Rä däta familia rä Jakob

HYANDI nunä rä däta familia ha nunä rä kꞌoi. Gehyu̱ 12 yä tꞌu̱ rä Jakob. ꞌNehe bi me̱ꞌtsi yä tꞌixu. ¿Gi pädi yä thuhu rꞌa de nuꞌu̱ yä bätsi? Ma gä pädihu̱ rꞌaa.

Rä Lea bi me̱ꞌtsi rä Ruben, Simeon, Lebi ꞌne Juda. Mi bädi rä Rakel ge himi tsa dä me̱ꞌtsi yä bätsi, xi bi durämu̱i. Hänge bi umbi rä Jakob näꞌä rä ꞌme̱go mrä thuhu Bila, ꞌne rä Bila bi me̱ꞌtsi yoho yä tꞌu̱ ko rä Jakob: rä Dan ꞌne rä Neftali. Nubye̱ rä Lea ꞌnehe bi umbi rä Jakob näꞌä rä ꞌme̱go mrä thuhu Silpa, rä Silpa bi me̱ꞌtsi yoho yä tꞌu̱ ko rä Jakob: rä Gad ꞌne rä Aser. Rä Lea bi uadi bi me̱ꞌtsi mä yoho yä tꞌu̱, rä Isakar ꞌne rä Sabulon.

Pe mꞌe̱fa, rä Rakel bi za bi me̱ꞌtsi nꞌa rä bätsi. Bi ꞌñembi rä Jose. Mꞌe̱fa ma gä pädihu̱ ndunthi de rä Jose, ngeꞌä bi zo̱ho̱ bi me̱ꞌtsi nꞌa rä däta nsu. Gehyu̱ 11 yä tꞌu̱ bi me̱ꞌtsi rä Jakob nuꞌmu̱ bi mꞌu̱i ha rä ngu rä Laban, näꞌä rä dada rä Rakel.

Rä Jakob ꞌnehe bi me̱ꞌtsi rꞌa yä tꞌixu, pe rä Mäkä Tꞌofo uni rä thuhu se̱he̱ nꞌa de geꞌu̱. Mrä thuhu Dinä.

Bi zo̱ho̱ rä pa nuꞌmu̱ rä Jakob bi ne bi zopu̱ rä Laban pa dä mengi ha Kanään. Hänge bi muntsꞌi gatꞌho rä familia ꞌne yä däta taxo de gä de̱ti ꞌne de märꞌa yä zuꞌue, ꞌne bi gu̱ rä ꞌñuu bi ma.

Mi thogi yä je̱ya de xki zo̱ho̱ rä Jakob ꞌne rä familia ha Kanään, rä Rakel bi me̱ꞌtsi mänꞌa rä tꞌu̱ nuꞌmu̱ nuyu̱ mi yꞌo ha nꞌa rä ꞌñuu. Mi mꞌu̱i näꞌä rä bätsi, rä Rakel bi du. Pe näꞌä rä zi ꞌue̱ne bi mꞌu̱i xä ñho. Rä Jakob bi ꞌñembi Benjamin.

Di ne gä benihu̱ yä thuhu nuꞌu̱ 12 yä tꞌu̱ rä Jakob, ngeꞌä de gehyu̱ ja bä eheni gatꞌho näꞌä rä dähni Israel. Hää, nuꞌu̱ 12 yä tꞌu̱kä hnini de Israel pe̱ꞌtsi yä thuhu de nuꞌu̱ rꞌe̱tꞌa yä tꞌu̱ rä Jakob ꞌne de nuꞌu̱ yoho yä tꞌu̱ rä Jose. Rä Isak bi mꞌu̱ mä ndunthi yä je̱ya nuꞌmu̱ ya xki mꞌu̱i gatꞌho nuyu̱ yä metsi, zäi bi johya ngeꞌä mi pe̱ꞌtsi ndunthi yä ꞌme̱to. Pe ma gä handihu̱ te bi thogi ko rä ꞌme̱ta näꞌä mrä thuhu Dinä.