Nꞌa tsꞌu̱ntꞌu̱ bi ñꞌähä

¡HYANDI! ¿Gi pädi te thogi nuua? ¿Te bi ja nuni tsꞌu̱ntꞌu̱ ꞌme̱ni ha rä hai? ¡Hyandi! Nꞌa de nuyu̱ yä ñꞌo̱ho̱ bi bo̱ni de rä nguu, gehni Pablo. ¿Dä za gi hyandi ꞌnehe Timoteo? ¿Bi dagi nuni tsꞌu̱ntꞌu̱ de rä bentanä?

Hää, xa geꞌä bi thogi. Nuua ha Troas, Pablo mi uti de rä Noya Äjuä rꞌa yä de̱ni rä Hesu. Rä hyaxꞌä ma xä gu̱ nꞌa barko xä ma, ꞌne Pablo mi pädi ge ma xä thogi ndunthi yä pa pa xä mengi nuua ha Troas. Hänge bi sigi bi ꞌñudi de rä Noya Äjuä asta mäde nxui.

Nde, nuni tsꞌu̱ntꞌu̱ mi rä thuhu Eutiko, mi hudi ha rä bentanä ꞌne ja bi doꞌmini rä tꞌähä. ¡Bi dagi dende ha rä hñu piso näꞌä nguu! Hänge njabu̱ xa turämu̱i nuyu̱ yä jäꞌi. Mi gu̱tsꞌi nuyu̱ yä ñꞌo̱ho̱ nuni tsꞌu̱ntꞌu̱, ¡bi hyandi ge ya xki du!

Mi hyandi Pablo ge nuni tsꞌu̱ntꞌu̱ ya xki du, bi hyu̱fi ꞌne bi huitsꞌi. ꞌNepu̱ bi ꞌñenä: “Ogi turimu̱ihu̱. ¡Nuni tsꞌu̱ntꞌu̱ hinte bi ja!”. Hää mäjuäni, ¡Pablo bi japi bi nuhu de rä du nuni tsꞌu̱ntꞌu̱! ¡Nunä nꞌa milagro! Nubye̱ gatꞌho nuꞌu̱ yä jäꞌi xa bi johya.

Nubye̱, gatꞌho bi bo̱tsꞌe mänꞌaki ꞌne bi ñuni. Pablo bi sigi bi ꞌñudi asta mi hyatsꞌi. Pe nubye̱ hää, ¡Eutiko himbi ñꞌähä mänꞌaki! ꞌNepu̱, Pablo, Timoteo ꞌne nuꞌu̱ märꞌa mi ñꞌoui bi bo̱tsꞌe ha barko ꞌne bi ma. ¿Gi pädi pa habu̱ bi ma?

Pablo ya ma xä huati näꞌä rä hñu biahe. Nde, ha Efeso xki gohi po hñu nje̱ya. Hänge de gatꞌho nuꞌu̱ yä biahe bi ja, gehnä mänꞌa xa bi dura.

Mꞌe̱fa de bi bo̱ni de Troas, näꞌä barko bi gohi rꞌa yä pa ha Mileto. Efeso mi kohi rꞌa yä kilometro de Mileto, hänge Pablo bi nzofo nuꞌu̱ yä zi däta jäꞌi de Efeso pa bi ñäui ngeꞌä mi pädi ge ya hingä ma xä hyandi mänꞌaki. Mꞌe̱fa, nuꞌmu̱ näꞌä barko bi ma, nuꞌu̱ yä ku, ¡xa bi duyämu̱i ngeꞌä bi hyandi bi ma Pablo!

Nubye̱ näꞌä barko bi mengi mänꞌaki ha Sesarea. Mientra Pablo bi gohi ha rä ngu Felipe, näꞌä rä mꞌe̱hni Äjuä mi rä thuhu Agabo, bi xipi Pablo ge xti zo̱ni ha Jerusalen ma xä tꞌe̱ntꞌi ha fadi. ꞌNe geꞌä xa bi thogi, ja ngu xki mää Agabo. Pablo bi ñꞌo ha fadi po yo nje̱ya ha Sesarea, ꞌnepu̱ bi ꞌme̱hni ko Sesar näꞌä ndä de Romä pa geꞌä xä mää te xä tꞌo̱tꞌpäbi Pablo. Ma gä handihu̱ te bi thogi Pablo ha näꞌä rä biahe pa Romä.