Gatꞌho näꞌä mää rä Mäkä Tꞌofo di kumpli

Rä Mäkä Tꞌofo hingä ho̱nse̱ mää nuꞌu̱ yä tꞌo̱tꞌe xa mäjuäni bi thogi mäyaꞌmu̱, ꞌnehe mää näꞌä ma dä thogi mꞌe̱fa. Yä jäꞌi hingi pädi näꞌä ma dä thogi mꞌe̱fa. Hänge di pädihu̱ ge rä Mäkä Tꞌofo bä ehe de Äjuä. ¿Te mää rä Mäkä Tꞌofo ge ma dä thogi mꞌe̱fa?

Xikägihu̱ ge Äjuä ma dä hä nꞌa däta tuhni. Ha nunä tuhni, Äjuä ma dä hñäki gatꞌho yä tsꞌo tꞌo̱tꞌe ꞌne yä tsꞌo jäꞌi de rä Xiꞌmhai, pe ma dä ñäni nuꞌu̱ yä jäꞌi pe̱päbi. Ñhesukristo, näꞌä ndä xä huahni Äjuä, ma dä su gatꞌho yä jäꞌi pa hindä ñheni, hindä du ꞌne njabu̱ dä mꞌu̱i ko rä johya ha rä Xiꞌmhai.

¿Hänge xa di johyahu̱ ngeꞌä Äjuä ma dä hyoki nꞌa rꞌayꞌo uädri nuua ha rä Xiꞌmhai? Pe, ¿gi pädi te mähyoni gä pe̱fihu̱ mu̱ di ne gä ꞌmu̱ihu̱ ha näꞌä uädri? Ha näꞌä rä gäxä ꞌmede de nunä mfistꞌofo xikägihu̱ te mähyoni gä pe̱fihu̱ pa gä hänihu̱ nuꞌu̱ yä jäpi pe̱ꞌtsi Äjuä pa nuꞌu̱ pe̱päbi. Hänge hñeti nunä RÄ NTHEKE 8 pa gi pädi te mää rä Mäkä Tꞌofo ge ma dä thogi mꞌe̱fa.