Rä ntheke 6

¿Te me̱ꞌä rä Tsꞌu̱tꞌhui Äjuä?

¿Habu̱ bi ja näꞌä rä Tsꞌu̱tꞌhui Äjuä? (1)

¿Toꞌo näꞌä rä Ndä? (2)

¿ꞌMu̱ märꞌa yä jäꞌi nuꞌu̱ ma dä mända ko näꞌä rä Ndä? Mu̱ hää, ¿hängu? (3)

¿Te udi ge ya di ꞌmu̱ihu̱ ha yä gäxä pa? (4)

¿Te ma dä me̱fi nꞌa rä pa rä Tsꞌu̱tꞌhui Äjuä po rä mexiꞌmhai? (5-7)

1. Nuꞌmu̱ mi mꞌu̱ rä Hesu nuua ha rä Xiꞌmhai, bi ꞌñuti nuꞌu̱ yä de̱ni dä yꞌadi ha yä sadi ge dä ehe näꞌä rä Tsꞌu̱tꞌhui Äjuä. De gä ñhämfo̱, näꞌä rä noya reino, ne dä mää ge geꞌä nꞌa rä tsꞌu̱tꞌhui habu̱ di mända nꞌa rä ndä. Rä Tsꞌu̱tꞌhui Äjuä, näꞌä nꞌa rä tsꞌu̱tꞌhui bi ja ha mähetsꞌi ꞌne ma dä mända ha rä Xiꞌmhai. Ma dä nsundabi ꞌne ma dä mäkä ntꞌaxibi rä thuhu Äjuä. Ma dä japi dä nja rä bolunta Äjuä ha rä Xiꞌmhai ja ngu bi ja ha mähetsꞌi (Mateo 6:9, 10).

2. Äjuä bi mää ge rä Hesu ma dä zo̱ho̱ dä Ndä ha Rä Tsꞌu̱tꞌhui (Lucas 1:30-33). Mi mꞌu̱ rä Hesu ha rä Xiꞌmhai, bi ꞌñudi ge sti Ndä, näꞌä drä hojäꞌi ꞌne ma dä yꞌo̱tꞌe rä tsꞌu̱tꞌhui xä ñho. Mi mengi ha mähetsꞌi hingä ꞌmestho bi tꞌumbä rä nsu de gä Ndä ha rä Tsꞌu̱tꞌhui Äjuä (Hebreos 10:12, 13). Ha näꞌä rä je̱ya 1914, rä Zi Dada Jeoba bi umbi rä Hesu rä tsꞌe̱di pa dä mända ja ngu xki xipäbi. Dende geꞌmu̱, Jeoba bi hñutsꞌi rä Hesu pa bi mända ha mähetsꞌi ngu Rä Ndä (Daniel 7:13, 14).

3. Jeoba ꞌnehe xä huahni rꞌa yä ꞌme̱hñä ꞌne rꞌa yä ñꞌo̱ho̱ nuꞌu̱ xä yꞌo̱tuäbi yä mhända pa dä ma ha mähetsꞌi. Nuya yä jäꞌi ma dä majhä, ma dä ndä, ma dä nzaya ꞌne ma dä matsꞌi rä Hesu pa dä mända rä mexiꞌmhai (Lucas 22:28-30; Apocalipsis 5:9, 10). Rä Hesu bi ꞌñembi «zi tꞌu̱kä taxo» nuꞌu̱ ma dä ndäui ha rä Tsꞌu̱tꞌhui. Nuyu̱ yä jäꞌi tso̱tꞌe 144,000 (Lucas 12:32; Apocalipsis 14:1-3).

