Pe̱ꞌtsi gä pädihu̱ toꞌo rä Zi Dada

Pa gä ntsitsꞌihu̱ ko rä Zi Dada, pe̱ꞌtsi gä pädihu̱ toꞌoꞌä. Gatꞌho nuꞌu̱ ri hogä ntsitsꞌi pädi ꞌne zoꞌi ko ri thuhu, ¿hänge hää? Rä Zi Dada ꞌnehe ne gä pätuäbihu̱ ꞌne gä zofohu̱ ko rä thuhu. Rä Zi Dada rä thuhu Jeoba (Salmo 83:18; Mateo 6:9). ꞌNehe mähyoni gä pädihu̱ näꞌä di ho ꞌne näꞌä hinä, toꞌo nuꞌu̱ di ntsitsꞌiui ha toꞌo nuꞌu̱ hinä. Pa gi pädi xä ñho nꞌa rä jäꞌi tsitsꞌi ndunthi yä pa, rä Mäkä Tꞌofo mää ge mähyoni gi ꞌueke ri pongi pa gi pädi toꞌo rä Zi Dada Jeoba (Efesios 5:15, 16).

Nzäntho pe̱fi näꞌä di ho rä Zi Dada nuꞌu̱ yä ntsitsꞌi. Beni nuꞌu̱ gi ntsitsꞌiui. Mu̱ gi yꞌo̱ꞌtue rä ntsꞌomꞌu̱i ne gi pe̱fi näꞌä hindi ho, ¿ma dä hyantꞌäꞌi ngu nꞌa rä hogä ntsitsꞌi? Di pädihu̱ ge hinä. Njabu̱ ꞌnehe, mu̱ di ne gä ntsitsꞌihu̱ ko rä Zi Dada, pe̱ꞌtsi gä jahu̱ nzäntho näꞌä di ho (Juan 4:24).

Hingä gatꞌho yä jamfri ma dä maxkägihu̱ gä pe̱ꞌtsihu̱ nꞌa rä hogä ntsitsꞌi ko rä Zi Dada. Ñhesukristo, näꞌä xa rä dängä ntsitsꞌi rä Zi Dada, bi mää ge ja se̱he̱ yoho yä ꞌñuu. Nꞌa rä ꞌñuu näꞌä xä rä ngu̱ni habu̱ yꞌo xi ndunthi yä jäꞌi. Nunä rä ꞌñuu tsitsꞌi ha rä du. Ha näꞌä mä nꞌa rä ꞌñuu xa rä ntsꞌiꞌmi, bi mää ge yꞌo tsꞌu̱tho yä jäꞌi. Pe nunä rä ꞌñuu tso̱ni ha nꞌa rä te pa nzäntho. Kongehnä utkägihu̱ ge mu̱ di ne gä pe̱ꞌtsihu̱ nꞌa rä hogä ntsitsꞌi ko rä Zi Dada, mähyoni gä pädihu̱ hanja ri ꞌñehe gä xo̱kämbenihu̱ Jeoba (Mateo 7:13, 14).