Rä ntheke 5
¿Te ma dä me̱fi Jeoba ko rä Xiꞌmhai?
¿Por hanja bi hyoki Jeoba rä Xiꞌmhai? (1, 2)
¿Por hanja mäpaya rä Xiꞌmhai hingä nꞌa rä uädri? (3)
¿Te ma dä thogi ko nuꞌu̱ yä tsꞌomꞌu̱i jäꞌi? (4)
¿Te ma dä me̱fi rä Hesu po nuꞌu̱ yä jäꞌi di hñeni?, ¿po yä zi xita?, ¿ꞌne po nuꞌu̱ yä jäꞌi xä du? (5, 6)
¿Te mähyoni gi pe̱fi pa dä za gi hñäni nuya yä jäpi ma dä ehe mꞌe̱fa? (7)
1. Rä Zi Dada Jeoba bi hyoki rä Xiꞌmhai pa yä jäꞌi xä mꞌu̱i pa nzäntho ko rä johya. Näꞌä mi ne ge xä mꞌu̱i se̱he̱ yä hojäꞌi (Salmo 115:16; Isaías 45:18). Rä Xiꞌmhai hingä ma dä uadi; pa nzäntho ma dä nja (Salmo 104:5; Eclesiastés 1:4).
2. Änte dä hyoki yä jäꞌi, Äjuä bi huahni nꞌa xe̱ni rä hai de ha rä Xiꞌmhai, pa bi hyoki nꞌa rä uädri mähotho ꞌne bi hñuꞌmpäbi rä «uädri Eden». ꞌNe bi ꞌñembi ja dä mꞌu̱hni näꞌä rä mu̱di ñꞌo̱ho̱ ꞌne näꞌä rä mu̱di ꞌme̱hñä: rä Adan ꞌne rä Eba. Äjuä bi ꞌñembäbi ge dä me̱ꞌtsi yä bätsi pa xä ñuꞌtsi gatꞌho rä Xiꞌmhai ꞌne rꞌamätsꞌu̱ ma xä hyoki de rä Xiꞌmhai nꞌa rä uädri (Génesis 1:28; 2:8, 15).
3. Rä Adan ꞌne rä Eba bi yꞌo̱tꞌä rä tsꞌoki ngeꞌä bi neꞌu̱ himbi yꞌo̱te yä mhända Äjuä. Hänge Äjuä bi yꞌe̱ni de ha rä uädri Eden hänge näꞌä rä uädri bi mꞌe̱di (Génesis 3:1-6, 23). Pe rä Zi Dada Jeoba hinxä pumfri näꞌä ma dä me̱fi ha rä Xiꞌmhai. Näꞌä xä mää ge ma dä ja nꞌa rä uädri ha gatꞌho rä Xiꞌmhai habu̱ ma dä mꞌu̱i yä jäꞌi pa nzäntho. ¿Hanja ma dä ja? (Salmo 37:29.)
4. Änte dä uädri rä Xiꞌmhai, pe̱ꞌtsi mꞌe̱tꞌo dä mꞌe̱di nuꞌu̱ yä tsꞌomꞌu̱i jäꞌi (Salmo 37:38). Ha näꞌä rä dängä tuhni Äjuä rä thuhu Armäjedon, ja gehni ma dä uadi rä ntsꞌomꞌu̱i. ꞌNepu̱ rä Zithu ma dä jotꞌi po nꞌa mꞌo yä je̱ya, njabu̱ ya hinto ma dä hyatꞌä yä jäꞌi. Se̱he̱ näꞌä rä hnini Äjuä ma dä bongi (Apocalipsis 16:14, 16; 20:1-3).
5. Nubye̱ hää Ñhesukristo ma dä mända ha rä Xiꞌmhai po nꞌa mꞌo yä je̱ya (Apocalipsis 20:6) ꞌne rꞌamätsꞌu̱ ma dä hñäki näꞌä rä tsꞌoki ja ha mä mfenihu̱ ꞌne ha mä ndoyꞌohu̱. Ma gä mꞌu̱ihu̱ nsi rä tsꞌoki ja ngu mi ꞌmu̱i rä Adan ꞌne rä Eba nuꞌmu̱ hingä xki me̱fi rä tsꞌoki. Ma dä mꞌe̱di yä ñheni, rä nxita ꞌne rä du. Nuꞌu̱ yä jäꞌi di hñeni ma dä nja yä nzaki ꞌne nuꞌu̱ yä zi xita ma dä mbäsjäꞌi mänꞌaki (Job 33:25; Isaías 33:24; Apocalipsis 21:3, 4).
6. Xti Mända rä Hesu po nꞌa Mꞌo yä Nje̱ya, nuꞌu̱ yä jäꞌi o̱te Äjuä ma dä mpe̱fi ꞌne ma dä hyoki de rä Xiꞌmhai nꞌa rä uädri (Salmo 37:29). ꞌNehe yä mꞌo de gä mꞌo nuꞌu̱ yä jäꞌi ma dä nuhu de rä du pa dä mꞌu̱i mänꞌaki ha rä Xiꞌmhai (Hechos 24:15). Mu̱ dä yꞌo̱te yä mhända Äjuä, nuꞌmu̱ ma dä sigi dä mꞌu̱i pa nzäntho ha rä Xiꞌmhai. Pe mu̱ hindä yꞌo̱te Äjuä, nuꞌmu̱ ma drä huati pa nzäntho (Juan 5:28, 29, NM; Apocalipsis 20:11-15).
7. Nubye̱ hää, Äjuä ma dä ja näꞌä mi ne dä me̱fi ha rä Xiꞌmhai dende rä mu̱di. ¿Gi hohmä gi hñäni nuya yä jäpi? Nuꞌmu̱, mähyoni gi sigi gi pädi de rä Zi Dada Jeoba ꞌne gi sigi gi yꞌo̱te yä mhända. Mu̱ gi ntini ha rä Ngu de gä Mhuntsꞌi de yä Testigo rä Jeoba ja getbu̱ de ha ri nguu, geꞌä ma dä maxꞌäꞌi (Isaías 11:9; Hebreos 10:24, 25).
[Nꞌa kꞌoi ha rä nxii 10]
Rä uädri bi mꞌe̱di
[Yä kꞌoi ha rä nxii 11]
Mꞌe̱fa de rä Armäjedon, rꞌamätsꞌu̱ dä zo̱ho̱ dä uädri gatꞌho rä Xiꞌmhai