa rä däta to̱nꞌgu xi rä ñhetsꞌi asta dä tso̱ni ha mähetsꞌi. ¡Nuꞌmu̱ hää ma gä pe̱ꞌtsihu̱ rä nsu!”. Mi ne rä nsu pa geꞌu̱se̱ hingä pa Äjuä.

Hänge Äjuä ya himbi hyopi nuꞌu̱ yä jäꞌi dä sigi dä hyoki näꞌä rä to̱nꞌgu. ¿Gi pädi hanja bi ja? Äjuä nguntꞌä bi patuäbi yä ñhäki yä jäꞌi, ya himi ñä se̱he̱ nꞌatho rä ñhäki. Ya himi pädi te mi mängä nꞌa ngu mä nꞌa. Hänge näꞌä rä hnini bi tꞌembi Babel o Babilonia, nunä thuhu ri bo̱ni: hingi fädi te mää.

Nubye̱, yä jäꞌi bi mu̱di bi bo̱ni de Babel. Nuꞌu̱ yä jäꞌi mi ñä nꞌatꞌä rä ñhäki bi ma ha märꞌa yä luga de ha rä Xiꞌmhai pa dä mꞌu̱i mähye̱gi.