Rä Dinä bi me̱ꞌtsi yä xuñha

¿GI HANDI habu̱ ma dä zo̱ni rä Dinä? Ma dä nuu rꞌa yä nxutsi nuꞌu̱ bi ꞌmu̱i ha rä hai Kanään. ¿Te gi handi ma dä mängä rä Jakob, näꞌä rä dada? Pa gä thädihu̱ nunä rä ntꞌani, ma gä benihu̱ näꞌä mi mbeni rä Abraan ꞌne rä Isak de nuꞌu̱ yä ꞌme̱hñä mñä mengu Kanään.

¿Mi ne rä Abraan ge rä Isak xä nthäti ko nꞌa rä nxutsi mrä mengu Kanään? Hinä. ¿Mi ne rä Isak ꞌne rä Rebeka ge rä Jakob xä nthäti ko nꞌa rä me Kanään? Hinä. ¿Gi pädi por hanja?

Ngeꞌä nuꞌu̱ yä me Kanään mi xo̱kämbeni yä zidada hingä mäjuäni. Hingä mñä hogä jäꞌi pa to dä nthätui, nixi mñä hogä jäꞌi pa to xa dä ntsixhui. Hänge dä za gä mäñhu̱ ge rä Jakob hingä ma xä ho ge rä tꞌixu xä hyoni nuya yä kanänea pa dä ntsixhui.

Hää, rä Dinä bi me̱ꞌtsi yä xuñha. ¿Dä za gi hyandi ha rä kꞌoi nuni rä kanäneo xa di nu̱ꞌti rä Dinä? Rä thuhu Sikem. Nꞌa rä pa, nuꞌmu̱ rä Dinä bi zo̱ho̱ bi ntso̱nte, rä Sikem bi pe̱ntꞌi rä Dinä pa bi ñꞌähui. Xä ntsꞌo näꞌä bi me̱fi, ngeꞌä nꞌa rä ñꞌo̱ho̱ dä za dä ñꞌähui nꞌa rä ꞌme̱hñä se̱he̱ nuꞌmu̱ xä nthätui. Ko nunä rä tsꞌo tꞌo̱tꞌe bi me̱fi rä Sikem, bi nja mä ndunthi yä xuñha.

Mi yꞌo̱de yä ku rä Dinä näꞌä xki thogi, xi bi bo̱ yä kue̱. Yoho de geꞌu̱, rä Simeon ꞌne rä Lebi, xi bi nkue̱, bi mfoxä yä däjuai, ꞌne hinto bi da ngue̱nda nuꞌmu̱ nuyu̱ bi yu̱tꞌi ha näꞌä rä hnini habu̱ mi ꞌmu̱i rä Sikem. Nuyu̱ ꞌne nuꞌu̱ märꞌa yä ku bi hyo rä Sikem ꞌne gatꞌho nuꞌu̱ märꞌa yä ñꞌo̱ho̱. Rä Jakob xi bi bo̱ rä kue̱ ko näꞌä rä tsꞌo tꞌo̱tꞌe xki me̱fi nuꞌu̱ yä tꞌu̱.

¿Hanja bi mu̱di gatꞌho nuya yä xuñha? Ngeꞌä rä Dinä mi ntsixhui nuꞌu̱ yä jäꞌi himi o̱te yä mhända Äjuä. Nuju̱ hingä ma gä honihu̱ nuya yä ntsitsꞌi, ¿hänge hinä?