Bi bongi rä zi ꞌue̱ne Moises

HYANDI nuni rä zi ꞌue̱ne xa zoni ꞌne xä mipäbi rä dedo nuni nxutsi. Gehni rä Moises. ¿Gi pädi toꞌo nuni rä nxutsi xa mähotho? Nuni nxumfo̱ rä ejipsia, rä tꞌixu rä Faraon.

Rä nänä rä Moises bi ꞌñägi nuni rä zi ꞌue̱ne asta bi me̱ꞌtsi hñu nzänä pa njabu̱ yä ejipsio himbi za bi hyo. Pe näꞌä mi pädi ge xä za xä thini rä Moises, hänge ma gä handihu̱ te bi yꞌo̱tꞌe pa himbi tho.

Bi hyoki xä ñho nꞌa rä ꞌmo̱tsꞌe pa njabu̱ himbi yu̱tꞌä rä dehe. ꞌNepu̱ bi yꞌe̱ntꞌä rä Moises ha näꞌä rä ꞌmo̱tsꞌe ꞌne bi zoogi habu̱ mi ja yä däta tꞌe̱i de ha rä ñäni rä däthe Nilo. ꞌNe bi ꞌñembäbi rä Miriam, rä nju rä Moises, ge dä gohi getbu̱ pa dä hyandi te dä thogi.

Hingä yaꞌä, rä tꞌixu rä Faraon bi zo̱ho̱ ha rä däthe Nilo pa dä ñhi. ꞌNe mi hyandi näꞌä rä ꞌmo̱tsꞌe ha yä däta tꞌe̱i, bi ꞌñembäbi yä ꞌme̱go: “Guä hähu̱ nuni rä ꞌmo̱tsꞌe”. Mi xoꞌtsi näꞌä rä ꞌmo̱tsꞌe, ¡bi hyandi nꞌa rä zi ꞌue̱ne xa tsꞌu̱ngänza! Rä zi ꞌue̱ne Moises xa mi zoni, ꞌne näꞌä nxutsi bi hueki. Rä tꞌixu rä Faraon himi ne ge xä tho näꞌä rä zi ꞌue̱ne.

Ja ngu gi handi ha nunä rä kꞌoi, rä Miriam bä ehe ꞌne bi yꞌambäbi rä tꞌixu rä Faraon: “¿Dä za gä ma gä nzofo nꞌa rä israelita pa dä maxꞌäꞌi gi tede nuni zi ꞌue̱ne?”.

“Jakä näꞌä rä mäte”, bi ꞌñenä näꞌä rä nxutsi.

Hänge rä Miriam bi ma rä nhextꞌihi pa bä xipäbi rä nänä. Mi zo̱ho̱ rä nänä rä Moises habu̱ mi yꞌo näꞌä rä nxutsi, nuni bi ꞌñembäbi: “Nä nunä rä ꞌue̱ne pa go gi tede, ꞌne ma gä jutꞌäꞌi”.

Hänge rä nänä rä Moises bi suse̱ näꞌä rä bätsi. Mꞌe̱fa, nuꞌmu̱ rä Moises bi te, näꞌä rä nänä bi ma bä tsokuäbi rä tꞌixu rä Faraon. Nuni rä nxutsi bi tede rä Moises ngu rä tꞌu̱. Hänge rä Moises bi te ha rä ngu rä Faraon.