Rä ntheke 4

¿Toꞌo näꞌä rä Diablo?

Rä Zithu näꞌä tꞌembi ꞌnehe rä Diablo, ¿hanja bi zo̱ho̱ bi nja? (1, 2)

¿Hanja kadi yä jäꞌi? (3-7)

¿Te dä za gi yꞌo̱tꞌe pa njabu̱ hindä kaꞌi rä Diablo? (7)

1. Toꞌo mängä yä dängä nkꞌuamba o yä nhemhñä pa dä yꞌo̱ꞌtuä rä ntsꞌomꞌu̱i märꞌaa, geꞌä tꞌembi rä «diablo». Tꞌembi rä «Zithu» näꞌä toꞌo di u̱tsa ꞌne di nkontraui märꞌaa. Hänge näꞌä rä dängä nkontra Äjuä rä thuhu rä Diablo ꞌne rä Zithu. Nuni mrä hogä e̱nxe̱, mi ꞌmu̱hui Äjuä ha mähetsꞌi, pe mꞌe̱fa bi ñꞌexmänsu ꞌne bi ne dä hñäni näꞌä rä nsu ri ꞌñepi Äjuä (Mateo 4:8-10, NM).

2. Ko nꞌa rä kꞌeñä, rä Zithu bi xipäbi rꞌa yä nkꞌuamba rä Eba pa himbi yꞌo̱te Äjuä. Njabu̱ näꞌä rä Zithu bi mu̱di bi ntunkui Äjuä, «Näꞌä toꞌo xa rä Dängä tsꞌu̱tꞌhui de gatꞌho rä Xiꞌmhai». Rä Zithu bi mää ge Äjuä hingä njabu̱ mi mända ꞌne himi hombäbi rä ñho rä mexiꞌmhai. ꞌNehe bi mää ge nixi nꞌa rä jäꞌi hingä ma dä ñꞌo mänjuäntho ha rä ꞌñuu Äjuä. Njabu̱ bi nkontraui Äjuä ꞌne bi zo̱ho̱ bi tꞌembi rä Zithu ꞌne rä Diablo (Génesis 3:1-5; Job 1:8-11; Apocalipsis 12:9).

3. Pa yä jäꞌi dä xo̱kämbeni rä Zithu, di kadi ko yä nkꞌuamba (2 Corintios 11:3, 14). Di kadi ko yä jamfri o yä ntꞌeme nuꞌu̱ hingä mäjuäni. Nꞌa rä jamfri pe̱fi näꞌä di ho rä Zithu mu̱ hingi udi näꞌä mäjuäni de rä Zi Dada (Juan 8:44). Nuꞌu̱ yä jäꞌi o ha nuꞌu̱ yä jamfri hingä mäjuäni, kamfri ge di xo̱kämbeni Äjuä pe hingä mäjuäni, nuꞌu̱ di xo̱kämbeni rä Zithu näꞌä “rä ndä de gekua ha rä xiꞌmhai” (2 Corintios 4:4).

4. Rä Zithu ꞌnehe xä dähä yä jäꞌi ko yä ntꞌete. Rꞌa yä jäꞌi apäbi rä mfatsꞌi yä tsꞌo ndähi pa dä su, pa dä yꞌo̱ꞌtuä rä ntsꞌomꞌu̱i märꞌaa, pa dä bädi te ma dä thogi mꞌe̱fa ꞌne pa dä ja yä milagro. Rä Zithu geꞌä rä tsꞌo ndähi di ja gatꞌho nuya yä tsꞌo tꞌo̱tꞌe. Mu̱ di ne gä johyabihu̱ rä mfeni Äjuä, pe̱ꞌtsi gä ꞌuegehu̱ de gatꞌho yä ntꞌete (Deuteronomio 18:10-12; Hechos 19:18, 19).

5. Rä Zithu japäbi rꞌa yä jäꞌi dä ñꞌexmänsu, huyämu̱i ge nuꞌu̱ ꞌne yä hnini habu̱ ꞌmu̱i mänꞌa xä ñho ke märꞌaa. Pe hingä mäjuäni (Hechos 10:34, 35). Märꞌa yä jäꞌi di numänsu nuꞌu̱ yä tsꞌu̱tꞌhui ꞌmu̱kua ha rä xiꞌmhai, huyämu̱i ge nuꞌu̱ go geꞌu̱ ma dä hñäki yä xuñha. Hingi ne te dä bädi de rä Tsꞌu̱tꞌhui Äjuä. Pe se̱he̱ gehnä ma dä za dä hñäki gatꞌho yä dumu̱i (Daniel 2:44).

6. ꞌNehe rä Zithu huꞌtsuäbi yä tentasio yä jäꞌi pa dä me̱fi näꞌä xä ntsꞌo. Rä Zi Dada Jeoba pädi ge nuꞌu̱ yä tsꞌoki ma dä u̱ngägihu̱ hänge xikägihu̱ ge gä ꞌuegehu̱ de geꞌu̱ (Gálatas 6:7, 8). Rꞌabu̱, rꞌa yä jäꞌi ne dä kaꞌi pa gi ja nuya yä tsꞌoki. Pe beni, ge näꞌä rä Zithu go geꞌä ne gi pe̱fi nuya yä tsꞌoki (1 Corintios 6:9, 10; 15:33).

7. Rä Zithu ma dä japi dä tꞌu̱tsaꞌi ꞌne gi thogi yä xuñha pa gi ꞌuege de Jeoba. ꞌNehe dä za ge rꞌa ri pariente hindä ho gi nxadi rä Mäkä Tꞌofo, ha rꞌaa ma dä deñꞌäꞌi. Pe, ¿toꞌo xä rꞌakägihu̱ mä tehu̱? Rä Zithu ne dä piꞌi pa hingi sigi gi pädi de Jeoba. Pe ogi hopi dä ntäte (Mateo 10:34-39; 1 Pedro 5:8, 9). Mu̱ hingä pe̱fihu̱ näꞌä di ho rä Diablo, ma dä johya rä mfeni Jeoba ꞌne ma gä udihu̱ ge di nehu̱ go dä mändagihu̱ꞌä, ngeꞌä go geꞌä Näꞌä toꞌo xa rä Dängä tsꞌu̱tꞌhui de gatꞌho rä Xiꞌmhai (Proverbios 27:11).

[Yä kꞌoi ha rä nxii 9]

Yä jamfri hingä mäjuäni, yä ntꞌete ꞌne rꞌa yä jäꞌi di uni yä te po yä hnini, udi ge rä Zithu xä kadi yä jäꞌi

[Nꞌa kꞌoi ha rä nxii 9]

Sigi gi pädi de rä Zi Dada Jeoba pa hingi pe̱fi näꞌä di ho rä Zithu