Bi mꞌu̱i ha nꞌa establo

¿GI PÄDI toꞌo nuni zi ꞌue̱ne? Hää, rä thuhu Hesu. Ja huadi ri mꞌu̱i ha nꞌa establo. Tꞌembi establo habu̱ jotꞌi yä baga, yä doro, yä fani, ꞌne märꞌa yä zuꞌue. Märia ma dä me̱gi rä Hesu ha nꞌa motsa habu̱ mi ku̱ yä ñhuni yä zuꞌue. Pe, ¿por hanja Märia ꞌne Jose o mbo ko nuyu̱ yä zuꞌue? Nuni hingä nꞌa rä hogä luga pa dä mꞌu̱i nꞌa zi ꞌue̱ne, ¿hänge hinä?

Hinä, hingä nꞌa hogä luga. Pe Märia ꞌne Jose bi zo̱ho̱ ha nunä luga ngeꞌä Sesar Augusto, näꞌä ndä de Romä bi mändabi gatꞌho yä jäꞌi dä ma dä ofo yä thuhu ha nuꞌu̱ yä hnini habu̱ xki mꞌu̱i. Jose xki mꞌu̱i ha Belen, pe mi zo̱ni ha näꞌä hnini ya mi otho habu̱ dä ñꞌoxi. Hänge bi ma bä tsaya ha yä ngu yä zuꞌue. ¡Geꞌä paꞌä bi mꞌu̱i rä Hesu! Pe ja ngu gi handi, rä Hesu bi mꞌu̱i xä ñho.

¿Gi handi nuyu̱ yä mayꞌo bi zo̱ho̱ pa dä nuu rä Hesu? Nuyu̱ yä mayꞌo mi su yä de̱ti de gä xui, ꞌne nse̱kitho bi hue̱xki nꞌa ñotꞌi habu̱ mi yꞌo. ¡Mi nꞌa rä e̱nxe̱ Äjuä! Nuꞌu̱ yä mayꞌo xa bi ntsu. Pe näꞌä e̱nxe̱ bi ꞌñenä: “¡Ogi tsuhu̱! Dä ehe gä xiꞌähu̱ rꞌa yä rꞌayꞌo hogä noya. Nubye̱, ha Belen bi mꞌu̱i rä Kristo, näꞌä zi Hmuu. ¡Geꞌä ma dä ñäni yä jäꞌi! Ma gi tinihu̱ xä ꞌmantꞌi ko yä dutu ꞌne xä ꞌme̱gi ha nꞌa motsa”. Nse̱kitho bi zo̱ho̱ ndunthi yä e̱nxe̱ ꞌne bi mu̱di bi nsunda Äjuä. Nuꞌu̱ yä mayꞌo bi nextꞌi bi ma pa bä honi näꞌä zi ꞌue̱ne ꞌne hää bi dini.

¿Gi pädi por hanja mi nꞌañꞌo rä Hesu? ¿Gi pädi toꞌo xa mäjuäni rä Hesu? Beni, ya dä pädihu̱ de näꞌä rä mu̱di Tꞌu̱ Äjuä ha rä ꞌmede nꞌaa de nunä he̱ꞌmi. ¡Mi geꞌä rä Hesu näꞌä bi matsꞌi Jeoba pa bi hyoki mähetsꞌi, rä Xiꞌmhai ꞌne gatꞌho yä tꞌo̱tꞌe!

Hää, Jeoba bä pombäbi rä te rä Hesu de ha mähetsꞌi pa ha rä mu̱i Märia. Nguntꞌä, ha rä mu̱i Märia bi mu̱di bi te nꞌa zi ꞌue̱ne ja ngu thogi ko gatꞌho yä zi ꞌue̱ne ha yä mu̱i yä nänä. Pe nuni zi ꞌue̱ne, ¡mi rä Tꞌu̱ Äjuä! ꞌNe nubye̱ bi mꞌu̱i ha Belen, ha nꞌa establo. ¿Ya gä pädi por hanja nuꞌu̱ yä e̱nxe̱ xa bi johya nuꞌmu̱ bi xipi nuꞌu̱ yä mayꞌo ge xki mꞌu̱i rä Hesu?