Rä ntheke 3

¿Toꞌo Ñhesukristo?

¿Por hanja rä Hesu tꞌembi rä «mu̱di tꞌu̱» Äjuä? (1)

¿Por hanja tꞌembi «rä Noya»? (1)

¿Por hanja bä ehe rä Hesu ha rä Xiꞌmhai ngu nꞌa rä jäꞌi? (2-4)

¿Por hanja bi yꞌo̱tꞌe yä milagro? (5)

¿Te ma dä me̱fi rä Hesu mänꞌitꞌho? (6)

1. Änte dä ehe ha rä Xiꞌmhai, rä Hesu mi ꞌmu̱i ha mähetsꞌi ngu nꞌa rä e̱nxe̱. Ha xa rä mu̱di, Äjuä bi hyoki rä Hesu; hänge tꞌembi rä «mu̱di tꞌu̱» Äjuä (Colosenses 1:15, NM; Apocalipsis 3:14). De gatꞌho näꞌä bi hyoki Äjuä, ho̱nse̱ rä Hesu hinto bi matsꞌi pa bi hyoki. Änte dä ehe ha rä Xiꞌmhai, rä Hesu bi zo̱ho̱ bi nja ngu nꞌa rä «me̱fi näꞌä xa mi pädi dä hyoki xä ñho gatꞌho». Bi maxä rä Dada bi hyoki gatꞌho näꞌä ja ha mähetsꞌi ꞌne ha rä Xiꞌmhai (Proverbios 8:22-31; Colosenses 1:16, 17). Äjuä bi mändabi rä Hesu dä mänduä rä noya, geꞌä rä dängä mꞌe̱hni, hänge tꞌembi «rä Noya» (Juan 1:1-3; Apocalipsis 19:13).

2. Äjuä bä pe̱hni rä Tꞌu̱ ha rä Xiꞌmhai, rä Hesu bi mꞌu̱i ngu nꞌa rä zi ꞌue̱ne ha rä mu̱i rä Märia. Näꞌä himbi me̱ꞌtsi nꞌa rä dada nuua ha rä xiꞌmhai; hänge bi mꞌu̱i nsi rä tsꞌoki. ¿Por hanja Äjuä bä pe̱hni rä Tꞌu̱ ha rä Xiꞌmhai? Bä pe̱hni: 1) pa dä ꞌñutkägihu̱ näꞌä mäjuäni de Äjuä (Juan 18:37), 2) pa bi ñꞌo xa mänjuäntho ha rä ꞌñu Äjuä ꞌne njabu̱ bi zogi nꞌa rä kꞌoi pa gä de̱nihu̱ (1 Pedro 2:21) ꞌne 3) pa bi uni rä te ꞌne njabu̱ bi ñängägihu̱ de rä tsꞌoki ꞌne de rä du. ¿Por hanja mi ja mꞌe̱di dä ungä rä te? (Mateo 20:28.)

3. Näꞌä rä mu̱di ñꞌo̱ho̱ mrä thuhu rä Adan ꞌne rä Eba himbi yꞌo̱te yä mhända Äjuä, rä Mäkä Tꞌofo mää ge nuꞌu̱ bi me̱fi näꞌä tꞌembi «rä tsꞌoki». Hänge Äjuä bi ꞌñembi ge ma dä du (Génesis 3:17-19). Nuꞌu̱ ya himbi mꞌu̱i ngu mi mända Äjuä, nubye̱ bi mꞌu̱ ko rä tsꞌoki. Rꞌamätsꞌu̱ bi nxita asta xa bi du ꞌne bi zokuäbi rä tsꞌoki gatꞌho yä bätsi. Hänge nuju̱ ꞌnehe di nxitahu̱, di ñhenihu̱ ꞌne di tuhu̱. ¿Toꞌo ma xä ñäni rä mexiꞌmhai? (Romanos 3:23; 5:12.)

4. Rä Hesu ꞌne rä Adan himi pe̱ꞌtsi rä tsꞌoki. Pe rä Hesu nzäntho bi yꞌo̱te Äjuä mäske bi thogi yä dängä xuñha. Hänge bi za bi uni rä te pa bi gutꞌi näꞌä rä tsꞌoki rä Adan. Rä Mäkä Tꞌofo mää ge ko näꞌä rä «njutꞌi», rä Hesu bi ñäni de rä du nuꞌu̱ yä bätsi rä Adan. Toꞌo dä gamfri o dä ñꞌeme rä Hesu, nuꞌmu̱ Äjuä ma dä punduäbi yä tsꞌoki ꞌne ma dä umbäbi nꞌa rä te pa nzäntho (1 Timoteo 2:5, 6, NM; Juan 3:16; Romanos 5:18, 19).

5. Nuꞌmu̱ bi mꞌu̱kua ha rä Xiꞌmhai, rä Hesu bi yꞌo̱the nuꞌu̱ yä jäꞌi mi hñeni, bi ꞌuini nuꞌu̱ mi tsu̱di rä thuhu ꞌne bi japi bi ntsaya yä bu̱nthi. Asta bi japi dä nuhu nuꞌu̱ xki du. ¿Por hanja bi ja yä milagro? 1) Mi hueki nuꞌu̱ yä jäꞌi mi sufri ꞌne mi ne dä matsꞌi. 2) Ko nuꞌu̱ yä milagro bi ja, bi ꞌñudi ge go mi geꞌä rä Tꞌu̱ Äjuä. 3) Nuꞌu̱ yä milagro, bi ꞌñudi näꞌä ma dä me̱fi po nuꞌu̱ yä jäꞌi o̱te Äjuä nuꞌmu̱ sti Ndä rä Hesu ha rä Xiꞌmhai (Mateo 14:14; Marcos 2:10-12; Juan 5:28, 29).

6. Rä Hesu bi du pe Äjuä bi gu̱tsꞌi ꞌne bi umbäbi nꞌa rä te de gä e̱nxe̱ pa bi mengi ha mähetsꞌi (1 Pedro 3:18). Mꞌe̱fa Äjuä bi hñutsꞌi de gä Ndä. Rä Hesu mänꞌitꞌho ma dä hñäki gatꞌho rä ntsꞌomꞌu̱i ꞌne yä dumu̱i ja ha rä Xiꞌmhai (Salmo 37:9-11; Proverbios 2:21, 22).

[Yä kꞌoi ha rä nxii 7]

Ha rä Mäkä ꞌme̱fi rä Hesu, bi ꞌñuti yä jäꞌi, bi ja yä milagro ꞌne bi ungä rä te por gekhu̱