Rä Jakob bi ma ha Aran

¿GI PÄDI toꞌo nuyu̱ yä ñꞌo̱ho̱ ñäui rä Jakob? Mꞌe̱fa de xki ñꞌo ndunthi yä pa, rä Jakob bi nthe̱ui nuyu̱ yä ñꞌo̱ho̱ getbu̱ de nꞌa rä poso. Nuyu̱ mi fadi yä de̱ti. Rä Jakob bi ñꞌani: “¿Habu̱ gyä menguhu̱?”.

“Dyä menguhe Aran”, bi dädi.

Rä Jakob bi ñꞌani: “¿Gi pädihu̱ toꞌo rä Laban?”.

Nuꞌu̱ bi dädi: “Hää, hyandi, xä ꞌñekua rä tꞌixu, rä Rakel ko yä de̱ti rä dada”. ¿Gi handi habu̱ xä ꞌñe rä Rakel?

Mi hyandi rä Jakob rä Rakel ko nuꞌu̱ yä de̱ti rä Laban, bi ma ꞌne bi hñäki näꞌä rä do mi jui rä poso pa njabu̱ bi za bi ntsithe yä de̱ti. Nubye̱ rä Jakob bi zu̱ꞌtsi rä Rakel ꞌne bi xipi mi toꞌoꞌä. Rä Rakel xa bi johya ꞌne bi ma ha rä nguu ꞌne bi xipi rä dada näꞌä xki thogi.

Rä Laban xi bi johya ngeꞌä rä Jakob ma xä gohi ha rä nguu. ꞌNe nuꞌmu̱ rä Jakob bi xipi ge mi ne dä nthätui rä Rakel, rä Laban xa bi johya. Pe mꞌe̱tꞌo bi yꞌapi rä Jakob dä mpe̱fi yoto nje̱ya ha yä hai rä Laban pa xä za xä nthätui rä Rakel. Rä Jakob bi ꞌñenä ge hää ngeꞌä xa mi mädi rä Rakel. Pe mi zo̱ho̱ näꞌä rä pa xki thutsꞌi pa dä nthätui, ¿gi pädi te bi thogi?

Rä Laban bi uni rä Lea, näꞌä rä tꞌixu mädä, himbi uni rä Rakel. Ha nuꞌmu̱ rä Jakob bi ꞌñenä ge hää ma xä mpe̱fi mä yoto nje̱ya, rä Laban ꞌnehe bi umbi rä Rakel pa bi nthätui. Mäyaꞌmu̱ Äjuä mi hopi yä ñꞌo̱ho̱ dä nthätui märꞌa yä ꞌme̱hñä. Pe nubye̱ rä Mäkä Tꞌofo udi ge se̱he̱ nꞌatho dä me̱ꞌtsi.