Dä za gi ꞌmu̱i pa nzäntho

¿GI PÄDI te mä mfistꞌofo heti nuni zi nxutsi ꞌne nuyu̱ märꞌa yä bätsi? Hää, heti nꞌa mfistꞌofo ngu nunä gi heti... Mä he̱ꞌmi hutsꞌi yä ꞌmede de rä Mäkä Tꞌofo. Nuyu̱ heti nunä ꞌmede gi heti... “Dä za gi ꞌmu̱i pa nzäntho.”

¿Gi pädi te yꞌo ri bädi nuyu̱ yä bätsi? Mꞌe̱tꞌo, ge mähyoni gä pädihu̱ de Jeoba ꞌne de rä Hesu pa dä za gä ꞌmu̱ihu̱ pa nzäntho. Rä Mäkä Tꞌofo enä: “Pädi toꞌo xa mäjuäni Äjuä ꞌne toꞌo Ñhesukristo näꞌä rä Tꞌu̱ Äjuä. Gehnä ꞌñuu tsitsꞌi ha nꞌa rä te pa nzäntho”.

¿Hanja dä za gä pädihu̱ de rä Zi Dada Jeoba ꞌne de rä Hesu? Dä za gä pädihu̱ mu̱ gä hetihu̱ gatꞌho nunä Mä he̱ꞌmi hutsꞌi yä ꞌmede de rä Mäkä Tꞌofo. Nunä he̱ꞌmi utkägihu̱ ndunthi de Jeoba ꞌne de rä Hesu, ¿hänge hää? ꞌNehe xikägihu̱ ndunthi de nuꞌu̱ yä tꞌo̱tꞌe xä hyoki ꞌne de nuꞌu̱ ma dä hyoki mꞌe̱fa. Pe mähyoni gä hetihu̱ mänꞌa rä he̱ꞌmi.

¿Gi handi nuni mänꞌa mfistꞌofo ꞌme̱ni ha rä hai? Gehni rä Mäkä Tꞌofo. Hyoni toꞌo dä maxꞌäꞌi pa gi tini ha rä Mäkä Tꞌofo habu̱ hutsꞌi kada nꞌa de nuya yä ꞌmede. Rä Mäkä Tꞌofo xikägihu̱ gatꞌho näꞌä di ja mꞌe̱di pa gä pe̱päbihu̱ Jeoba ngu ri ꞌñehe ꞌne njabu̱ dä za gä pe̱ꞌtsihu̱ nꞌa rä te pa nzäntho. Hänge mähyoni gä nxadihu̱ hyaxtho rä Mäkä Tꞌofo.

Pe hingä se̱he̱ gä mepye̱hu̱ ndunthi de Jeoba ꞌne de Ñhesukristo. Ngeꞌä dä za gä pe̱ꞌtsihu̱ ndunthi rä mfädi de geꞌu̱ ꞌne de näꞌä udi, pe hingä kongehnä ya ma gä pe̱ꞌtsihu̱ rä te pa nzäntho. ¿Gi pädi te mänꞌa di ja mꞌe̱di?

Pe̱ꞌtsi te gä pe̱fihu̱ ꞌnehe näꞌä di pädihu̱ de rä Mäkä Tꞌofo. ¿Gi beni ge dä pädihu̱ de Judas Iskariote? Näꞌä mi nꞌa de nuꞌu̱ 12 yä apostol rä Hesu. Judas mi pe̱ꞌtsi ndunthi rä mfädi de Jeoba ꞌne de rä Hesu. Pe, ¿te bi me̱fi? Mꞌe̱fa bi ntsꞌomꞌu̱i ꞌne bi traisionä rä Hesu po 30 yä bojä de gä plata. Hänge Judas hingä ma dä me̱ꞌtsi rä te pa nzäntho.

¿Gi beni näꞌä dä pädihu̱ de Geasi ha Rä ꞌmede 69? Geasi bi ne bi me̱ꞌtsi yä dutu ꞌne yä bojä nuꞌu̱ hingä mi yä me̱ti. Bi mää näꞌä hingä mäjuäni pa bi za bi me̱ꞌtsi nuꞌu̱ yä tꞌo̱tꞌe, pe Jeoba bi kastiga. ꞌNehe ma dä kastigagihu̱ mu̱ hingä o̱tehu̱ nuꞌu̱ yä mhända.

Pe bi mꞌu̱i ndunthi yä jäꞌi nuꞌu̱ nzäntho bi yꞌo̱te Jeoba. ¿Hänge di ne gä te̱mbäbihu̱ yä kꞌoi? Näꞌä zi bätsi Samuel bi uni nꞌa hogä kꞌoi. Beni ge ha Rä ꞌmede 55 dä pädihu̱ ge nuꞌmu̱ mi pe̱ꞌtsi ngu goho o ku̱tꞌa nje̱ya, bi mu̱di bi me̱päbi Jeoba ha rä tabernäkulo. Hänge mäske gi bätsitho, nuꞌi dä za gi pe̱päbi Jeoba.

Hää, gatꞌho nuju̱ di ne gä de̱nihu̱ rä kꞌoi rä Hesu. Ha Rä ꞌmede 87 dä pädihu̱ ge mäske rä Hesu mi bätsitho, mi hudi ha rä templo ꞌne mi uti märꞌa yä jäꞌi de rä Dada. Ma gä de̱mbäbihu̱ rä kꞌoi ꞌne ma gä utihu̱ yä jäꞌi de mä Zi Dadahu̱ Jeoba, ꞌne de Ñhesukristo näꞌä rä Tꞌu̱ Jeoba. Mu̱ gä pe̱fihu̱ njabu̱, ma dä za gä ꞌmu̱ihu̱ pa nzäntho ha näꞌä rꞌayꞌo uädri ma dä hä Äjuä nuua ha rä Xiꞌmhai.