Bi jui de ha rä Uädri

ÄNTE dä hyoki rä mexiꞌmhai, Äjuä bi hyoki yä e̱nxe̱ ha mähetsꞌi. Mꞌe̱fa nꞌa de geꞌu̱ bi tꞌembi rä Zithu o rä Diablo, ngeꞌä bi ntsꞌomꞌu̱i ꞌne bi hyatꞌi rä Eba hänge nunä bi zipäbi rä fruta de näꞌä rä xaza xki xipi Äjuä ge hindä datꞌi.

Rä Zithu bi japi dä ñä nꞌa rä kꞌeñä ꞌne bi xipi näꞌä rä ꞌme̱hñä ꞌne rä däme ge Äjuä xki hñäkuäbi nꞌa rä ñho. Bi xipi ge mu̱ dä zi näꞌä rä fruta, hingä mäjuäni ma dä du ja ngu xki mängä Jeoba; näꞌä rä tsꞌo e̱nxe̱ bi ꞌñe kꞌuamba Äjuä. Rä Zithu bi ñäꞌti rä Adan ꞌne rä Eba nꞌa rä hogä mꞌu̱i, bi ꞌñembi ge mu̱ dä zi näꞌä rä fruta xki tꞌembi ge hindä datꞌi ma xä me̱ꞌtsi nꞌa rä hogä mfädi ꞌne ma xä za xä me̱fi näꞌä go xä ne. Pe gatꞌho näꞌä bi mää mrä nkꞌuamba: gehnä rä mu̱di nkꞌuamba bi nja nuua ha rä xiꞌmhai. Rä Zithu bi japi rä mexiꞌmhai hindä gamfribi Äjuä ko nuya yä ntꞌani bi yꞌo̱tꞌe: ¿Go ri ꞌñepi Äjuä dä mända gatꞌho rä xiꞌmhai? ¿Xä ñho yä mhända Äjuä? ¿Xä ñho gä o̱tehu̱ nuꞌu̱ yä mhända?

Rä Eba bi gamfri näꞌä rä nkꞌuamba bi mängä rä Zithu. Bi mu̱di bi nu̱ꞌti näꞌä rä fruta ꞌne bi mu̱di bi zi. ꞌNepu̱ bi umbäbi ꞌnehe rä däme pa dä zi. ꞌÑenä di nheki hinxä ntsꞌo näꞌä bi yꞌo̱tꞌe, pe nꞌa rä dängä tsꞌoki näꞌä bi me̱fi. Bi neꞌä himbi yꞌo̱te yä mhända Äjuä Näꞌä toꞌo xki umbi rä te ꞌne gatꞌho näꞌä mi pe̱ꞌtsi, rä Adan ꞌne rä Eba xki tꞌumbäbi nꞌa rä te näꞌä himi ñꞌoui rä tsꞌoki.

Äjuä bi yꞌapäbi ngue̱nda rä Zithu, rä Adan ꞌne rä Eba ngeꞌä nuyu̱ hingä geꞌä xki me̱fi. Mꞌe̱tꞌo bi mää ge mꞌe̱fa nꞌa rä Ñänte ma dä zo̱ho̱ pa dä huati rä Zithu. ꞌNepu̱ bi mää ge rä Adan ꞌne rä Eba pe̱ꞌtsi ma dä du ngeꞌä himbi yꞌo̱te rä Zi Dada Jeoba, pe himbi umbi rä du ꞌmestho. Njabu̱, Jeoba bi ꞌñudi ge mi hueki nuꞌu̱ yä bätsi hixki mꞌu̱itho de rä Adan ꞌne rä Eba. ¿Te mä humu̱i mi to̱ꞌmi nuyu̱ yä bätsi? Jeoba bi mää ge näꞌä rä Ñänte ma dä hñäki gatꞌho nuꞌu̱ yä xuñha bä ehe dende ha rä uädri Eden. Pe ¿toꞌo nunä rä Ñänte ꞌne hanja ma dä me̱fi näꞌä xki xipi Äjuä? Ngu mi tꞌofo rä Mäkä Tꞌofo, rꞌamätsꞌu̱ bi fädi ꞌnehe rä mpengi nunä rä ntꞌani.

Mꞌe̱fa, Äjuä bi japäbi rä Adan ꞌne rä Eba dä bo̱ni de näꞌä ha rä Uädri. Nubye̱ ko rä nxanthe pe̱ꞌtsi bi mpe̱fi pa dä dähä näꞌä dä zi. Rä Eba bi me̱ꞌtsi rä mu̱di bätsi mrä thuhu rä Kain. Mꞌe̱fa rä Adan ꞌne rä Eba bi me̱ꞌtsi märꞌa yä tꞌu̱ ꞌne yä tꞌixu, nꞌa mrä thuhu rä Abel, mänꞌaa mrä thuhu rä Set, näꞌä rä xita rä Noe.

(Ehe ha rä Génesis ha yä ntheke 3 asta 5 ꞌne rä Apocalipsis 12:9.)