Rä Moises bi me̱tꞌi rä ndo̱do

BI THOGI yä je̱ya... ¡10 yä je̱ya, 20 yä je̱ya, 30 yä je̱ya, 39 yä je̱ya! ꞌNe nuꞌu̱ yä israelita mi yꞌotho de gä nani ha yä yꞌotꞌä hai. Pe gatꞌho nuꞌu̱ yä je̱ya, Jeoba xki su rä hnini. Bi ꞌuini ko rä mänä. De gä pa, Jeoba mi gu̱hni ko nꞌa rä gui, ꞌne de gä xui ko nꞌa rä gui de gä tsibi. ꞌNe himbi thege yä dutu nixi bi u̱gi yä ua.

Gehnä rä mu̱di zänä de näꞌä rä je̱ya 40 dende nuꞌmu̱ yä israelita xki bo̱ni de Ejipto. Nubye̱, bi zo̱ni mänꞌaki ha Kades. Ja gekua xki zo̱ho̱ nuꞌmu̱ bi ꞌme̱hni nuꞌu̱ 12 yä ñꞌo̱ho̱ pa ha rä hai Kanään. Dende geꞌmu̱, ya ma dä uadi 40 yä je̱ya. Nubye̱ rä Miriam, rä nju rä Moises ja bi du nuua ha Kades. Pe ha nunä luga bi nja yä xuñha mänꞌaki.

Yä jäꞌi himi tsa dä dini rä dehe, ꞌne mi ñäni kontra rä Moises: “Mänꞌa xä ñho xtä tuhe. ¿Por hanja guä ju̱gägihe de ha Ejipto ꞌne guä tsigägihe ha nuya yä tsꞌo yꞌotꞌä hai habu̱ hingi ja te gä tsihe? Nuua otho yä sofo, nixi yä igo, nixi yä obxi, nixi yä granäda. Nixi ja rä dehe pa gä ntsithehe”.

Mi ma rä Moises ꞌne rä Aron ha rä tabernäkulo pa dä xadi, Jeoba bi ꞌñembäbi rä Moises: “Muntsꞌi rä hnini. ꞌNe de yä da gatꞌho nuꞌu̱ yä jäꞌi, ma gi nzofo näꞌä rä ndo̱do. Ja ma dä bo̱mbu̱ ndunthi rä dehe pa gatꞌho rä hnini ꞌne pa yä zuꞌue”.

Hänge rä Moises bi muntsꞌi yä jäꞌi ꞌne bi ꞌñembi: “¡Yꞌo̱dehu̱ nuꞌäꞌihu̱ hingi kamfrihu̱ Äjuä! ¿Rä Aron ꞌne nuga go ma gä jahe dä bo̱ni rä dehe ha nunä rä ndo̱do?”. Nubye̱ ko nꞌa rä zaa, rä Moises bi me̱tꞌi yo mꞌiki näꞌä rä ndo̱do, ꞌne bi mu̱di bi bo̱ngä xi ndunthi yä dehe. Bi nja ndunthi rä dehe pa bi ntsithe gatꞌho yä jäꞌi ꞌne yä zuꞌue.

Pe Jeoba xi bi nkue̱ ko rä Moises ꞌne rä Aron. ¿Gi pädi por hanja? Ngeꞌä rä Moises ꞌne rä Aron bi mää ge nuyu̱ go ma xä japi dä bo̱ni rä dehe de rä ndo̱do. Pe Jeoba go geꞌä mi japi dä bo̱ni rä dehe. Hänge Jeoba bi mää ge ma xä kastiga rä Moises ꞌne rä Aron ngeꞌä himbi mängä näꞌä mäjuäni. Jeoba bi ꞌñenä: “Nuꞌähu̱ hingä go ma gi tsixu̱ mä hnini ha Kanään”.

Yä israelita bi bo̱ni de Kades, ꞌne nguntꞌä bi zo̱ni ha rä tꞌo̱ho̱ Or. Ha rä ndehe näꞌä rä tꞌo̱ho̱, ja bi duni rä Aron. Mi pe̱ꞌtsi 123 yä je̱ya. Yä israelita xa mi tuyämu̱i, ꞌne po 30 yä pa xa bi nzoni. Rä Eliasar, rä tꞌu̱ rä Aron geꞌä bi thutsꞌi de gä däta majhä ha rä hnini Israel.