Josue bi thutsꞌi pa dä gu̱tꞌi rä ꞌñuu

RÄ Moises mi ne dä yu̱tꞌi ha Kanään ko yä israelita. Hänge bi ꞌñenä: “Jeoba, rꞌaki nse̱ki gä rꞌani rä däthe Jordan, pa gä handi näꞌä rä hogä hai”. Pe Jeoba bi ꞌñenä: “¡Ya o te gi mää!”. ¿Gi pädi por hanja bi mängä njabu̱ Jeoba?

Po näꞌä bi thogi nuꞌmu̱ rä Moises bi me̱tꞌi näꞌä rä ndo̱do. Beni: rä Moises ꞌne rä Aron himbi ꞌñeꞌspäbi rä nsu Jeoba. Nuyu̱ himbi xipi näꞌä rä hnini ge Jeoba go geꞌä mi japi dä bo̱ni rä dehe de näꞌä rä ndo̱do. Hänge Jeoba bi ꞌñembi rä Aron ꞌne rä Moises ge hingä ma xä yu̱tꞌi ha Kanään.

Hixki thogi ndunthi yä zänä de nuꞌmu̱ xki du rä Aron, Jeoba bi ꞌñembäbi rä Moises: “Tsitsꞌi rä Josue, hñuxä ha rä thandi de näꞌä rä majhä Eliasar ꞌne de rä hnini. ꞌNe de yä da gatꞌho nuꞌu̱ yä jäꞌi, mää ge rä Josue go geꞌä ma dä gu̱tꞌi rä ꞌñuu”. Rä Moises geꞌä bi me̱fi ja ngu gi handi ha rä kꞌoi.

ꞌNepu̱ Jeoba bi ꞌñembi rä Josue: “Ze̱ti ꞌne ogi tsu. Ma gi gu̱hni yä israelita pa dä yu̱tꞌi ha rä hai Kanään näꞌä xtä ñätꞌäꞌihu̱, ꞌne nuga ma gä ꞌmu̱i kongeꞌi”.

Mꞌe̱fa, Jeoba bi ꞌñembäbi rä Moises ge dä bo̱tsꞌe ha rä ndehe de näꞌä rä tꞌo̱ho̱ Nebo mi kohi ha rä hai Moab. Dende gehni rä Moises bi za bi hyandi näꞌä rä hogä hai Kanään mi ja ri mani de rä däthe Jordan. Nubye̱, Jeoba bi ꞌñembäbi rä Moises: “Gehnä rä hai dä ñäꞌti gä umbäbi yä bätsi rä Abraan, Isak ꞌne Jakob. Xtä hopäꞌi gi hyandi, pe hingä ma gä hopäꞌi gi ku̱tꞌi”.

Ja gehni, ha rä ndehe rä tꞌo̱ho̱ Nebo, ja bi duni rä Moises. Mi pe̱ꞌtsi 120 yä je̱ya. Mi jatho rä tsꞌe̱di ꞌne mi handi xä ñho. Gatꞌho yä israelita xi bi duyämu̱i ꞌne xi bi nzoni po rä Moises. Pe xi bi johya ngeꞌä rä Josue geꞌä ma xä gu̱tꞌi rä ꞌñuu.