Bi zo̱ni ha nꞌa isla

¡HYANDI nuni barko yꞌo ri yu̱i ꞌne yꞌo ri dehmi! ¿Gi handi nuyu̱ yä jäꞌi bi nsagi pa ha yä dehe? Rꞌaa ya ma dä zo̱ni ha rä ñäni rä ndehe. ¿Gi handi habu̱ ꞌmai Pablo? Ma gä handihu̱ te xki thogi.

Beni, Pablo xki njotꞌi po yo nje̱ya ha rä fadi de Sesarea. Nubye̱, Pablo ꞌne märꞌa yä yꞌofadi bi tꞌe̱ntꞌi ha nꞌa rä barko ri ma Romä. Getbu̱ de näꞌä rä isla Kreta, bi nja nꞌa rä däta bu̱nthi ꞌne bi me̱tꞌi näꞌä barko. Nuꞌu̱ yä ñꞌo̱ho̱ ya himi tsa dä yꞌe̱tꞌi näꞌä barko. De gä pa himi tsa dä hyandi rä Hyadi ha de gä xui himi tsa dä hyandi yä tso̱o̱. Mi thogi yä pa, nuꞌu̱ yä jäꞌi mi yꞌo ha rä barko mi huyämu̱i ge hingä ma xä bongi.

Nubye̱, Pablo bi mꞌai ꞌne bi ꞌñenä: “Mäske nunä barko ma dä uadi, nuꞌähu̱ hingä ma gi tuhu̱. Ngeꞌä mä nxui bi nzokägi nꞌa rä e̱nxe̱ Äjuä ꞌne bi ꞌñengägi: «¡Pablo, ogi tsu! Pe̱ꞌtsi te gi tso̱ni ko Sesar, näꞌä ndä de Romä, ꞌne Äjuä hingä ma dä hye̱gi dä du nuꞌu̱ gi ñꞌoui»”.

Ya xki thogi 14 yä pa dende nuꞌmu̱ xki mu̱di näꞌä däta bu̱nthi. Nubye̱, pa mi mäde nxui nuꞌu̱ yä jäꞌi mi yꞌe̱tꞌi näꞌä barko, bi da ngue̱nda ge nuꞌu̱ yä dehe hingä mi xä ñhee. Nuꞌu̱ yä jäꞌi xa bi ntsu dä mfantꞌui yä do, hänge bi käꞌmi mbo rä dehe nuꞌu̱ yä nthähi mi tu yä bo̱jä pa bi hyu̱tsꞌi näꞌä barko. Rä hyaxꞌä bi hyandi rä ñäni rä ndehe, hänge mi ne xä zixä näꞌä barko asta gehni.

Pe nuꞌmu̱ ya ma xä zo̱ni, näꞌä barko bi ntsꞌatꞌi ha yä ꞌmomu, ꞌnepu̱ yä dehe bi mu̱di bi me̱tꞌi ꞌne bi xe̱ni näꞌä barko. Näꞌä soldado mi su näꞌä barko bi ꞌñenä: “Toꞌo pädi dä nku̱nthe, dä rꞌaxä asta ha rä ñäni rä ndehe; toꞌo hinä, dä nsagi mꞌe̱fa ꞌne dä gu̱ de nuꞌu̱ yä zaa bi xo̱tsꞌe de rä barko pa dä rꞌani ꞌne dä zo̱ni ha rä hai”. Geꞌä bi me̱fi nuꞌu̱ 276 yä jäꞌi mi o ha näꞌä barko, hänge himbi du ꞌne bi zo̱ni ha rä ñäni rä ndehe, bi thogi ja ngu xki mää näꞌä e̱nxe̱.

Näꞌä isla mi rä thuhu Mälta. Nuꞌu̱ yä jäꞌi mi ꞌmu̱hni xa mi yä hojäꞌi, ꞌne bi matsꞌi nuꞌu̱ xki tho yä nthogi. Mi thogi näꞌä bu̱nthi, Pablo bi tꞌe̱ntꞌi ha mänꞌa barko ꞌne bi tsꞌitsꞌi pa Romä.