Rä Hesu bi yꞌo̱the yä jäꞌi

MIENTRA rä Hesu mi yꞌo̱ ha Galilea bi yꞌo̱the nuꞌu̱ yä jäꞌi mi hñeni. Nuꞌu̱ yä milagro, bi ntꞌo̱de ha nuꞌu̱ yä hnini mi ja getbu̱. Hänge yä jäꞌi bi ziꞌspäbi nuꞌu̱ himi tsa dä ñꞌo, yä goda, yä gogu, ꞌne nuꞌu̱ mi pe̱ꞌtsi märꞌa yä hñeni. Rä Hesu bi yꞌo̱the gatꞌho nuꞌu̱ yä jäꞌi.

Ya xki thogi hñu nje̱ya dende nuꞌmu̱ Juan Bautista bi matsꞌi rä Hesu bi nku̱ꞌmdehe. Rä Hesu bi xipi yä apostol ge mänꞌitꞌho ma xä ma pa Jerusalen, ja gehni ma dä tho, ꞌne mꞌe̱fa ma dä nuhu̱ de rä du. Pe mientra, rä Hesu mi sigi mi o̱the yä jäꞌi.

Nꞌa nsabdo, rä Hesu mi uti yä jäꞌi. Pe yä judio mi tsaya näꞌä pa nsabdo, ꞌne hingä mi mpe̱fi. Nunä ꞌme̱hñä gi handi, xki nkoxtha po 18 yä je̱ya ꞌne himi tsa dä mꞌai mänjuäntho. Hänge rä Hesu bi dani, ꞌne nunä ꞌme̱hñä bi mꞌai mänjuäntho. ¡Bi hogi de rä hñeni!

Pe nuꞌu̱ yä majhä mi gu̱tꞌi rä ꞌñuu xa bi nkue̱ ꞌne nꞌa de geꞌu̱ bi ꞌñenä: “Rꞌato yä pa di pe̱ꞌtsihu̱ pa gä mpe̱fihu̱. ¡Geꞌu̱ yä pa guä ehehu̱ pa gi ñꞌo̱thehu̱ pe hingä mu̱ nsabdo!”.

Pe rä Hesu bi dädi: “¡Gyä tsꞌo jäꞌihu̱! ¿Ha ge hingi xoꞌtihu̱ ri burruhu̱ pa dä ntsithe mu̱ nsabdo? Nuꞌmu̱, ¿por hanja hindä ñꞌo̱the nunä zi ꞌme̱hñä xä hñeni po 18 yä je̱ya?”. Mi mää njabu̱ rä Hesu, nuꞌu̱ yä nda ñꞌo̱ho̱ bi me̱ꞌtsi yä tsa.

Mꞌe̱fa, rä Hesu ꞌne yä apostol bi gu̱ yä ꞌñuu pa Jerusalen. Mi thogi getbu̱ de rä hnini Jeriko, yoho yä zi me̱ti mi goda bi mafi ꞌne bi ꞌñenä: “Hesu, huegägihe”.

Rä Hesu bi nzofo nuꞌu̱ yä goda ꞌne bi ꞌñembi: “¿Te gi nehu̱ gä o̱tꞌe po nuꞌähu̱?”. Nuꞌu̱ bi dädi: “Zi hmuu, di nehe dä xogi mä dahe”. Rä Hesu bi dambäbi yä da ꞌne nuꞌu̱, ¡nguntꞌä bi xogi yä da! ¿Gi pädi por hanja rä Hesu bi ja gatꞌho nuya yä milagro? Ngeꞌä mi mädi yä jäꞌi ꞌne mi ne ge nuꞌu̱ xä gamfribi. Ko näꞌä bi me̱fi, udi ge nuꞌmu̱ xti mända ha rä Xiꞌmhai hinto ma dä ñheni.