4. Ngu bi zo̱ho̱ bi Ndä rä Hesu, bä e̱ni rä Zithu ꞌne nuꞌu̱ yä tsꞌo e̱nxe̱ de ha mähetsꞌi ꞌne bä fo̱te pa ha rä Xiꞌmhai. Hänge dende rä je̱ya 1914 mänꞌa xä xu yä xuñha (Apocalipsis 12:9, 12). Yä dängä tuhni, yä thuhu, yä dängä ñheni, xä xu yä tsꞌomꞌu̱i..., gehnä nꞌa rä «señä» näꞌä udi ge rä Hesu ya di mända ꞌne nuꞌu̱ yä tsꞌo tꞌo̱tꞌe ja ha rä xiꞌmhai ꞌmu̱i ha yä gäxä pa (Mateo 24:3, 7, 8, 12, NM; Lucas 21:10, 11; 2 Timoteo 3:1-5).

5. Rä Hesu mänꞌitꞌho ma dä yꞌapä ngue̱nda yä jäꞌi ꞌne ngu nꞌa rä mayꞌo ma dä ꞌueke yä de̱ti de yä tꞌäxi. Ma dä hyandi ngu yä zi «de̱ti» nuꞌu̱ yä jäꞌi xä yꞌo̱te yä mhända ꞌne ma dä umbäbiꞌu̱ nꞌa rä te pa nzäntho nuua ha rä Xiꞌmhai. Ma dä hyandi ngu yä «tꞌäxi» nuꞌu̱ yä jäꞌi hinte bi ne de rä Tsꞌu̱tꞌhui Äjuä (Mateo 25:31-34, 46, NM). Mänꞌitꞌho, rä Hesu ma dä huati gatꞌho nuꞌu̱ yä jäꞌi ꞌñenä ngu yä tꞌäxi (2 Tesalonicenses 1:6-9, NM). Mu̱ nuꞌäge gi ne dä hyantꞌäꞌi rä Hesu ngu nꞌa rä zi «de̱ti», pe̱ꞌtsi gi yꞌo̱de nuꞌu̱ yä hogä noya de rä Tsꞌu̱tꞌhui Äjuä, ꞌne näꞌä ma gi pädi pe̱ꞌtsi gi pe̱fi (Mateo 24:14).

6. Mäpaya, ha rä Xiꞌmhai ja ndunthi yä dängä hnini, kada nꞌa de geꞌu̱ ꞌmu̱i nꞌa rä ndä. Yä hnini di ntuhni nꞌa ngu mänꞌaa. Pe rä Tsꞌu̱tꞌhui Äjuä ma dä hñäki gatꞌho nuꞌu̱ yä ndä ja ha rä xiꞌmhai. Rä Tsꞌu̱tꞌhui Äjuä ma dä mända ha gatꞌho rä Xiꞌmhai (Daniel 2:44). Ya hindä nja yä dängä tuhni, yä hyote ꞌne yä tsꞌomꞌu̱i. Gatꞌho yä jäꞌi ma dä mädi ꞌne ma dä me̱ꞌtsi nꞌa rä hogä mꞌu̱i (Miqueas 4:3, 4).

7. Rä Hesu ꞌne nuꞌu̱ 144,000 ma dä Mända nꞌa Mꞌo yä Je̱ya. Geꞌmu̱ yä jäꞌi ma dä zo̱ho̱ dä mꞌu̱i nsi rä tsꞌoki ꞌne gatꞌho rä Xiꞌmhai ma dä uädri. Xti uadi näꞌä nꞌa mꞌo yä je̱ya, rä Hesu ma dä uadi dä ja gatꞌho näꞌä mi ne Jeoba. Nubye̱ rä Hesu ma dä koꞌtsuäbi rä Dada näꞌä rä Tsꞌu̱tꞌhui (1 Corintios 15:24). ¿Por hanja hingi xipäbi nuꞌu̱ gi ntsixhui ꞌne nuꞌu̱ yä jäꞌi gi mädi näꞌä ma dä me̱fi rä Tsꞌu̱tꞌhui Äjuä?

[Nꞌa kꞌoi ha rä nxii 13]

Sti mända rä Hesu, hinto ma dä ñꞌu̱tsa ꞌne yä jäꞌi de gatꞌho yä hnini ma dä mädi