Dende bi mꞌe̱go yä israelita asta mi thoki mänꞌaki yä jädo Jerusalen

Mi mꞌe̱go yä israelita ha Babilonia, bi thogi ndunthi yä xuñha. Sadrak, Mesak ꞌne Abednego bi tꞌe̱ntꞌi ha nꞌa däta hu xa mi zo̱o̱, pe Äjuä himbi hyopi bi zätꞌi nuꞌu̱ yä tsꞌu̱ntꞌu̱. Mꞌe̱fa de bi ꞌme̱di Babilonia kontra Medopersia, Daniel bi tꞌe̱ntꞌi ha yä ngu yä zate, pe Äjuä ꞌnehe bi su pa hinte bi ja, ꞌne bi gotꞌpäbi yä ne nuꞌu̱ yä zate.

Mꞌe̱fa, Siro näꞌä ndä de Persia, bi hyopi bi bo̱ni yä israelita pa bi mengi ha yä hai. Yä israelita xki mꞌe̱go 70 yä je̱ya ha Babilonia. Ngu mi zo̱ni ha Jerusalen, bi mu̱di bi hyokuäbi rä templo Jeoba. Pe nguntꞌä nuꞌu̱ yä nkontra bi ma bä ꞌmaꞌmi nuꞌu̱ yä ꞌme̱fi. Hänge bi thogi 22 yä je̱ya pa bi uadi bi thoki näꞌä templo.

Mi thogi 47 yä je̱ya de mi uadi rä templo Jeoba, Esdras bi ja nꞌa biahe pa bi mengi ha Jerusalen ꞌne bi mfaxte pa bi thoki mähotho näꞌä templo. Mi thogi 13 yä je̱ya dende näꞌä rä biahe Esdras, Nemias bi mfaxte pa bi gu̱tsꞌi nuꞌu̱ yä jädo Jerusalen xki dagi. Gatꞌho nuꞌu̱ yä thogi mää ha nunä RÄ NTHEKE 5, bi zitsꞌi 152 yä je̱ya.