Nꞌa rä rꞌayꞌo ñhuni

¿GI PÄDI te joo nuya yä jäꞌi? ꞌÑenä yä xitse̱. Xä ntꞌaxi ꞌne ngu yä zi tꞌu̱kä ndaa. Pe hingä rä xitse̱; nuni nꞌa rä ñhuni.

Ja xä thogi nꞌa nzänä dende bi bo̱ni yä israelita ha Ejipto. Nubye̱ yꞌo ha yä yꞌotꞌä hai. Hingi ja ndunthi rä ñhuni. Hänge nuꞌu̱ yä israelita mi zoni ꞌne mi enä: “Mänꞌa xä ñho xä hyogägihu̱ Jeoba ha Ejipto. Nuni hää ndi tsihu̱ näꞌä go ndi nehu̱”.

Hänge Jeoba bi ꞌñenä: “Ma gä japi dä ꞌuäi de mähetsꞌi rä ñhuni”. ꞌNe geꞌä bi me̱fi Jeoba. Rä hyaxꞌä, nuꞌmu̱ yä israelita bi hyandi näꞌä xki dagi mi tꞌaxkätho, nuꞌu̱ bi ꞌñenä: “¿Te rä me̱hni?”.

Rä Moises bi ꞌñenä: “Gehnä rä ñhuni xä rꞌaꞌähu̱ Jeoba pa gi tsihu̱”. Yä jäꞌi bi ꞌñembäbi MÄNÄ näꞌä rä ñhuni. Rä nku̱hi rä mänä ꞌñenä näꞌä rä thuhme xä nxini tu rä tꞌafi.

Rä Moises bi ꞌñembi yä israelita: “Johu̱ se̱he̱ näꞌä ma gi tegehu̱”. Hänge yä jäꞌi geꞌä mi pe̱fi tatꞌä xudi. Pe nuꞌmu̱ mi patꞌi rä Hyadi, nuꞌmu̱ mi deni näꞌä rä mänä mi kohi ha rä hai.

ꞌNehe rä Moises bi ꞌñenä: “Hinto dä me̱ꞌtsi rä mänä pa rä hyaxꞌä”. Pe rꞌaa himbi yꞌo̱de. Hänge, ¿gi pädi te mi thogi ko näꞌä rä mänä mi e̱gi pa rä hyaxꞌä? ¡Mi ndo̱nxi ꞌne mi xägi!

Pe Jeoba bi ꞌñembi yä israelita ge se̱he̱ nꞌa mꞌiki rä semänä xä za xä goo rä mänä pa näꞌä xä zi ꞌne pa näꞌä xä yꞌe̱gi pa rä hyaxä. Se̱he̱ näꞌä mbehe xä za xä go rä mänä pa näꞌä nsabdo. Ngeꞌä Jeoba bi ꞌñenä ge näꞌä nsabdo hingä ma xä japi xä dagi rä mänä. Mi me̱ꞌtsi yä israelita rä mänä pa näꞌä nsabdo, himbi ndo̱nxi ha nixi bi xägi. ¡Gehnä mänꞌa rä milagro bi ja Jeoba!

Gatꞌho nuꞌu̱ yä je̱ya bi ñꞌo yä israelita ha yä yꞌotꞌä hai, Jeoba bi ꞌuini ko rä mänä.